Сергей Есенинлэн вордскемез дырысен — 120 ар

Удмурт Дунне
By Удмурт Дунне Октябрь 28, 2015 10:21

IMG_1861Дано ӟуч кылбурчилэн С. Есенинлэн вордскемез дырысен 120 ар тырмиз.

А. Блок доры йыгаськись луиз. Писатель ӧссэ усьтэ но, азяз сылэ зарни баблес йырсиё пияш. Со, йырзэ вылӥе ӝутыса, шуэ: «Сергей Есенин, егит поэт!» Озьы егит Сергей Рязань губерниысь Константиново гуртысьтыз нырысь Москвае, собере Петербурге кошке, литература улонэ зыме.

Аръёс ортчыса, Сергей эрико но яркыт сямыныз Петербургын гинэ ӧвӧл, быдэс дуннелы тодмо луиз. Со вань сюлмыныз яратӥз Америкаысь эктӥсь нылмуртэз, Айседора Дунканэз.

Литератураез эскерисьёс ченгешо: кин С. Есенинлэн лирической героез — гуртысь шыпыт кылбурчи я городысь бунтарь? Кылбурчи ӧз мыны одӥг имажинизм ӧретӥ, ӧз тэры вакытлэн кабъёсаз. Лулэзлы кулэ вал паськыт тэльёс, юзмыт омыр. Соин, вылды, городэ вуыса, Есенин выйылӥз кудӟон зарезе. Нош гуртэ вуыса, пияш паймылӥз инкуазь суредъёслы, но ӧз буйгалля: гуртоос шудоесь, но соос уг кыстӥсько азьлане.

С. Есенин будӥз но гожъяськиз улон воштӥськон вакытэ — революция, граждан ож. Ваньзэ тае со сюлэмыз пыр поттылӥз, адӟылӥз, кызьы солэн вордскем музъемез висиз. Соин сэрен ачиз но сюлэмшугъяськылӥз. А. Дункан С. Есенинэз утьыны выриз — кунгож сьӧры интыяськыны но курылӥз. Но Есенин кема ӧз быгаты улыны вордскем шаерезтэк, мӧзмон сое сииз но, кылбурчи выльысен берытскылӥз Россие.

Над окошком месяц

Вылласянь толэзь потэ,
Улласянь ыртӧл пельтэ,
Нош тополь дӥсьсэ кылем:
Вылтырыз — азвесьпыръем…
Кытын ке тальянка
Туж бӧрдэ — каръян кадь,
Кыӵе кыдёкын со,
Нош сыӵе матын кадь…

Я бӧрдэ — жалян куре,
Я серем каре — горе.
Беризе, тон кытын?
Пересьмид, лэся, тон.
Мон куке ачим но
Кыскалляй тальянка,
Туганэ доры но.
Ӵошен дыртӥськом вал…

Нош туннэ шорам но
Гажанэ уг учкы.
Кырӟанэ уг шунты
мӧзмись сюлэмме.
Кытын ке тальянка
Туж бӧрдэ — каръян кадь,
Кыӵе кыдёкын со…
Нош сыӵе матын кадь…

Клён ты мой опавший

Туж дӥсед узыр вал,
Марлы куштонэз вал?
Уть, йӧӟектэмед нош!
Жоб куазен уг шудо…

Яке мар адӟид-а?
Яке — мар кылӥд-а?
Оло, гурт сьӧры-а
Тӧлскыны потӥд вал?

Кудӟем возьмаськись кадь,
Луд шоры потӥд но,
Букосэ гуштӥд но,
Шат пыддэ кынтӥд-а?

Эх, туннэ ачим но
Мон йыромем мурт ук.
Бертэме мар ке но
Юонысь уг луы.

Яке бадьпуэн мон,
Я пужым дорын мон…
Тол жобаськемъя но
Гужемез кырӟай мон.

Нош асме ачим ай
Мон бадяр кожай кадь,
Но — гольык ӧй малпа,
Вож, таза — кожай кадь…

Кытын возьытэ вал,
Кызьпуэз — шузи но! —
Мурт кышномуртэз кадь,
Ӟыгыръяй соку мон…

В этом мире я только прохожий

Сюресчи гинэ та дуннеын мон.
Мыным шоналты тон капчиен,
Кызьы пальпотылэ уй толэзь но
Бер сӥзьыл — туж либыт тылсиен.

