Паймон, кышкан, вормон. В. Путинлэн пресс-конференциез студентлэн синмыныз

Удмурт Дунне
By Удмурт Дунне Декабрь 24, 2015 09:41
паша

Сумкаысьтым «Студент» гожтэмен плакатме поттӥ

Кылем арня вискын Москваын В. Путинлэн 11-тӥ пресс-конференциез ортчиз.  Туэ 1390 журналист аккредитация басьтыны быгатӥз. Азьвыл аръёсын ӵошатыса, тужгес но трос. «Удмурт дуннелэн» корреспондентэз луыса мыным но шуд усиз ужрадэ пыриськыны.

Москвае вуэмме  ӧй шӧдылы

Аккредитация басьтон понна куриськон нырысетӥ нуналъёсы ик келяй. Кема возьмай Кремльысь гожтэт. Берло воксё но киыным шонтӥ, ӧз пӧрмы шуыса, вунэтӥ ни вал со сярысь. 14-тӥ толсуре гожтэт вуиз, мон В. Путинлэн пресс-конференцияз пыриськыны быгато шуыса. Шумпотонлэн пумыз бен вал ик-а, ӧй-а? Кызьы вераны но уг валаськы. Пайми но, кышкай но.

17-тӥ толсуре вазь ӵукна вуи Москвае. Вуоно ужрад сярысь малпаськонъям, ӝыны уй юанме рос-прос радъяны выронъям валаса ик ӧвӧл вуттӥськем вагонын огнам мынэмме.

Пресс-конференция, пе, луоз Краснопресненской набережнойын интыяськем Вуз каронъя калыккуспо центрын. Вокзалысь меӵак отчы мыноно кариськи.

Москваын кезьыт. Ульчаын калык трос. Уже, дышетскон интыязы мыно, дыр. Уйин усем лымыез коммунальщикъёс дыртыса утялто. Нош вуз каронъя центр вӧзын шыпыт. Солань-талань ветлӥсь полицейской машина гинэ адӟиське. Подземной переходын полицейскойёс сыло. Соос ик мыным шонер сюрес возьматӥзы.

Вуз каронъя калыккуспо центр азьын 8 часын ӵукна ик пырыны кузьлэсь кузь черод вал ни. Черодын сылыкум ик, нырысетӥ кизилиез пумитай. «Вести недели» программаез нуись Дмитрий Киселёв ужрадэз радъясьёс пӧлын, лэся — телефон пыр косъяське. Котькуд лыктэм журналистэз металлоискателен чаклазы, котырзэ сканер пыр лэзизы, вань сиён-юонэз куштыны ӵектӥзы. Буфет, пе, ужа — сютэм уд кыле. Аккредитационной бейджъёс электронноесь, соин ик соосты эскерыны трос дыр уг быры.

С. Брилёвен ӵош.

С. Брилёвен ӵош.

Мынэсьтым но юалляськизы

Пресс-центре пырись котькуд иворчи дышем сямъя нырысь-валысь буфетэ кожиз: бутерброд, круассан но пирожки, чай, кофе но минерал ву. Котыр нукыртэм кылӥськиз: алама, пе, сюдо.

Журналистъёс ог-огзылэсь интервью бичазы. Улосъёсысь лыктэм корреспондентъёслэн тодмо иворчиослэсь малпан-веранъёссэс кылэмзы потӥз. Тужгес но жаль потӥз мыным НТВ-ысь Владимир Кондрашов. Камераос, микрофонъёсын журналистъёс, фотографъёс со дорысь 11 часозь ӧз бырылэ. Кызьы чидаз ваньзэ? Пресс-конференцилэсь кутскемзэ витьыса, калык пӧлын Россиысь трос тодмо журналистъёс поръязы: Сергей Брилёв, Ксения Собчак, Антон Верницкий но мукетъёсыз. Туспуктэм лэсьтытэк ӧй чида ни. Чечнялэн Тӧроезлэн пресс-секретареныз Альви Каримовен тодматски. Туж каньыл но огшоры воргорон!

Ужаз нимысьтыз радъям пресс-центр. Компьютеръёсын, принтер-сканерен, телефонэн котькуд журналист ужаны быгатӥз.

