Егитъёс ӵектӥзы, кивалтӥсьёс кылӥзы. Удмуртомытӥз-а «Удмурт-а мон?!»

Удмурт Дунне
By Удмурт Дунне Декабрь 16, 2015 13:19

Ижын ортчем «Удмурт-а мон?!» форумысь егитъёс уката удмуртомыса бертӥзы, асьсэды но котырысьтызы дуннеез выль сямен усьтӥзы кадь.

NIK_4163 фото Карипов Э

А. Соловьёвен селфи — синпельлы.

Мон политик луысал!

Ужась удмурт егитъёсты огазеясь, визь-кенешен юрттӥсь площадкаос татчыозь ӧй вал. «Удмурт Кенеш» огазеяськон гужем ужпум ӝутӥз: форум люкано. Удмуртилэн Тӧроез Александр Соловьёв солы дурбасьтӥз, егитъёсын ачиз но пумиськыны мылкыд кариз. Ижысь Эшъяськон юртын егитъёслэн луонлыксы кылдӥз Тӧролы меӵак юан сётыны. Адӟиськиз: квартираос-субсидиос сярысь гинэ пинал калык уг сюлмаськы. Туала егитъёс туж куректо гуртъёсын калыклэн зол юэмез пумысен. Александр Соловьёв ачиз но та ужпум сярысь уг вунэты.  Магазинъёсын уго аракы пӧзьтон аппаратъёсты но шара вузало ни. Соин та ужпум бордын вылӥ кивалтӥсьёс одно ик ужалозы, шуиз. Со дыре ик Александр Васильевич паймемзэ вераз: арлы быдэ котькуд ёросын ӝутӥське стадион, куасэн бызьылонъя база, но егитъёсты отчы кыскыны шуг, ог 20 процентэз гинэ таза улонэн эшъяське. Залэ люкаськем егитъёсты та ласянь малпаськыны косӥз.

Удмурт кун университетын дышетскись Степан Черепанов юаз: мынам улонме политикаен герӟаме потэ, политикае вамыштэмды бере макем воштӥськиз матысь адямиосыныды кусыпъёсты?

— Мон ноку политик луыны ӧй малпалля, — шуиз Тӧро. — Асме умой адямиен лыдъясько вал, но Кун Кенеше быръёнъёс дыръя мыным калык нырысь-валысь ӧз оскы. Быръёнъёсы кыкетӥзэ пыриськыкум гинэ, куара люканы быгатӥ. Тон, Степан, мын политикае, эн кышка, курдыт ӧвӧл. Но котьку тод: тон мукетъёсызлэсь пӧртэм ӧвӧл. Соин ик котьку тыршы умойгес луыны, адямиосты кылзыны. Тонэ бырйизы ке, адямиослэсь эн палэнскы. Куддыръя тодӥсько ке но, шорам кытысь ке из вуыны быгатоз шуыса, калык пӧлысь уг кошкиськы. Нош тӥ, егитъёс, эн кышкалэ. Милемыз воштыны дась луэ.

Свердловск улосысь Антон Тимиршин юаз: чакла-а Тӧро палэнын улӥсь удмуртъёслэсь улэм-вылэмзэс? Александр Васильевич вераз: Свердловск улосысь удмурт диаспораен ӧз на пумиськылы. Но ужрад дасяны косӥз, Выль ар праздник бере вуо, шуиз.

Кылбурчи но кырӟась Богдан Анфиногенов Александр Соловьёвлы удмурт кырӟанъёсын диск кузьмаз. Со дыре ик Богдан удмуртъёс понна бадӟым ужпумез ӝутӥз: «Удмуртия» ГТРК-лэн архивысьтыз удмурт кырӟанъёсты, передачаосты поттыны, соосын егитъёсты тодматыны, ужазы кутыны луонлык ӧвӧл. Тӧро оскытӥз, та ужпумез интыысьтызы вырӟытыны тыршоз шуыса.

— Форум ог-огеныд кенешыны луонлык гинэ уг сёты. Татын адӟиське, маин уло егитъёс. Со сяна, асьсэды но возьмато. Туж потэ, шаермес азинтыны юрттӥсь ӵектонъёстэс шара мед вералоды. Та форумез ойдолэ азьланяз но ортчытъялом. Мыным та ласянь оскыны луэ — дурбасьто, — шуиз Александр Соловьёв.

NIK_4137 фото Карипов Э

Жаляса верано, вань ёросъёсысь егитъёс форуме ӧз пыриське.

Одӥг нунал арез воштэ

Жаляса верано, вань ёросъёсысь егитъёс форуме ӧз пыриське. Куд-огез, оло, малпаз: мар со сётоз? Алнашысь Митрошин кыкто вынъёс верамъя, нырысь та выллем ужрад ёросъёсын радъяно вал, егитъёс интыысь кивалтӥсьёсын мед пумиськозы, югдурзэс мед эскерозы шуыса. Тужгес умой ӵектонъёс сётэм егитъёсты ик Иже нуоно. Но та форум нырысетӥез, соин но валан ӧзгес тырмы на. Котьма ке но ужрадэ пыриськем 50 мурт пӧлысь жалясез вань меда? Воткинскысь Дмитрий Чорыгов шуиз: ас удысам асме шедьтон, ужме шонер радъян, юанъёслы валэктон шедьтон понна мыным ӝыны ар кулэ луиз, нош форуме лыктэм адямиос вань юанъёссылы валэктон одӥг нуналскын шедьтӥзы.

