Сергей Матвеев: Мон дунне вылын огнам сыӵе

Удмурт Дунне
By Удмурт Дунне Октябрь 28, 2015 10:10

Прозаен гожтэм кылбур

 «Сахар» арт-интыын писателен С. Матвеевен творческой пумиськон ортчиз. Вераськон мынӥз авторлэн «Эмезь гурезь» книгаез но туала литература сярысь.

 

Гожъяськон — вӧсь выллем

— Писатель Пётр Захаров весь монэ дышетъяны выре: «Сергей, тон воксё шонертэм гожъяськод. Чеберлыко произведениын, эшшо ик романыны кулэ луыны завязкаез, кульминациез, развязкаез. Со сыӵе аксиома». Пётр Михайлович, шуисько, кин вераз, озьы луыны кулэ шуыса. Мынам ас сямен вераме потэ. Творчествоеным мон асме усьтыны кулэ. Соин ик мон понна нокыӵе катъёс ӧвӧл.

Монъя произведениын ваньмыз радызъя луыны кулэ. Но куддыр потэ ваньзэ сӧрем но со вылын выльзэ лэсьтэм. Сопала-тапала кыстаськонъёсы кисьтӥсько произведениосам. Гожъяськон мон понна вӧсь (святое) выллем, со лулысь-сюлмысь потэ. Мар ке гожтӥськод ке, пушкад кыле буш. Котькуд секунд мылкыд воштӥське. Кисьтэм мылкыд сюлмад уг луы ни, кошке. Соин ик мар мон гожтӥ, со мынам ӧвӧл ни. Мон ноку но уг берытскылӥськы азьвыл гожъямъёсы доры, мынам ӧвӧл заготовкаосы. Кылбыръёсы но, кылсярысь, 5 минут куспын вордско. Асме лад-лад гожъяськисен уг лыдъяськы. Кылбуръёсме яратӥсько, прозаме адӟонтэм карисько. Кылбурын вераны луэ сое, мае быдэс романын возьматыны уг луы. Кылбурез мон золгес дунъясько. Вылӥ литература — со поэзия.

«Эмезь гурезь» — роман-рефлексия

— «Эмезь гурезь» — со эксперимент, шудон выллем, улон кадь ик. Мед со луоз автобиографичной. Та произведениез роман-рефлексия ниманы луоз. Герой — шӧдӥсь-валась адями, пушказ бугыръяське. Со люкиське яратоно кышномуртэныз, тодаз вае, кыӵе умой вал солы яратонэныз. Герой сое воштыны турттэ лыдӟиськонэн, мукет нылъёсын. Но вала, яратонэз номырин воштыны уз луы, со одӥг гинэ. Книгалэн пумаз геройёс пумисько: оскон кылдэ, соос азьланяз огазе луозы шуыса. Романэлэн вылбамыз мыным туж кельше, гожтослэсь пуштроссэ усьтэ.  Геройлэн сюлмаз, коӵышлэн тусаз кадь — мӧзмон. «Эмезь гурезь» мон шуысал матын «Шузилы».

Литературовед Виктор Шибанов шуиз: авторлэн малпанэз котьку шонер. Автор нимаз ке гожтэмзэ роман, со, иське, роман, 3 бамо ке но, роман. Та веран сюлэмез буйгатэ. Нош тазьы учкиськод ке, кыӵе со роман. Кылбуран. Западын али туж лыдӟымон пичи  романъёс. Западысь писательёс произведениязы уг тыршо пыртыны инкуазь суредъёсты, гожто действиез: геройёс пумиськизы, чупаськизы, валесэ выдӥзы. Али улон сыӵе, ваньмыз чаляк вошъяське.

марина прокопьева

Интернетын «Эмезь гурезь» книгалэн вылбамезлы тужгес устоез суред конкурс ялэмын вал. Вормиз М. Прокопьева.

Лыдӟиськон — шокан

Лыдӟиськытэк улыны уг быгатӥськы, сотэк мыным шоканы секыт. Кельшо капчи лыдӟиськись романъёс но туж секыт кылын гожтэмъёсыз но. Кылсярысь, Марсель Пруст, со дыре Джеймс Джойслэсь «Улисс» романэз.  Мон быдэсак лыдӟи Библиез, Коранэз но «лисъяно» на. Алигес аслым усьтӥ Ромен Гариез, француз кылын гожъяськись писателез, ачиз еврей. Со Гонкуровской премиез 2 пол басьтӥз, таӵеос ӧвӧл ни.

Туала егитъёс тунсыко творческой улонэн уло, трос гожъясько, но гожъямъёссы пӧлын туж трос жуг-жагез. Удмурт литература сярысь верад ке… Елена Миннигараева веросъёссэ ваиз. Ужъёсыз пӧртэмесь, жанръёсъя но. Пӧлазы вань веросъёс, фэнтэзи, детектив. Семьяез вань бере паймоно, кытысь со  гожъяськыны дыр шедьтэ на. «Удмурт дунне» газетын ужасьёлэн книгаоссы туэ потӥзы. Шӧдске, соос чаляк лэсьтэмын шуыса. Мыным кельше, кызьы Лия Малых гожъяське, но туж традиционно. Галина Савина лэчыт визьмо кадь потӥз, но ужъёсаз штрихъёс гинэ лэсьтэмын, ужпумъёс ӝутэмын но быдэсак усьтэмын ӧвӧл. Та ласянь серьезнойгес Елена Сараматова. Но со егит на, соин ик веросъёсыз ылё-кырсёесь.

Берло дыре книга поттон понна нимысьтыз коньдон утчано луэ. 10 пала книгаосы пӧлысь, 2-эз гинэ, «Удмуртия» книгапоттонилэн планаз пыртыса, лэсьтэмын. Берлооссэ поттыны Финляндиысь Кастрен нимо общество юрттӥз. Озьы трос усто книгаос лыдӟисьёссэс уг адӟо. Тузонӟыса кылле Римма Игнатьевалэн «Игнаш сайкем» романэз. Мукет ласянь, уже кутыны луэ Интернетэз. Француз Аньес Мартен блогаз гожъяськыны кутскиз. Сое кин ке синйылтӥз но, гожъямъёссэ книгаен поттӥз. Али солэн 3 романэз, мон соосты лыдӟи ни.

Ачим али выль романме йылпумъясько — 70 процентэз гожтэмын ни. Таиз роман кышноослы кузьым — чигвесь выллем луоз.

 Мария Векшина

Удмурт Дунне
By Удмурт Дунне Октябрь 28, 2015 10:10