«Удмурт Кенеш» — Тол бабай ӧвӧл. Дасьсэ возьмано ӧвӧл — аслыд лэсьтоно

Удмурт Дунне
By Удмурт Дунне Ноябрь 11, 2015 08:21

Вуоно арын «Удмурт Кенеш» огазеяськонлы 25 ар тырмоз. Куддыр кылоно: нош мар бордын ужа со, малы кулэ? Та но мукетыз пумысен кенешиськом огазеяськонлэн вице-президентэныз Татьяна Ишматоваен.

ишматова

Берло дыре «Удмурт Кенешлэн» тусыз егитоме.

 

— Берло дыре «Удмурт Кенешлэн» тусыз егитоме. Удмуртлыкез ӝутонэ, огазеяськонэз кылдытонэ пыриськем аксакалъёсын валче сюлмасько-бызьыло егитъёс но. Зэм, адямиос пӧртэм мылкыдъёсын, пӧртэм мугъёсын лыкто. Одӥгез вуэ ассэ кызьы ке возьматон понна, «Кенеш» пыр ӝутӥськыны быгатоз шуыса, малпа. Кыкетӥез удмуртлыкен герӟаськемын, но солы юрттэт, визь-нод кулэ, соин ик пӧламы сюре. Куинетӥез, марзэ-созэ валатэк ик, лыктэ. Ӵемысь озьы луэ: адямиос уг малпало, «Удмурт Кенеш» — со общественной огазеяськон шуыса, сое министерствоосын но ведомствоосын оградэ пукто. Соин но, лэся, «Удмурт Кенеш» шоры удмурт калыклэсь правооссэ утись огазеяськон шоры кадь учко.

Кун структура шоры кадь учкемысьтызы, вань «висёнъёс» понна кыл кутыны ми кулэ шуыса лыдъяменызы ик, жаляса верано, куддыр кыӵе ке ужпум интыысьтыз уг вырӟы ке, туж трос сьӧдзэ огазеяськон вылэ кисьто. Но «Удмурт Кенеш» котьку янгыш меда?

— «Удмурт Кенешлэн» котьку вал оппозициез…

— Пќлазы выль ымныръёс кылдыло ке но, уноез отысь адямиос туннэ но уг вошъясько. Но сокем визьмо адямиос маке радъяны быгатысалзы ке, кемалась радъясалзы ни. Выль огазеяськон кылдытыны вырисьёс но лачак вал ни. Но улон возьматэ: оппозицие пырисьёс ӵем дыръя удмуртъёслэсь кусыпсэс тэшкато гинэ, валче кариськыны уг сёто. Критика понна гинэ керетоно ӧвӧл. Одно малпано: кыӵе уж кызьы воштоз удмуртъёслэсь улонзэс. Мае ке лэсьтыны, оло, капчи, нош кытчы со вуттоз? Митинге, пикетэ потано, шуо милемлы, маке шонертэмез лэсьтӥське шуыса шӧдыку. Но со дыре ик валаны кулэ мукетсэ но. Асьмеос ужаськомы вылӥ кивалтӥсьёслы висьытӥсь пыктосъёсмес возьматон понна но. Пиньёсмес поттаса, мыжыкъёсмес сэзъяса гинэ, улӥмы ке, одӥг  ярамес но бурмытыны ум быгатэ. Туала вакытэ дипломат луытэк ӧвӧл.

Шумпотоно, «Удмурт Кенеш» туннэ вань шуыса. Со быриз ке, малпаны ик кышкано, кинлы калык вазиськоз. Зэм, кин но со шуэ: малы со кулэ, мар со лэсьтэ мынам улонам? Но со котькуд семьяе лыктӥсь огазеяськон ӧвӧл, Тол бабай кадь кузьым но шумпотон уг вайы.

Огазеяськонлэн вань ёзъёсыз ёросъёсын но улосвылъёсын кылдытэмын. Со капчи уж ӧвӧл. Ёз кылдытэм сяна, сое валтыны но кулэ на. Калыкез огазеясь муртэз шедьтӥськом но, солэсь мылкыдзэ куашкатӥсь сюре. Адямиос уго ӝожзэс кисьтыныгес вуо «кенешчиос» доры. Нош общественной уж возиське мылкыд бордын. Огазеяськонлы оско, со сьӧры калык мынэ ке, соку солэн кужымез вань.

