Кизнер каргуртысь Любовь Покушева ас киыныз мунёоос лэсьтэ

Удмурт Дунне
By Удмурт Дунне Декабрь 8, 2015 13:02
Кизнерысь Л. Покушева ас киыныз лэсьтэм мунёосыныз.

Кизнерысь Л. Покушева ас киыныз лэсьтэм мунёосыныз.

«Удмурт нылкышно кенешен» но газетэнымы ялэм «Удмурт ныпъет» вожвылъяськонлэн киужъёсъя, туспуктэмъёсъя люкетаз вормисе потӥз Кизнер каргуртысь Любовь Покушева.

— Удмурт кылын лыдӟиськыны шугъяськисько ке но, газеттэс бускельёсмылэсь учкылӥсько, — шуэ Любовь Николаевна. — Отысь ик синйылтӥ  «Удмурт ныпъет» сярысь  гожтэмез. «Удмурт дунне» газетлы 100 ар тырмонэ но, Гербер празднике Кызьпу арамае, кизнеръёсын ӵош вуылӥ. Сцена вылысен аслэсьтым кылбурме лыдӟи, киужъёсын адӟытонэ вайылӥ Лӧпшо Педунез. Мунёе лэсьтэмын, пластик бутылкаез поролонэн биняса но чулкае поныса. Басьтыны но юасьёс вал. Но мон киужъёсме нокинлы уг вузаськы, кузьмасько матысь адямиосылы, эшъёсылы. Оломар но лэсьтӥсько, урамын пластиклэсь пальма сылэ,  розаос, лилиос будо. Яратӥсько адямиослы шумпотон кузьманы, соин гуртам номыри ик ӧвӧл. Картэ тышкаське, тон понна, пе, вань адямиос братъёс но сестраос.

Любовь Николаевна ужамын вуз карон удысын. Синъёсыз ляб адӟемен, кӧня ке аръёс талэсь азьло солы инвалид группа сётӥзы. Киужен вырыны, лыдӟиськыны, гожъяськыны линзаос, пе, юртто. Л. Покушева — инвалидъёслэн ёрос огазеяськонзылэн ёзчиез, пӧртэм конкурсъёсы пыриське. Улосъёс куспын Оренбургын ортчем ӵошатсконын кылбуръёсыныз дипломант луиз. «Удмурт Кенеш» огазеяськонлэн ёрос ёзаз но со ас адями. Пумен тросгес чузъясько удмурт кылын гожтэм кылбуръёсыз, юморескаосыз. Пыдлось малпанэ вань, пе: «Улонлэн сӥзьылэз» кылбур бичет поттысал. 4-тӥ классын дышетскись Даниил внукезлэн но удмурт кылэз тодэмез потэ, песянаезлэн сямен ик, котьма каремез, котькытчы вуттӥськемез потэ.

Лия Малых

 

Удмурт Дунне
By Удмурт Дунне Декабрь 8, 2015 13:02