«Палэзян» концертын тузон пурӟиз!

Удмурт Дунне
By Удмурт Дунне Октябрь 28, 2015 13:51

«Палэзян» фестиваль шаерамы 5-тӥ арзэ пумитаз дуннеысь фин-угор калыкъёсты.

Одӥг пуры

— Фин-угор калыкъёс пӧртэмесь кылынызы, дӥськутэнызы, кырӟан-эктонъёсынызы, но соос, палэзь емышъёс кадь, одӥг пурые бичаськыса, уло, — вера элькунысьтымы Эшъяськон юртысь фин-угор ёзэн кивалтӥсь Андрей Прокопьев. — Выжы калыкъёслы Эстониын нимысьтыз саклык висъяське ни 1929-тӥ арысен. Отын таин герӟаськем кун нуналзы но вань.

Асьме дорын нош сямлы пӧрмиз «Палэзян» фестиваль. Ужрадэз лэсьто элькунысьтымы Эшъяськон юрт но Нациосын ужан политикая министерство. Туэ со 5 нунал кыстӥськиз. Шаерамы вуылӥзы Венгриысь, Марий Элысь, Комиысь, Эстониысь кырӟась-верасьёс. Трос пӧртэм ужрадъёс ортчизы: куноос тодматскизы удмурт культураен, асьсэ сям-йылолъёсынызы тодматӥзы.

палэз

Шаерамы вуылӥзы Венгриысь, Марий Элысь, Комиысь, Эстониысь кырӟась-верасьёс.

Коллективъёс вуылӥзы Ижысь пӧртэм школаосы, Кузебай Герд нимо гимназие, нылпиослы сӥзем «Разгуляй» фестивале. Эшъяськон юртын ортчиз палэзь сиён-юонъёсын тодматскон ӝыт. Вань мылкыд карисьёс «Эктон коркан» дышетӥзы фин-угор эктонъёсты. Со сяна, пӧртэм сям-йылолъёсты но кырӟан-эктонъёсты адӟыны луиз, фин-угор калыкъёслы сӥзем календарен тодматскыку. Сое поттӥз удмуртъёслэн «Удмурт Кенеш» огазеяськонзы.

Вуылӥз король

сету

Сету «Хыбехал» ансамбльысь воргоронъёс кутӥзы кышнооссэс но круген вальс эктыны кутскизы. Уяса кадь, гань-гань.

Фестиваль йылпумъяськиз бадӟым концертэн. Фин-угор ансамбльёс трос ӧй вал, соин котькудӥзлы тырмыт дыр висъяськиз. Озьы учкисьёс эктон-кырӟанъёссы пыр калыкъёслэсь сямъёссэс ӟечгес валаса вуттӥзы.
Тани сцена вылэ потӥз сетуослэн «Хыбехал» ансамбльзы. Воргоронъёс кутӥзы кышнооссэс но круген вальс эктыны кутскизы. Уяса кадь, гань-гань.

Крезьгуразы шӧдске ӟуч гуръёслэн веттаськемзы но. Жаляса верано, сетуос ӧжыт ни. Россиын соос уло Псков, Ленинград улосвылъёсын. Эстониын Сетумаа карын. Верасько эстон кыллэн выру диалектэныз — асьсэ кылзы ыштэмын. Та калыклэн вань туж тунсыко сям-йылолэз — гуртэн кивалтэ король. Одӥгаз ужрадын та сярысь веразы но, «Хыбехал» ансамбльысь воргорон кеськиз: «Мон король вал!» «Хыбехал» кыл удмуртэ «азвесь» шуыса берыктӥське. Сетуос, удмуртъёс кадь, азвесь манетъёслэсь лэсьтэм уксётӥрлык нулло, нош солэн гадь шораз ик тусьты выллем маке юнматэмын. Азвесьлэн жин! ваземез урод кужымъёсты улля.

Гань-гань сетуосты вошто задор поръёс. Отысь Роза Искакова кырӟась асьме Марина Галичанина выллем. Йошкар-Олаын, пе, сотэк одӥг концерт но уг ортчы. Сцена вылын кырӟакуз, со быдэс спектакль пуктэ: мышказ эктӥсьёс тэтчало, сяськаен воргорон дораз потэ, синмаське… Оглом, гольтрес, кызьы ярато поръёс.

«Эрвел Мари» ансамбль нимысьтыз саклык висъя шундыӝужан поръёслэн эктонъёссылы. Но берло дыре репертуаразы луговой но горной поръёслэн но мукет фин-угор калыкъёслэн эктонъёссы пыртэмын. «Эрвел Мари» асьме «Чебеляй» выллем.