Ӵем янгыше уськытыны выро, ляб ужаськомы шуыса. Но ми ужаськомы соин, мар кельтэмын. Трос юанъёс дырыз дыръя сэрттэмын-пертчемын ӧй вал. Котькуд съездын, котькуд конференциын асьмеос выльысь но выльысь ӝутӥськомы удмурт кылэз дышетонъя ужпумъёсты: малы пинал калык уг вераськы удмурт кылын, малы кулэсме лыдмы. Но ваньмыз та удмурт калыклэн гинэ вӧсез ӧвӧл. Быдэс фин-угор дунне тазьы ик лулӟылэ.

0102507

Шумпотоно, «Удмурт Кенеш» туннэ вань шуыса. Со быриз ке, малпаны ик кышкано, кинлы калык вазиськоз.

— Но туж тросэз потэ ук исполком но кивалтӥсь бордысь.

— Соиз шонер. «Удмурт Кенешлэн» тӧроезлэн Игорь Семёновлэн туннэ бадӟым данэз. Вылӥ кивалтӥсьёсын со быгатэ шара вераськыны, пӧськыосмы шоры возьматэ, со дыре ик кызьы вӧсьмес кулэстыны дэмлан сётэ. Игорь Николаевичез ёросъёсын но туж гажало. Со общественной ужен выремын ӧй вал. Но 3 но ӝыны ар ӵоже калык пӧлын ужаса, со адямиослы эшшо но матэгес луиз. «Удмурт Кенешлэн» данэз будэ фин-угор дуннеын но. Игорь Семёнов уго туж пыриське Россиысь Фин-угор калыкъёслэн ассоциацизылэн ужаз, отын аслэсьтыз учконъёссэ но ӵектонъёссэ котьку вера, сое кыло.

Оскон вань, азьланяз но ужмы пӧрмоз шуыса. Кивалтӥсьлэн авторитетэз вань ке, юанъёс ӝоггес сэрттӥсько. «Мон али пуксё, кивалтыны кутско но ваньзэ чебер лэсьто» шуыса вераськонъёслы уг оскиськы. Огазеяськонлэн опытэз бадӟым ни, аслаз сюресэз но учконэз. Удмурт калыклэсь историзэ, культуразэ, кылзэ ӝутон, асьмеды асьмеос мед гажаломы, асьмемыз мед гажалозы — валтӥсь ужпум. Кызьы сое быдэстыны кулэ?

Туала улон проектъёсын вырыны косэ. Туж шумпотӥсько: ми пыр пӧртэм проектъёс улонэ пыӵало. Бадӟым пайда вайиз семьяен герӟаськем «Тангыра» проект. Грак ёросэ потыса, со нимысьтыз адямиослэн коркаосазы пыриз, юрттӥз. Анай-атайёс но нылпиос шӧдӥзы: соос куштэмын ӧвӧл. Соосын пӧртэм удысысь специалистъёс ужазы. «Тангыра» калыклэсь мылкыдзэ ӝутӥз, ӵуказелы оскон кузьмаз.

Али нимысьтыз саклык висъяськомы Ижын улӥсь удмурт пиналъёслы. Удмурт кылъя дышетӥсьёсын кенешыса, удмурт пиналъёсты группае огазеямы. Соос толэзяз огпол дышетӥсьёсынызы ӵош удмуртлыкен но фин-угор дуннеен герӟаськем ужрадъёсы потало. Малпаськомы пиналъёсты Удмуртилэн Тӧроезлэн резиденцияз экскурсие поттаны, историенымы тодматыны. Удмурт театрысь артистъёсын пумиськон лэсьтэм потэ. Урокъёсы, оло, эшшо но бурдъяськыса лыктозы, эшъёссылы адӟем-кылэмзэс мадёзы, соослэсь тунсыкъяськонзэс бугыртозы.