Нырысь пайми, тросэз журналистъёс аспӧртэмлыко табличкаосын, йӧспӧртэм дӥсен лыктэмын шуыса. Соос вӧзы иворчиос чечы борды кадь нянясько. Берло гинэ валай: Президентлы юан сётыны луонлык понна вожвылъяськон со. Трос малпаськытэк, сумкаысьтым «Студент» гожтэмен плакатме поттӥ (дышетскисько Казаньысь университетын журналистикая факультетын). Соку ик Норвегиысь журналистъёс вӧзам вуизы. Малы тазьы гожтӥ, кытысь, кин луисько но кыӵе юан дасяй шуыса юалляськизы. Удмурт луэмме тодыса, корреспондент уката шумпотӥз — кышноез фин-угор, эстонка, пе. Берло «Мир», «Первый канал» но «Россия» телеканалъёсысь иворчиос юалляськизы на.

паша3

Президент вӧзтӥм ортчыку, шуак луи.

Пумозяз оски

11 часкын залэ операторъёсты но фотографъёсты лэзьыны кутскизы. Бӧрсязы ми но, корреспондентъёс, пыримы. Удалтӥз кыкетӥ радысь буш инты шедьтыны. Сумкаме отчы куштыса, устозэгес инты утчаны кошки. Нырысетӥ рад быдэсак буш — «резерв» гожтыса, кагаз понэмын. Бӧрысь отчы пуксизы Россиысь но кунгож сьӧрысь тужгес тодмо журналистъёс.

Президентэз возьман улсын нокин дырзэ чик ӧз быдты: иворчиос нош ик ог-огенызы кенешыны кутскизы, туспуктылӥзы. 12 часын залэ пыриз Дмитрий Песков. Соку ик шып луиз.

— Эшъёс, ойдолэ ог-огмес гажалом, интыысь ум кесяське, пресс-конференция мыныку, ум ветлэ, — вазиськиз люкаськемъёслы Президентлэн пресс-секретарез.

Фанфараос шудэм улсын залэ Владимир Путин пыриз. Телевизорысь гинэ ялан адӟыны дышемын бере, Президент вӧзтӥм ортчыку, шуак луи.

Пресс-конференция кутскиз. Нырысь юанъёс сётъязы «кремль пулысь» журналистъёс. Берло ни мукет журналистъёслы но удалтӥз. Пумозяз оски, мыным но шуд усёз шуыса. Владимир Путин но, Дмитрий Песков но ми пала учкылыку, весь «Студент» гожтэмме ӝутыса вози, мед адӟозы шуыса. Ог ӝыны чассэ весь тулкымъяськи — кышкай, лэся, юанме сётыны шугъясько шуыса. Собере дыши.

пресс-конференц1

Пайми, тросэз журналистъёс йӧспӧртэм дӥсен лыктэмын шуыса.

Огъя вераса, туэ пресс-конференциын бадӟым саклык висъяськиз Россилэн мукет кунъёсын кусыпъёсызлы (кылсярысь, Ближний Востокын кылдэм югдурлы). Озьы ик палэнэ ӧз кыльы экономика но. Жаляса верано, туризмен, гурт удысэн, кунмылэн мукет удысъёсыныз герӟаськем юанъёсты журналистъёс В. Путинлы ӧз сётъялэ.

Ужрад йылпумъяськем бере улон азьлолэсь но зол пӧзьыны кутскиз. Телевизионщикъёс меӵак эфире потаны кутскизы, газет-журналъёсын тыршисьёс редакциосы туспуктэмъёс но иворъёс келяны кутскизы. журналистъёс Вуз каронъя калыккуспо центрысь пресс-конференция йылпумъяськем бере 2 час котыр ӧз кошке на.

Юан сётыны ӧз кылды ке но, мылкыд чик ӧз куашка. Таӵе бадӟым ужрадэ вуылон — со бадӟым вормон но шумпотон, малпасько мон.

Павел Вахрушев

Туспуктэмъёсыз авторлэн

Удмурт Дунне
By Удмурт Дунне Декабрь 24, 2015 09:41