Dart газет потаз Шаркан ёросысь Ляльшур школае

Удмурт Дунне
By Удмурт Дунне Ноябрь 24, 2015 12:22
0102433,Шарканский район,деревня Ляльшур,школа,дети,ученик

Шаркан ёросысь Ляльшур школаын дышетскись пиналъёс «Школа иворъёс» газет кылдытӥзы.

Dart газет та толэзе потаз Шаркан ёросысь Ляльшур школаын дышетскись пиналъёс доры. Dart газетэн тодматскем сяна, соос асьсэ газетсэс но пӧрмытӥзы.

Ляльшур школаысь пиналъёс паймытӥзы асьсэ быгатонлыкъёсынызы. Соос пӧлын вань суредаськисьёс, гожъяськисьёс, ужрад радъясьёс. Ми вуыку, бадӟым классъёсын дышетскисьёс Helloween-лы тыпыр-тапыр дасясько вал. Нош мукетъёсыз шумпотыса пыриськизы газет лэсьтонъя мастер-классэ.

— Кин ужа редакциын?

— Редактор, журналистъёс, фото лэсьтӥсьёс, — етӥз верало пиналъёс. — Эшшо текстъёсты эскерисьёс, газетэз комьютерен радъясьёс!

Озьы кылдытэмын вал пичи редакция. Пиналъёс асьсэ быгатонлыкъёссыя асьсэлы профессия бырйизы. Озьы валтӥсь редактор луиз Стелла Аверкиева. Кивалтӥсь луонлэсь шӧмзэ со чаляк шӧдӥз, газет лэсьтыку, ужасьёссэ дыртытъяз. Суредаськисьлэн ужаз зымиз Илона Широбокова, таиз ӝог лэсьтӥз нырысетӥ бамлы суред, вуоно газет бамлэсь дизайнзэ радъяз, котькуд материал борды нимысьтыз суред пӧрмытӥз. Журналистъёс Алиса Вахрушева, Аня Северухина, Елизавета Перевозчикова гожъяськизы. Корректор Юлия Князева янгышъёсты тупатъяз. Озьы материалъёс верстальщик доры ӝоген вуизы. Андрей Шахтин чылкыт кагаз вылэ лякылӥз суредъёсты но текстъёсты.

0102435,Шарканский район,деревня Ляльшур,школа,дети,ученик,учитель,преподаватель

Эшшо мукет газет кылдытэммы потэ на.

Быдэс газет ӝыны час куспын пӧрмиз. Валамон, дыр трос ӧй вал, соин ик статьяос пичиесь вал. Озьы ке но газет котыр ласянь лыдӟымон пӧрмиз. Кылсярысь, отысь шедьтыны луоз, кызьы Андрей нырысьсэ скал кыскыны потаз, кин Helloween шулдыръяськонэз радъяз, лыдӟыны луоз Ляльшур школалэн историез сярысь но.

— Тазьы ужаны милемлы туж яраз, — вера Стелла Аверкиева. — Ноку но ум вунэтэ та мастер-классэз. Эшшо мукет газет кылдытэммы потэ на.

Пиналъёс пӧрмытэм газетсэс школа стенд вылэ ошизы. Мукет дышетскисьёс но сое лыдӟизы, тунсыко потэм.

Мария Векшина

Туспуктӥз А. Горбунов

 

 

Удмурт Дунне
By Удмурт Дунне Ноябрь 24, 2015 12:22