Ижысь ипподромын «Зарни сӥзьыл» ярмарка ортчиз

Удмурт Дунне
By Удмурт Дунне Октябрь 27, 2015 12:50
0102093,сельскохозяйственная ярмарка,торговля

Ярмаркае вузъёссэс вуттӥзы шаерысьтымы райпоос, эштосъёс, нимаз ужбергатӥсьёс, сад-бакча возисьёс.

Отын 180-лэсь ятыр азбаръёс усьтӥськизы.

Ужрадэз усьтонэ вуылӥзы Кун Кенешлэн Тӧроез В. Невоструев, Удмуртиысь Правительстволэн кивалтӥсезлэн воштӥсез С. Токарев, гурт удысъя но сиён-юонъя министр А. Прохоров.

Ярмаркае вузъёссэс вуттӥзы шаерысьтымы райпоос, эштосъёс, нимаз ужбергатӥсьёс, сад-бакча возисьёс. Котькудӥз котырзэ чеберматыны тыршем: кин ке емышъёслэсь мунё пӧрмытэм, кин ке, пу валэз уробое кыткыса, бакча сиёнзэ адӟытыны поттэм. Нош басьяськисьёс тодо: вузъёссы, чебер сяна, чылкытэсь, ческытэсь но.

Ижысь Малыхъёслэн семьязы сӥзьыл базаре арлы быдэ ветлэ, котьку сямен нылпиосынызы, нуныкаосынызы валче. Туннэ но картош, кубиста, курег пуз басьтӥллям. Татысь вуз карисьёслы оскиськом, шуо.

Яр ёросысь Богдановъёс таӵе ужрадэ арлы быдэ пыриськыло — вуз карыны потто чечызэс. Гулбечазы со ӝегаса уг вутты, пе. Мушъёссы туэ сьӧдчабей, беризь мӧльлэсь чечы люкаллям.

0102124,сельскохозяйственная ярмарка

Сьӧлта ёросысь райпо арлы быдэ базаре бакча сиён, луло карпъёс вуттэ.

Сюмси ёросысь Наталья Шанина сӥзьыл базаре нырысьсэ пыриськисько шуэ. Нюрмульыен вуз каре, сое ачиз ик тэльысь бича. Городын улӥсьёс вӧзтӥз гочатэк ортчыны уг быгато.

Сьӧлта ёросысь райпо арлы быдэ базаре бакча сиён, луло карпъёс вуттэ ке вал, кыкетӥ арзэ сьӧраз гур но вайылэ. Азбар котыразы черод люкаськиз: адямиос чидатэк возьмало пӧсь табаньлэсь гурысь потэмзэ.

Юкаменскысь райполэн азбараз, кубиста, ӵужкушман, картош, чорыг сяна, поттэмын веникъёс: кызьпулэсь, сусыпулэсь, ньылпулэсь. Вӧзазы ик эмъюм луись турын-куаръёс.

Ангелина Снигирёва

Туспуктӥз А. Горбунов

Удмурт Дунне
By Удмурт Дунне Октябрь 27, 2015 12:50