Нырысьсэ шунскисько толэзьлэсь мон,
Нырысьсэ мон шунай салкымлэсь.
Выльысь — вуж яратон; оскисько нош
Мон солы, мар уз лу ни выльысь.

Кин янгыш нош отын — шӧг дыръёс-а?
Луоен сылалтэм кыршалъёс?
Кинлэн ке погмаськем ныллыкез-а?
Кинлэн ке туж тодмо мӧзмемез?

Со понна — нокинлэсь но уг ваты:
Асьмеос ӵош ӧвӧл ке но — ӵош,
Яратӥм одӥг кадь тонэн валче
Та одӥг шаермес улытозь.

Отговорила роща золотая

Зарни дӥсен, шулдыр кырӟанъёсын
Келяз кызьпу арамаед гужем дырзэ.
Тури уллё сьӧрло лобон висказ
Уг ӧкыны, уг учкы ни берзэ.

Октэм-калтэм лудын мон сылӥсько огнам,
Нуэ тӧл палэнэ туриосыз…
Ортчем дыръёс сярысь ке но малпан сюлмам,
Мыным но жаль ӧвӧл ортчемъёсыз.

Тросэз со юнме вал ке но, жалез ӧвӧл,
Лулы бусӥр? — нош мар жалез отын?
Горд палэзьпу, тылскем кадь — гом ӝуа садын,
Но нокинэ уг быгат шунтыны.

Нош кылъёсме пазяз ке тӧл, жагез сямен,
Ӵужиз ке со, погмаз ке огазьын,
«Нош арама вал, — шуэ тӥ, — зарни сямъем,
Тӧлӟиз но со мусо кырӟанъёсын»…

С. Есенинлэсь кылбуръёссэ удмурт кылэ берыктӥз Юлия Разина

Анна Снегина

Поэмаысь люкетэз удмурт кылэ берыктӥз 1981-тӥ арын Николай Байтеряков

Тани нош ик Криуша…

Куинь ар
Мон ӧй вуылы тапала.
Ӵук ӟардон лыз бутьмар*
уськытэм музъемлэн гадь вылаз.
Уг уты урамын пуны —
Бен мае-о татын утьыны?
Му вылэ лаптӥськем начар гурт,
Нош коркан вань байлык —
пурысь гур.
Но Пронлэн корказяз — адӟисько —
Пиосъёс ӵашето, бергало.
Выль закон котырын верасько,
Ӟег дунэз куспазы тэргало.
«Ӟечбуресь!» —
«Пӧйшурась?!
О, чырткем!
Я-ко, лык,
Ӧжыт пук милемын!
Учкы, тод, кудпала берытске
Та крестьянской милям улонмы.
Кыӵе, ма ини Питер карын?
Министръёс но тодмо, дыр, тыныд?
Тодӥськом ведь, бай мурт котырын
Тон дышид улонэз валаны.

Но тонэ ми ум тэргаське чик,
Тон котьку дурбасьтӥд милемлы.
Ушъяськон йылолэд но ичи,
Сюлэмдэ но уд вуза муртлы.
Тон крестьян калыкез валаськод,
Тӥнь соин вераны куриськом:
Я бен ку байёслэсь музъемзэс
Крестьянлы сётозы ни зэмзэ?
Милемлы шуо: вите ӧжыт,
Ӧз на ву, пе, солэн вакытэз.
Ма понна бен соку лек ожын
Быдтӥськом асьмемыз но муртэз?»
Мон адӟи: валантэм мыняса,
Пиосъёс мон шоры учкыло.
Улонэз мон ӧй ву валаса —
Соослы туннэ ма верало?
Ӟукыртэ но лэйка
Вуж корказь.
«Кин со Ленин?» —
Кылӥ пель сьӧртӥм.
Соку мон
Туж каллен шыпыртӥ:
«Ленин — со тӥ».

*бутьмар — камали, азвесь уксёосын лента.

Туспуктӥз Вера Штыкова

Удмурт Дунне
By Удмурт Дунне Октябрь 28, 2015 10:21