Зэм, «Удмурт Кенешлэн» вице-президентэз Татьяна Ишматова верамъя, тросэз егитъёс кыӵе юанэн кин доры вазиськыны но уг тодо. Уноез уг валало, маин выре Правительство, нош маин Кун Кенеш. Соин но егитъёс понна Кун Кенешын экскурсия радъям гинэ ӧвӧл, вылӥ кивалтӥсьёсын пумиськон но ортчытэмын вал. Кун Кенешлэн Тӧроезлы Владимир Невоструевлы егитъёс анай кылынызы вазиськыны быгатӥзы, тужгес лэчыт юанъёссэс сётӥзы. Кылсярысь, Удмурт кун университетысь вуоно дышетӥсьёс кие нокызьы но уг вуы «Ӟеч-а, бур-а, удмурт кыл!» учебник — соос уг тырмо. Владимир Невоструев та ужпумез эскерыны косӥз нациосын ужан политикая министрез Лариса Бурановаез. Книга тырмымон ӧвӧл бере, сое поттыны эшшо коньдон висъяломы, шуиз Владимир Невоструев. Грак ёрос больницаысь егит специалист Елена Орлова сюлмаське оптимизациен валче роддомзэс пытсан пумысен. Койкаосты кулэсто, ужан инты быре.

— Гуртын медпункт но, нылпи ваён юрт но ӧз луы ке, гурт калык кытчы мыноз? Пытсанэн мон соглаш ӧвӧл. Та ужпумез сессиосын но эскериськомы. Оптимизацияя планэ воштонъёс пыртытэк уз луы. Но югдурез тазьы кельтыны уг яра, — шуиз Владимир Невоструев.

NIK_4103 фото Карипов Э

Кылбурчи но кырӟась Богдан Анфиногенов Александр Соловьёвлы удмурт кырӟанъёсын диск кузьмаз.

Ку выльдӥськоз кыллюкам?

Эшшо ӟырдытгес вераськон пуромиз Кун Кенешысь Наукая, дышетонъя, культурая но егитъёсын ужан политикая комиссилэн кивалтӥсеныз Наталья Судариковаен пумиськон дыръя. Егитъёсын кенешонэ ӧтемын вал дышетонъя но наукая министр Алексей Мирошниченко но культурая но туризмъя министр Владимир Соловьёв.

Таяз пумиськонэ уногес люкаськемын вал удмурт кылъя дышетӥсьёс. Соос мадизы, кыӵе шуг-секытъёсын пумисько котькуд нуналэ. Кылсярысь, туннэ трос вераськиськомы ӟучомем пиналъёсты удмурт кыллы дышетон сярысь. Но со дыре ик берпуметӥез ӟуч-удмурт кыллюкам потэмын ни кылем даурлэн шораз. Пиналъёслы пыӵатэмын ӧвӧл анай кылын лыдӟиськон мылкыд. Художественной литература вань, но нылпи садын но покчи классъёсын дышетскисьёслэсь тунсыксэс бугыртон понна яркыт энциклопедиос кулэ. Со ласянь номырмы ӧвӧл. Асьмелэн ӧвӧл логопедъёсмы но психологъёсмы, кудъёсыз валасалзы пиналэз кык кылын дышетонлэсь аспќртэмзэ. Егитъёс огымысь шуизы: пиналлы пичи дыръяз саклык уд висъяськы ке, бадӟым будэмез бере сое сайкатыны туж шуг ни, нош калыкмес но культурамес утеммы потэ. Кивалтӥсьёс соосты кылӥзы, вань та ӝутэм  юанъёсты одно ик санэ басьтомы, шуизы.

Культура удысэз азинтонъя но ӵектонъёс чузъяськизы. Кылсярысь, калыкез шаеренымы тодматон понна ёросъёсын турмаршрутъёс усьтыны косэмын, но та ласянь дышетон уж уг нуиськы, дэмланъёс но стандартъёс ӧвӧл. Табере матысь дыре та пумысен нимысьтыз семинаръёс радъямын луозы.

Ивор вӧлмытон технологиосын тунсыкъяськисьёсын пумиськизы Нациосын ужан политикая, кышкытлыклэсь утиськонъя, регламентъя но Кун Кенешлэсь ужзэ радъянъя комиссилэн кивалтӥсез Энвиль Касимов но Печатья но ивор вӧлмытонъя агентствоен кивалтӥсь Алексей Воронцов. Егит журналистъёс эскеризы, кызьы удмурт кылэз но культураез калыклы тунсыкогес кароно. Егитъёсты мед кылозы шуыса, валче ужан вылысь кылдытыны ӵектэмын егит журналистъёслэсь коллегизэс.

Ижысь Светлана Галактионова форум ортчем бере вератэк ӧз чида:

— Форуме пыриськон паськытгес учкыны юрттӥз элькунысьтымы шуг-секытъёс шоры. Шумпотымон: кивал-тӥсьёс дась милемыз кылзыны, юаньёсмылы валэктон сётыны. Ас поннам валай: удмурт кылэз но культураез азинтон бордын мон ужаны дась. Форумын асме удмуртэн золгес шӧдӥ. Ужасько косметолог луыса, астэ утялтон ласянь мастер-классъёс ортчытъясько. Азьланяз одно ик мылкыды вань та ужрадэз удмурт кылын нуыны. Кин тодэ, форуме ӧй пыриськысал ке, ку ай сайкасалыз мон пушкын та малпан.

Елена Сараматова

Туспуктӥз Э. Карипов

 

 

 

 

Удмурт Дунне
By Удмурт Дунне Декабрь 16, 2015 13:19