Юрий Усков кузьым дуре магазинэ уг ветлы — киужъёсыз пальышало

Удмурт Дунне
By Удмурт Дунне Декабрь 4, 2015 09:01

Эгра ёросысь Зура черкогуртын улэ кибашлы воргорон Юрий Усков. Солэн чебер ӵуж коркаез гурт шорын ик сылэ.

DSCF4549

Ю. Усков киужъёссэ дӥсьтытэк возьматъя.

Усковъёслэн ӟезьы азязы гинэ кожыса вуттӥ но, сьӧрам ик шоро-куспо арлыдо нылкышно вуиз. Юрий Витальевичлэн кузпалыз, пе, мон, «Зуринский» агрокомплексын бухгалтер луыса тыршисько. Ольга Григорьевна нуназеяны шок-пуль бертэ вылэм.

— Ма, мар бен со кибашлы луоз ини, — марлы лыктэмелэсь мугзэ тодыса, возьдаськыса вера нылкышно. — Ваньмыз кадь ик огшоры гинэ улӥськом. Адямиослэн но юртъер котыръёссы олокыӵе но чебер, ӝикыт лэсьтэмын.

Азбарын кибашлы муртлэн кибервылыз адӟиське — укно чильтэръёс, ӧсъёс, кенеръёс, ӟусъёс, тубатъёс вӧлыса но чильпаса мыло-кыдо лэсьтэмын. Нош корказьысь но корка пушкысь киужъёсты адӟыса, эшшо паймоно. Син шоры йӧто чильпаса кадь лэсьтэм шкатулкаос, пуконъёс, пичиесь ӝӧкъёс,  ӟусъёс, комодъёс, карнизъёс, валесъёс но сюсьтыл пуктылонъёс. Борддоръёсы ошылэмын аспӧртэм суредъёс. Соос огшорыесь ӧвӧл, буёлтэк гинэ, пулэз вӧлыса, лэсьтэмын.

Таӵе суредъёсты но мебелез лэсьтӥсько беризьлэсь.

Ольга Григорьевна куно вайисько шуиз но, азямы потӥз востэм гинэ, сабырлы удмурт воргорон. Шӧдӥське, со пичи но ушъяськонэз-мае уг вала, лякыт куараен вераське, дӥсьтытэк гинэ суредъёссэ но лэсьтэм арбериоссэ возьматъя.

— Огшоры дырез быдтэме уг поты, ялан мар ке но выльзэ лэсьтэм потэ. Ма, бен калыклэнлэсь пӧртэмесь ӧвӧл соос, кызьы пӧрме, озьы ик лэсьтӥсько.

Юрий Витальевич вор-дӥськемын Зура черкогуртлэсь 7 иськеме интыяськем Тюптишурйыл гуртын. Пичи дыръяз ик киужен вырем. Зура шор ёзо школаез йылпумъяса, армие кошкем. Забайкальеын кунгожез утем. Бертыса тодон-валанзэ люканы Глазовысь совхоз-техникуме пырем, механиклэсь дипломзэ басьтэм. Отӥяз Юрий Витальевичез школае ужаны ӧтё. Отын со нылпиосты киужлы мылысь-кыдысь дышетэ. Ужан висказ дышетскыны пыре Удмурт кун университетэ, отысь технологияя дышетӥсь луыса потэ.

— Суредъёсты ӝег, дыр, лэсьтоно? Пуэз вӧлыса, сокем чебер арбери пӧрмыты ай, — ушъясько Юрий Витальевичез.

— Таӵе суредъёсты но мебелез лэсьтӥсько беризьлэсь. Со юн но чебер возиське. Нырысь ик вӧлӥсько, собере суред пуктӥсько. Чебер мед луоз шуыса, вылтӥз лакен буясько. Со вераны гинэ капчи, арня но, толэзь но лэсьтоно луэ.

DSCF4555

Лэсьтӥськон уже трос луиз но, коркан люкыт потыны ӧдъяз.

Лэсьтӥськон уже трос луиз но, коркан люкыт потыны ӧдъяз. Соку нимысьтыз мастерской лэсьтӥ, токарной станок басьтӥ. Ужан интые табере вӧл-вӧл, котьмар луэ отын возьыны но, лэсьтыны но, пуктыны но.  Сотэк секыт йӧтысал, вылды.

— Нош таосыз кытысь? — борддоре ошылэм койык сюръёс сярысь юасько.

— Сике ветлонъям олома но шедьтӥсько. Та сюръёсы но отысь ваемын. Пыд улын лошъяськись макеослэсь котьма лэсьтыны луэ.

— Суредъёстэс но мукет лэсьтэм  арбериостэс кытчы ке возьматъяны сётъяды ни-а?

— Кык пол Эгра каргуртэ адӟытыны нуллӥзы. Но мынам суредъёсме отчы сётъяме уг поты ни. Сузмыто, урод каро, лакез ик бырон калэ вуиз ни тани. Ужам ужез тус-тас карем уг поты. Мон яратӥсько соосты кузьманы. Ӵыжы-выжымы бадӟым бере, соизлы но таизлы сётъяса ик, быре. Куное ӧтчакузы, магазинысь утчаськыса ветлонэз ӧвӧл, аслэсьтым лэсьтэм ужме нуиськом но тӥни. Сыӵе арбериослы адямиос туж но туж шумпото. Тани ӝоген Выль ар вуоз ини, нош ик ваньмызлы кузьым кузьмано луоз.

Любовь Тихонова

Туспуктэмъёсыз авторлэн

Удмурт Дунне
By Удмурт Дунне Декабрь 4, 2015 09:01