Анастасия Шумилова: Кылъёс бергало котькытын

Удмурт Дунне
By Удмурт Дунне Декабрь 22, 2015 13:25

Анастасия Шумилова поттӥз «Дыр-эктон» нырысетӥ кылбур бичетсэ. Тодэм потӥз, кызьы со кылдӥз.

шумло

А. Шумилова: Куддыр, кыӵе ке кылбурез лыдӟыкум, шоканы ик секыт луэ — кызьы зэмос кылбурчиос быгато кыл пушкы сомындазэ пыӵатыны!

— Кыӵе кусыпъёсыд  поэзиен?

— Зэмзэ вераса, ӝыны ар талэсь азьло кин ке верасалыз ке, таяз аре мон кылбур бичет потто шуыса, серекъясал гинэ, дыр, малы ке шуоно ноку ӧй малпа вал, мон кылбураны быгато шуыса. Куд-ог дыръя кыӵе ке мылкыд поталляз ке но, мон ноку ӧй кутскылы гожъяськыны. Мон понна «графомания» — кышкыт кыл, уг яратӥськы гожъяськон понна гожъяськисьёсты. Ачим туж яратӥсько кылбуръёсты лыдӟыны. Куддыр, кыӵе ке кылбурез лыдӟыкум, шоканы ик секыт луэ — кызьы зэмос кылбурчиос быгато кыл пушкы сомындазэ пыӵатыны! Шурдоно ик куддыр. Кылбуръёслэсь но Стендальлэн синдромез луыны быгатэ. Но ӵемысь сюлэм йыггетэ, шокан пытсаське, классикъёсты лыдӟыку. Нош мар вералод туала поэзия сярысь? Тунсыкъяськыны тыршисько ик туала поэзиен, но мон шуысал, сое уг лыдӟиськы мылы потыса, лыдӟисько, туала ӟуч поэзиез тодыны кулэ шуыса. Ӵемысь секыт вераны, умой-а, урод-а та кылбур — туала вакытэ тросэз кошко огдышем сямъя кылбуранлэсь, кыӵе ке выль утчаськонъёс мыно, тросэз верлибрен гожъясько.

Поэзиез зол шӧдӥсь адями, кылбурез одӥг пол лыдӟыса, вераны быгатэ, со умой яке урод. Мон озьы уг быгатӥськы. Эшшо ик туала поэзия туж интертекстуальной, сыӵе кылбуръёсты валан понна культурной песьтэред туж бадӟым луыны кулэ. Поэтъёс уг гожъясько ни кылъёсын, гожъясько кыӵе ке концептъёсын, пуштросъёсын, знакъёсын. Кылъёс сигналъёслы пӧрмо. Шуом, одӥг кыл яке кыл тэчет огезлы адямилы номыр уз вера, нош литератураез, историез тодӥсь мурт адӟоз отысь О. Мандельштамлэсь гожтэмъёссэ, нош Мандельштам ас вакытаз та ик образэз асэстӥз, шуом, Гомерлэсь. Вань со пуштросъёс ог-огзэс узырмыто но лыдӟисез дауръёс но культураос пыр нуо. Тодӥсь адямилэн йыраз соку ик кылдэ узыр, кӧня ке полэс суред, соин со куанэ кылбурлэсь. Нош тодӥсьтэмезлы кылбур валантэм, ляб потоз. Соин но али тросэз критикъёс шуо: поэзия огшоры лыдӟисьлэсь палэнскиз, со филологъёслы гинэ кулэ на. Соин но куд-ог поэтъёс юри огшорыгес гожъяськыны тыршо. Уг тодӥськы, кытын эсэпез луыны кулэ. Огласянь, поэзия визьмо луыны, адямиез узырмытыны кулэ, йырзэ ужатыны. Но со дыре ик, зэм но, калык мед валалоз сое. Мон малпамъя, поэзиын, быдэсак искусствоын сямен ик, нокыӵе катъёс луыны кулэ ӧвӧл, «озьы кулэ», «нош тазьы уг яра» шуэмъёс — со ваньмыз мултэс. Тросэз шуо, али зэмос поэзия ӧвӧл ни. Мон солы уг оскиськы. Поэзия — со улэп маке, со ялан вошъяське, кылдо выль темаос, выльысь улӟо быремъёсыз. Туала поэзия уг кельшы ке, котьку быгатӥськод берыктӥськыны азьвыл гожтэм чуръёс пала. Ӟеч кылбуръёс котьку шедьтозы лыдӟисьсэс.

BScD7BD6E-Y

— Кызьы ачид кылбуранэ вуид?

