33 кино пӧлысь устоез Ксения Ворончихиналэн!

Удмурт Дунне
By Удмурт Дунне Декабрь 22, 2015 13:03
чимали

Ring киноысь суред.

Ижын йылпумъяськиз вакчи фильмъёсъя фестиваль. Ring киноеныз нырысетӥ инты басьтӥз Ксения Ворончихина, Dart газетлэн огез авторез.

Ижысь фестивале пыриськиз 24 автор, оглом 33 уж вуиз. 14-зэ возьматӥзы 20-тӥ толсуре «Дружба» кинокуаын, соку ик фестивальлы йылпумъянъёс но лэсьтэмын вал. Кызьы пусъе фестивалез радъясь Андрей Смирнов, ужъёслэн ӟечлыксы арысь аре будэ. Киноос луо чебергес, нош темаоссы паськытгес. Туэ тросаз яркыт адӟытэмын вал калык культура.

Та фестиваль видео лэсьтӥсьёс понна зэмзэ но дуно луэ. Угось жюри пӧлын тодмо режиссёръёс: Ижысь Лев Вахитов, Павел Зорин, Глазовысь Вениамин Тронин. Со сяна, киноослы нимысьтыз дунъет сётӥзы дуннелы тодмо режиссёръёс: Киевысь Александр Шапиро но Москваысь Александр Сильвестров.

Шумпотымон, вормисьёс пӧлын Ксения Ворончихина. Солэн Ring киноез лэсьтэмын туэ гужем Эстониын фин-угор киноослы сӥзем фестиваль дыръя. Кино мур пуштросо. 5 минут ӵоже камера вырӟылытэк пуктэ одӥг коркаез. Нуназе отысь пото но берен пыро пӧртэм адямиос: пиен ныл, тамак кыскись воргорон, великен ворттылӥсь ныл… Уй вуэ, укноын адско адямиослэн вужеръёссы. Йырын суредъёс берганы кутско: кыӵе сямыз яке малпанъёсыз таизлэн яке соизлэн адямилэн. Тылъёс пумен кысо но, кадрын тём-тём луэ. Ми валаськом: ӵуказе луоз выль нунал, таизлэсь, оло, номырин уз висъяськы ке но.

Та фестиваль видео лэсьтӥсьёс пӧлын выль нимъёсты но усьтэ. Андрей Смирнов, кылсярысь, туэ висъяз Андрей Феоктистовез. Со «Человек, которого нет» кинозэ Ижысь нылпи творчествоя юртысь пиналъёсын ӵош лэсьтэм. Та фильм 3-тӥ луиз. 2-тӥ интыен пусъемын Александр Смакотин «Божик» киноеныз. Гран-при утӥз Андрей Першин «Север-Юг» киноеныз. Таиз видео лэсьтӥсь милемлы тодмо удмурт «Курка, ӵӧж но мукетъёсыз», «Толэзьлэн тусыз» выжыкылъёслы анимация лэсьтэменыз.

Удмурт Дунне
By Удмурт Дунне Декабрь 22, 2015 13:03