Возь вылысь пудоез гидэ пыртон

Удмурт Дунне
By Удмурт Дунне Октябрь 8, 2015 11:25

берекет гидкуазьын

Куд-огез малпа: скалэз гидэ пыртӥд но ужез быриз. Нош кин гидэз тазатоз, кезьыт пырон интыоссэ ӵоксалоз? Тӧлатыны вунэтоно ӧвӧл. Эшшо умойгес луоз, гидын вентиляция юромо лэсьтӥды ке. Зэм, ӟеч кузё гужем ик гидзэ дася. Гидын кезьыт ке, выж вылэ тросгес чылкыт куро вӧлдоно. Сисьмыны-пурысьтаны кутскемзэ соку ик кыедэ куштэ. Отын уго туж трос микробъёсыз. Гидын кезьыт ке, сюролэн кӧлан интыяз ыж гон но вальыны яралоз. Эсьма, вераез но, кунян ваён ёзвиосыз но уз кынме.

Гидлэсь укнозэ но ӧссэ умой луоз лымшор но шундыӝужан пала ӵогыны. Соку кезьыт тӧлъёс ичигес пырозы. Скалэз уг яра уен-нуналэн пеймытын возьыны. Сюлэмыз шуг луыны кутскоз, йӧлзэ уськытоз, ӟызыялоз. Укноды пичи ке, тыл ӝуатыса возе.

Гидын 8-15 градус шуныт луыны кулэ. 2-3 градус ке, скал ассэ шунтыны уг вормы ни. Сием сиёнэз но ассэ шунтыны сяна уг тырмы. Нош 15 градуслэсь уногес ке, пӧся, сиськыны ляб кутске, вырӟылэмез но уг поты ни.
Кезьыт куазен скал туж курадӟе ассэ ачиз шунтыны. Соин ик солы юрттоно. Ческыт суралтэм та ласянь туж пайдаё. Шуныт вуэ одно ик понэ 0,5-0,7 килограмм пызь, 100-120 грамм сылал но 150-200 грамм сакыр. Та суралтэмез нуналаз огпол ке но сётъяно. Со сяна, чылкыт вуэн но люктано.

Пудо татчыозь дышиз возь вылысь вож турынлы. Кӧс турын я куро ӝушезлы секыт медаз йӧты шуыса, соку ик вож турынлэсь люкыны уг яра: турнаса тусяз пичиен пыртано на 1 арня ӵоже ке но. Вӧзаз мукет сиёнэз но будэтоно. Сиёнзэ шуак воштӥды ке, ӝушысьтыз миклофлораез сураськоз, таин пудо борды пӧртэм висёнъёс лякиськозы. Зэм, скаллэн азяз 3-5 килограммлэсь трос сиён пононо ӧвӧл. Но сыӵе дыръя нуналаз 3 пол сюдоно. Ӵемгес но пичиенгес сюдӥды ке, эсьма, ваньзэ сиыса быдтоз, ӝушезлы но каньылгес луоз, пыд улаз но мултэссэ уз лёга.

Скал туж яратэ сезьы куроез: небыт но, клетчаткаез но уно. Сётъяны кулэ силос, сенаж. 1 литр йӧллы 400-500 грамм концентрированной сиён кулэ: комбикорм, посыпка но мукет. Кабачок, тыква, картошка сярысь вунэтыны уг яра. Зэм, таосын гинэ кожаз сюдыны уг яра. Бакча сиёнын уго вуэз туж трос, соин ик бордаз турын ватсано.

Кӧс турын сётэмлэсь азьвыл скалэз люктано. Буш ӝушаз турын вуиз ке, секыт йӧтоз. Ю тысез кожаз сётӥды ке, солэсь нокыӵе толыкез уз луы — ваньмыз берен кыедэн ӵош потоз. Соин ик пызь лэсьтоно яке кӧня ке час ӵоже котыса возёно.

 

скал

Пудо одӥг-кык арня ӵоже дыше гидын улыны.

Скал огдыре ик трос йӧл мед сётоз но чебер мед будоз шуыса, кӧня ке куронъёсты санэ басьтоно:

— одно тодоно скаллэсь секталазэ: котькуд 100 килограммлы 1 килограмм сиён кулэ;

— литр йӧл басьтон понна 0,5 килограмм сиён кошкоз;

— егит пудолы 10 процентлы уногес сиён сёто, солы будыны кулэ на уго;

— гид начар ке, сиён урод ке, пудо лябӟемын ке, сиёндэс 10 процентлы йылтэ.

Мултэс сюдӥськоды шуыса адӟиськоды ке, пудо мырдэм шока ке, сиёндэс кулэстэ. Гидэ пыртӥм, табере ӵукналы быдэ вазь султытэк но яралоз, кыскыны но сюдыны дыртоно ӧвӧл ни, шуо куд-огез. Мылпотэмъя кариськыны уг яра. Скалэз сюдыны но кыскыны дыр тупатоно. Скал сотэк сураське, кызьы йӧл сётыны уг вала ни. Пудо тодыны кулэ: сыӵе-сыӵе вакытэ кузёе лыктоз, сюдоз но кыскоз. Скал та вакытлы дасяськоз. Нош дырез ялан вошъяды ке, со йӧлзэ пумен кулэстоз.

Туспуктӥз А. Горбунов

Удмурт Дунне
By Удмурт Дунне Октябрь 8, 2015 11:25