Арво Валтон «Шуд»

Удмурт Дунне
By Удмурт Дунне Декабрь 23, 2015 13:00

Арво Валтон

Ву но Тыл нимо удмурт воргоронъёс шунды ӝужамлэсь азьвыл шур дуре чорыганы васькизы: эскером, пе, шудмес, ӵукназэ сиськись чорыгъёсыз курик пумысь нумырен кунояса.
Ярдуре тылскизы, ваче тыбыр пуксьыса, чорыглэсь шудыны кутскемзэ витьыны кутскизы. Ву нимоез воргорон ымнырыныз шур пала пукиз, Тыл нимоез — тылскем пала. Воргоронъёс удмурт вал бере, соос трос ӧз вераське. Кӧня ке дыр ортчыса, Ву шуиз:
— Адями, кошкись ву шоры учкыса, ноку но уг жадьы.
Тыл вазиз:
— Адями, тыл шоры учкыса, уг жадьы.
— Озьыез озьы но, — шуиз Ву, — тылэ ялан пу ватсано, нош ву ас понназ бызе.
— Пичи выретэм котьмар-лы но кулэ, — шара малпаз Тыл.

Тазьы вераськемзы бере воргоронъёс кема шыпыт пукизы. Визнанъёсты пуктыны вазьгес на, чорыгъёс ӵукназэ сиськыны дась ӧвӧл.
Шӧдтэк шорысь гурт палась арамаысь кык Воршудъёс потӥзы, нырысь Тылъёслэн Воршудзы адскиз, собере — Вуослэнэз.
Ымнырыныз нюлэс пала пукись Тыл, ас Воршудзэ адӟыса, юаз:
— Ма ветлӥськод? Дорын ваньмыз умой-а?
— Лыктӥ али учкыны, мар шудэз тон татын витиськод, кыӵеез шуд дорад ӧвӧл.
Табере Ву но, гурт пала берытскыса, ас Воршудэзлэсь лыктон мугзэ юаз. Ву Воршуд, Тыл Воршуд сямен ик, валэктӥз.
Собере огшап дыр ӵоже шыпыт улӥзы. Удмуртъёслэн Воршудъёссы но туж ик вераськисесь ӧвӧл.
Озьы ке но мар ке но сюлэмзэс бичатыса улӥз. Ву Воршуд юаз:
— Мар со сыӵе шуд, кызьы малпаськод?
— Шуд — со куке корка чылкыт, бусы утялтэмын, куке бускельёсыд ӟечесь, уг пӧяло, юртто, — кема малпаськытэк, вазиз Ву.
— Бен, сыӵе тӥляд калыкты — уг пӧяськы, ужась, чылкыт, — шуиз Воршуд. Собере нош ик юаз: — Веранэд быриз-а?
Ву йырберзэ кормаз но ватсаз:
— Шуд — со куке мон трос маке шедьтӥсько ке, соин семьяме сюдэме луэ ке.
— Нош тон мар малпаськод? — юаз Тыллэсь кыкетӥез Воршуд.
Тыл верамезлэсь азьло малпаськиз на:
— Ваньмыз озьы, кызьы эше вераз, огзэ гинэ будэтысал на: шуд — со али ми азе горд йырсиё нылмурт потысалыз но милемлы кутымтэ чорыгмылэсь чорыг лым пӧзьтысалыз ке.
Но сыӵезэ шудэз кышнояськымтэ Тыллы Воршудэз ӧз возьматы.
— Ми ум ченгеше, — шуиз Ву воршуд, — кӧня ке визь-нод кылмес гинэ вералом.
— Вералэ, озьы ке, — соглаш луиз Ву. — Ӟечлы дышетэмды понна ик ми тӥледыз гажаськомы ук.
Тыл мыняса улӥз, со дышетӥсьёслэн верамъёссылы ӧзгес оскылы угось. Шуд вайись Воршудъёсызлы но.
— Зэм, шуд вань кутэм чорыгын но, — шуиз огез Воршуд оскытэкгес.
— Горд йырсиё нылмуртын но, — сыӵе ик куараен ватсаз мукетыз Воршуд.
— Нош милям потэ вылэм… — веранзэ ӧз быдты Ву Воршуд.
— Потэ вылэм, бен… — итӥськиз Тыл Воршуд.
— Потэ вылэм тодады вайытэммы, шуд — со пичи макеосын, сое адӟыны быгатонын.
— Озьы, шуд — со тани та шундылэн ӝужаназ, тӥни, адӟиськоды-а, со нюлэс сьӧрысь ӝутске ни. Тӥни со бадӟым пилемын, кудӥз йыръёсты вадесын инметӥ полыса. Та тылобурдо кырӟамын. Та писпу вайын, кудӥз тӥледлы эш кадь шона. Шуд — со туж трос макеосын, со тӥтэк но вань, но тӥ сое адӟыны быгатыны, тодманы кулэ.
Тыллэн ымыз ик усьтӥськиз. Солэн ноку но Воршудэзлэсь такема вераськемзэ кылэмез ӧй вал.
Малы одно али? Малы одно татын, нюлэс сьӧрын, шур дурын?
Тыллэн малпам нылмуртэз писпуос сьӧрысь ӧз адскы.
Валаны ӧйлась, кылӥз-а котькудӥз воргорон аслэсьтыз гинэ Воршудзэ яке эшезлэсь Воршудзэ но-а?
— Маръёс со — пичи арбериос? Троссэ тодӥсько кадь, но тынэсьтыд но кылэме потэ вылэм, — куриз Ву.
— Нимало куд-огзэ гинэ, — шуиз Воршуд, — со лудӵӧжлэн чыртыысьтыз чибориё гон но тани та куалялюльы. Учкы, макем чебересь соос! Со огшоры сугон кӧм но котькудӥз, котькудӥз, котькудӥз сяська. Со тулыс ӝужась турын но сӥзьыл бадяр куар. Со пужыё куркапуз но ваёбыжлэн лобамез. Со ву выллэн чилямез но тыллэн гомамез. Мукетсэ ачид тодӥськод.
Чилясь ву выллы но тыллы синмаськыса ик, пукизы вал удмурт воргоронъёс.
Ву пыд вылысьтыз ӝутскиз но визнанзэ вуэ куштӥз. Озьы ик Тыл кариз. Тылскемзы кысэ ни вал, Воршудъёс ышизы. Бертӥзы, луоз. Дорын соослэн интызы. Огшоры арбериос но нунал пӧрат ужъёс пӧлын.

Удмурт кылэ берыктӥз МУШ НАДИ

Удмурт Дунне
By Удмурт Дунне Декабрь 23, 2015 13:00