Азьветлӥсь егитъёсты огазеям туж потэ, нимысьтыз форум усьтыса. Кивалтӥсьёслы возьматэм потэ соосты, пиналъёс асьсэос но шара вераны быгатозы проектъёссы сярысь. Егитъёс но шӧдозы, кивалтӥсьёс соосты кыло шуыса. Та малпанэз Удмуртилэн Тӧроез умоен лыдъя. Но туннэ ваньмыз пыкиське уксё борды.

0102532

Асьмеос ке туннэ ӧм лэсьтэ, югдур эшшо секытгес луоз.

— Татьяна Витальевна, макем ӵем тӥледлы вазисько удмурт кыллы дышетӥсьёс программаоссэс но дышетонзэс Прокуратура эскерыны кутскем бере?

— Кышкатэмын дыше-тӥсьёс. Та пумысен Игорь Николаевич Семёнов пу-миськылӥз ни шаерысьтымы валтӥсь прокурорен. Ды-шетӥсьёслы предписаниос гожто федерал перечене сюрымтэ учебникъёсъя. Но со понна визьнодасьлэсь кылзэ юано шат? Со учебникез дэмла Дышетонъя но наукая министерство. Озьыен, предписание но министерстволы луыны кулэ. Тае прокурор вала. Югдур интыысьтыз вырӟыны кулэ. Нош дышетон программаосты њуч кылэ берыктыны косонлы кӧтэз сокем ӝож кароно меда? Утчано югдурысь потон амал. Асьмелэн ужа Дышетонэз азинтонъя институт. Соослэн проектъёссы-образецъёссы вань. Со ласянь умой радъямын Ижысь К. Герд нимо гимназиын уж. «Ми, иське, урок ум нуэ ни» шуыны — тужгес капчиез. Юскиськыны уг яра. Дышетонъя реформаослэсь палэнэ кыльыны нокызьы но ум быгатэ. Программаосты ӟуч кылын гожъяно луоз. Али ужаськомы министерствоен. Кин ке мае ке лэсьтоз шуыса, возьмаса гинэ пуконо ӧвӧл. Адями ачиз азинтӥськыны кулэ. Быдэс дуннелы йыркуръяськыса улыны луэ, дыр, но номыр уз воштӥськы, ачид њечсэ ӧд утча ке.

Жаляса верано, кун кылъёсъя законэ воштонъёс пыртон ужпумез туннэ вырӟытэммы ӧз луы на. Но со юан бордын ужанэз ӧм палэнтэ.

— «Удмурт Кенеш» ӵемгес учкылыны ӧдъяз кадь палэнын улӥсь удмуртъёс шоры…

— Соосты отӥгес карыны нокызьы уг яра. Асьсэды мукет удмуртъёсын лыдъяло ке но, соос но шӧдо асьмелэсь кулэлыкмес. Куддыр куспазы одӥг кыл шедьтыны уг быгато, кытын ке асьсэлы кивалтӥсь бырйыны шугъясько. Пӧртэм ужрадъёс, конференциос радъятэк но, нокызьы уг луы. Палэнысь удмуртъёс но вуыло визь-кенешлы, мӧзмемзэс веськато фестивальёсын. Кылсярысь, Башкортостанын удмурт школа усьтӥзы, сое гимназия карыны медо. Соин валче юанъёссы кылдыло. Арлы быдэ Киров улосысь удмуртъёс доры вуылӥськомы. Екатеринбургын удмурт кылэз дышетонъя воскресной школа ужа. Котькытын фольклор коллективъёс кылдыло, дӥськутсы, репертуарзы асьсэлэн.

Туж потэ удмуртъёслэсь кусыпсэс юнматэм. Огазеяськыса гинэ кужмо луомы. Дырмы ӧвӧл ни ӵуказе нунал шоры учкыны, егитъёс лэсьтозы ай шуыса. Уз. Асьмеос ке туннэ ӧм лэсьтэ, югдур эшшо секытгес луоз. Ас семьяед бордысен ке но кутсконо. Семьямес удмурт карысалмы ке, со туж бадӟым кужым луысал. Семьяяд умой ке, уж но пӧзе уго. Аслыд сюрес мытоно, кинлэсь ке валтэмзэ возьмаса пуконо ӧвӧл.

 Елена Сараматова

Туспуктӥз А. Горбунов

Удмурт Дунне
By Удмурт Дунне Ноябрь 11, 2015 08:21