Россилы пумит санкциос, анай капитал но кинолэн арез. Мар сярысь вераське дунне?

Удмурт Дунне
By Удмурт Дунне Декабрь 11, 2015 13:33

евросоюзДуннеын

Огкылэ ӧз вуэ на

Евросоюзлэсь Россилы пумит санкциоссэ нуйтон ужпумез рос-прос эскерыны куриз Италия.

Евросоюзлэн Россилы пумит санкциосызлэн йылпумъяськон дырзы — январь толэзьлэн пумыз. Европаысь куд-ог кивалтӥсьёс малпазы вал: та ужпумез нимаз ӝутоно уз лу ни, санкциос, нимаз кенешытэк но, азинтӥськозы но тӥни.  Италия ӧз чида, шуиз: Россиен кусып возёнэз выльысь эскерыса потоно,  санкциос, ыштонъёс сяна, Европалы номыр ӟечсэ ӧз вае на. Францилэн парламентэз но кенешыны чакла санкциосты йылпумъян пумысен.

Россиысь кунгожсьӧр ужпумъёсъя министр Сергей Лавров пусъемъя, кунмылы пумит санкциос шумпотто Америкаез гинэ, нош Евросоюз солы оскиське, США-лэн  ӵектонъёсызъя кариське. Матысь дыре ортчоз Евросоюзлэн та ужпумлы сӥзем кенешонэз.

маткапРоссиын

Пайдаё анай капитал

Президент В. Путин, Федерал Собранилы вазиськыкуз, ӵектӥз анай капиталъя программаез эшшо 2 арлы нуйтыны.

Ужъя министерство ивортэмъя, та ӵектонлы проект дасямын ни. Матысь дыре сое сэрттоз-пертчоз Кун Дума. Анай капиталъя программа эшшо 2 арлы нуйтэмын луиз ке, кыкетӥ я куинетӥ нылпи вайисьёслы юрттэтлэн быдӟалаез 2017-тӥ арын 480 сюрс манет луоз, 2018-тӥын — 505 сюрс манет. Та аръёсы анай капиталлэн быдӟалаез тупатскоз инфляцияя. Нош 2016-тӥ арын солэсь быдӟалазэ будэтыны луонлык ӧвӧл.

кино
Удмуртиын

Палэнэ ум кыле

Вуоно ар Россиын ялэмын Кинолэн ареныз. Шаерамы киностудимы ӧвӧл ке но, Удмуртия та бадӟым ужрадлэсь палэнэ уз кыльы.

Культурая но туризмъя министр Владимир Соловьёв пусъемъя, кино пуктыны быгатӥсь адямиосмы элькунамы ичи ӧвӧл. Ӟуч кылын сяна, кылдо удмурт кылын, удмурт гуртлы, егитъёслы сӥзем фильмъёс, асьме режиссёръёс вормисе потыло пӧртэм конкурсъёсын. Кино пуктонэн вырись самодеятельной коллективъёсты огазеяно, соослы кино пуктыны площадка кылдытоно — та ужез ас вылаз басьтыны дась  Культурая но туризмъя министерство.

Дасяз Елена Никитина

Туспуктэмъёс вотэсысь басьтэмын

Удмурт Дунне
By Удмурт Дунне Декабрь 11, 2015 13:33