— Туэ милемлы 26 ар тырме, — вераз ансамбльлэн кивалтӥсез Тамара Дмитриева. — Мыным кельше, удмуртъёс вашкала кырӟан-эктонъёсты утьыны быгато шуыса, милям соос эстрадалы матын каремын.
Поръёслэн вашкала кырӟан-эктонъёссы вӧсяськонэн герӟамын. Соин сэрен соос уг выжо сцена вылэ.

0101944,фестиваль Палэзян,гимназий имени Кузебая Герда

Нюлэсо Коми шаерысь фестивале вуиз кырӟась Анна Немчинова.

Но шудонъёссэс, тапыртонъёссэс сцена вылысь адӟыны луэ ик. «Туге мо?» («Озьы-а со?») — ог-огзы вискытӥ котыръяськыкузы, кеськозы пиос, «Садге шол!» (Озьы!) — вазёзы нылъёс но кутскозы лулысь-сюлмысь тапыртыны. Та такмакъёслэн пумзы ӧвӧл, кин кызьы кырӟа…

Нюлэсо Коми шаерысь фестивале вуиз кырӟась Анна Немчинова. Со лэзиз уйпал комиослэсь сюлме пырись гуръёссэс. Вакчияк валэктӥз:

— Коми калыкез котьку котыртӥз узыр инкуазь, культураямы со туж умой адӟиське. Таиз кырӟан пи но ныл сярысь. Будӥз чебер кыз, нош гуртын улӥз котырес бамо мусо нылаш. Пияш мынӥз кызэз коралтыны, но ӧз быгаты, со нуналэ ик мынӥз чебер нылашез кураны, но нылмурт «уг» шуиз. Дыр ортчыса, со кызэз мырдэм-мырдэм коралтӥз, но солэн пушкыз сисьме вал ни, нылмурт но солы бызьыны соглаш луиз, но солэн сюлмыз висе вал ни.
Залын пукисьёс кырӟанэз гурызъя удмурт «Ой, тӧл тӧла» калык кырӟанлы кельшытӥзы.Венгриысь «Юхош» ансамбль аслаз творчествояз уте Румыниысь мадьяръёслэсь (чанго) вашкала кырњан гуръёссэс.

Венгриысь «Юхош» ансамбль аслаз творчествояз уте Румыниысь мадьяръёслэсь (чанго) вашкала кырӟан гуръёссэс.

Шудэ юрист но программист

Ваньзы пӧлысь висъяськиз мадьяръёслэн «Юхош» ансамбльзы. Пӧртэм крезьгуро инструментъёслэн куараоссы — цистра, кобыз, скрипка, барабан — огдыре чузъяськыса, паймымон крезьгур кылдытӥзы. Нош солистказылэн кырӟамез микрофонтэк но быдэс зал тыр чузъяськысал кадь. «Юхош» ансамбльысь усточиос уло Венгриысь Копошвар кар котырын. Быдэсто Румыниын улӥсь венгръёслэсь (чанго) кырӟанъёссэс но гуръёссэс. Котькудӥз усточи пӧртэм ужъёсын выре, пӧлазы вань агроном, вуоно юрист, программист, физик. Но Копошварын соос 4-тӥ арзэ «Эктон корка» выллем ӝытъёс ортчытъяло. «Юхош» ансамбль данъяське аслаз крезьгурчиеныз Хуши Дьулаен. Венгриын со тодмо цитера (куско крезьлы кельше), кобыз (кубызлы маиныз ке укша) лэсьтэменыз. Ансамбль та фестиваль дыръя Кузебай Герд нимо гимназиын концерт сётӥз, потаз Кияса ёросысь Уддяди гуртысь «Инвожо» но Уськыр пор гуртысь «Канде Кава» ансамбльёс доры.

Удмуртъёс но фестивальын кужмо кырӟасьёссэс, ансамбльёссэс возьматӥзы. Битбокс (куараен кылдытэм крезьгур) улсын егит кырњась Катерина Кенӟали быдэстӥз удмурт калык кырӟанэз. «Эктон корка» студиысь эктӥсьёс улын тузон ик ӝутскиз. Нош фестивальлы бадӟым точка пуктӥз «Айкай» ансамбль. Калык фин-угор эктӥсь-кырӟасьёслы султыса чабиз.

Мария Векшина

Туспуктэмъёс Александр Горбуновлэн

но Наталья Дмитриевалэн

Удмурт Дунне
By Удмурт Дунне Октябрь 28, 2015 13:51