— Мон азьвылгес ини берыктӥ вал удмурт кылэ Г. Аполлинерлэсь вакчи кылбуръёссэ. Яратӥсько художественной текстъёсын вырыны. Но аслым ӵемысь номыр вераны кадь. Писатель одно мар ке вераны кулэ ук. Нош мар мон выльзэ вералом, ваньмыз верамын ни кадь сомында дауръёс ӵоже. А. Генис юнме ӧз шуы: модернизмлэсь азьло писательёс мар ке вылез сярысь гожъяло вал, нош со бӧрсьы — сое ик, но мукет кылъёсын, пуштрос ласянь номыр вылез ӧвӧл. Соин гожъяськон азьын малпаськоно: кулэ ик-а выльысь вераськыны со сярысь, ма сярысь сомында пол верамын вал ини. Но таяз куарусёнэ Тартуын ветлӥ поэтъёслэн фестивалязы. Пукисько мон залын, кылбуръёссэс лыдӟо поэтъёс. Кудӥз ке кельше, кудӥз ке уг. Соку ик малпай: соос но куке но нырысетӥ кылбурзэс гожтӥзы ук. Малы мон сокем кышкасько банальной, огшоры луыны? Отысен ик нырысетӥ чуръёсы вордскизы. Мон соосты филолог эшелы возьматӥ. Со паймиз но ушъяз. Со но монэ бурдъяз кадь. Озьы вакчи дыр ӵоже вордскизы кылбуръёсы. Нош «Удмурт бестиарий» мынам кемалась кылдытэме потэ ини вал, ӵапак Г. Аполлинерлэсь «Бестиарийзэ» берыктэме бере. Но соку кык-куинь кылбур гожтӥ но, уже ӧз мыны, куштӥськи солэсь. Нош гожъяськыны кутскеме бере выльысь берытски но пӧрмытӥ мар ке. Али љутскем мылкыды ӧжытаклы лапказ кадь, сокем ӵем уг кылбураськы ини, азьланяз мар луоз, вераны уг быгатӥськы. Учком.

NGgevXJEUro

— Удмурт кылбурчиослэсь адӟем кариськод-а?

— Мон малпасько, удмурт кылбуретлы уг тырмы дуннеысь культураен диалог. Со ас понназгес улэ. Оло, со умой но, удмурт шӧмзэ возе шуыса, но куддыр акыльтоно солэсь. Огдышем кабъёсъя кылбуран нокытчы ӧз кошкы. Мыным кельше ӟуч поэзилэн модернизм вакытэз, нош удмурт литературае со модернизм шӧм, мон малпамъя, али гинэ рос-прос вуэ, огдыре постмодернизмен вожмаськыса. Мыным кельше Сергей Матвеевлэн поэзиез, со туж туала, кельшо солэн кылъёсын шудэмез но образъёсыз. Озьы ик Алла Кузнецова, Эрик Батуев, Флор Васильев. Богдан Анфиногеновез лыдӟыны яратӥсько, со, зэм ик, гений, аслыз ачиз ӧр кылдытӥз, отын со ассэ эркын шӧдэ. Со ӧре али куд-ог егит нылаш кылбурчиос зымыны утчало, но соослэн туж ик уг пӧрмы. Со эпигонстволы гинэ кельше. Мынам потэ вал удмурт кылбуретэ кыӵе ке универсальность пыртэме, эскереме сыӵе юанъёсты, кудъёсыз котькуд адямиез сюлмаськыто — удмурт-а со, ӟуч-а, ныл-а, пи-а, пинал-а, пересь-а. Туж потэ вал кылме узырмытэме, тырши кылылэн чеберез бордын ужаны. Мыным уг кельшо кылбуръёс, кытын одӥг веран одӥг чур пушкы пытсамын, соин кылбуръёсам малпанъёсы одӥг чуре гинэ уг тэро, мукетаз выжо. Кылбур нимысьтыз чуръёслэсь уг пӧрмы, Ю. Тыняновлэн верамезъя, кылбурез кылдытэ «теснота стихового ряда».

— Лыдӟись азьын шара кылиськемед бере пушкад маке воштӥськиз-а?

— Мон эшелы верай но, кылбур бичет поттӥсько шуыса, со монэ поэт шуыны кутскиз. Со кыл монэ кӧня ке кышкатэ, со азьын мынам кыӵе ке сакральной дырекъянэ вань кадь. Мон поэт ӧвӧл. Кылбуран мон понна вал кыӵе ке творческой психотерапия, асме эскерон, но со берытскиз мон понна аспӧртэм висёнэн — кылбуръёс гожъякум, мон шӧдӥ кылъёслэсь котькытын бергамзэс, соослэсь пегӟыны уг луы. Али но тодам возисько, кызьы одӥгзэ кылбурме гожтон дыръям кыӵе ке эйфориез шӧдӥ — огдыре бӧрдэм но серекъям потэ. Кылъёс, зэм но, котьма карыны быгато, котькыӵе мылкыд кылдытыны. Шӧдоно но валано гинэ соосты.

Настя Шумилова вордскиз Пичи Пурга ёросысь Орлой гуртын.
Дышетскиз УдГУ-ысь удмурт кылосбуръя факультетын.
Ужаз «Удмурт дунне» газетын корректор луыса.
Али дышетске Эстониысь Тарту университетын философия факультетын.
Берло дыре тужгес кельшись авторъёс — А. Чудаков, М. Шишкин, А. Генис, Л. Лосев.
Яратоно киноосыз — К. Тарантинолэн, В. Алленлэн, У. Андерсонлэн но С. Копполалэн фильмъёссы.
Нимысьтыз висъя «Гарри Поттер», «Властелин колец» но «Звёздные войны» эпопеяосты.

Вера ШТЫКОВА

 

Удмурт Дунне
By Удмурт Дунне Декабрь 22, 2015 13:25