«Эмезь гурезь» — 2-тӥ «Шузи»?

Удмурт Дунне
By Удмурт Дунне Октябрь 28, 2015 13:08

С. Матвеевлэн «Эмезь гурезь» роман-арбытэз потэм бере, литератураен тунсыкъяськисьёслэн мылкыдзы бугыръяськыны ӧдъяз. «Чорыглэсь лушкамкылбуранъёсыз» бере, тросэз лыдӟисьёс писательлэсь котыр ласянь ӟеч романзэ возьмазы, нош кылдӥз 2-тӥ «Шузи». 

Чеберъятэк но чеберъяськытэквахитова

 «Удмурт дунне» газетысь кыл кутӥсь секретарь:

— Автор геройзэ — Андрей журналистэз —  вуттэ сыӵе учыръёсы, кудъёсаз ачиз куке но шедьылӥз. Удмуртъёс Ижын трос ӧвӧл бере, книгаосын поттылэм адямиосты, нимзы воштэмын ке но, лыдӟемъя тодмано.

Кылсярысь, герой Удмуртиысь Писательёслэн союззылэн кенешез сярысь вераське кылбурчи эшеныз, ваньмыз персонажъёс син азе сыӵе яркыт пуксё — одӥг кылыз но будэтыса верамын ӧвӧл кадь. Яке «Узы-боры» кино учкыны эш утчаса, герой мобильникысь фамилиосты «лисъя» — нош ик тодмо нимтулъёсты вера. Шурдыт ик писательлэн тодмоез, эшез луыны, шӧдтэк шорысь романэ шедёд…

Романын огъя сюжетэз ӧвӧл бере, лыдӟисез кыскон понна, вылды, автор валес сценаосты трос пыртэм. Валамон, эротикалэн но порнографилэн кусыпсы чильпырась, гожез выжыны кема ӧвӧл. Но автор кыкетӥез пала укыргес шонтӥське. Дартэз зол вал, вылды, ӧз вала ни чеберлык сьӧры потэмзэ.

Тросэтӥ интыосын вунӥллям шонер гожъяськон правилоос, стилистикалэн кабъёсыз. Куд-ог кылъёс но шонер кутэмын ӧвӧл, кылсярысь: «Оло, киысьтым бордюрме со (пуны) бодылы укшатӥз но, бодые сое кышкатыны чакламын шуыса, йырыз кур луиз; ас понназ малпаз, дыр: «Сӥзьыл сапрес куазен мон сютэм бызьылӥсько, нокин жалясез ӧвӧл монэ, нош таиз амади (мон, иське) вылаз ик бодыен урттылӥське на!» Урттылӥськыны — со чагиськыны. Кызьы урттылӥськод бодыен? Бодыен урско, шонасько, кышкато… Жаляса верано, роман печатламын, редакторъёс но корректоръёс адӟылытэк — со произведенилэсь данзэ уськытэ. Со вакытэ ик автор туж быгатэ выль кылъёс малпаны — туала улонлэн модаезъя. Со кылъёс контекстысь валамон луо, удмурт кыллэн кабъёсызылы тупало. Шуом, «…пичи куш шорысь… адями йыр мычиськиз; со йыр вылын — керттэм изьы, йырлэн ангесыз — тушаськемын…» Тушаськемын — туш потэмын, иське.

Тырмымтэосыз вань ке но, роман лыдӟиське пумозяз. Малы ке шуоно гожтэмын лулысь-сюлмысь, чеберъяськытэк но чеберъятэк, озьы, кызьы вань улонын — адямиосын, учыръёсын, янгышъёсын.

Бадӟым кылбур

дмитриеваЛитературовед:

— «Эмезь гурезез» мон роман ӧй шуысал, со документальной жанрлы — дневниклы — тупа. Автор улонэз вылтӥз гинэ басьтыса возьматэ, пичияк лэчыт синйылтэтъёс (наблюдениос) гожтэмын ик, но соосты сэрттон-пертчонлэсь со пега. Валтӥсь интыын — адямилэн мылкыдыз. Огъя вераса, «Эмезь гурезь» — со бадӟым кылбур.

Валтӥсь интыын — вӧсь луон мылкыдэз возьматон. Герой, кышноезлэсь люкиськем воргорон, огназ кылеменыз сэрен курадӟе. Со сирота, кыӵе ке мугор люкеттэк сӧсыр мурт выллем. Автор уг гожты, кыӵе муген герой пал кылиз, но романэз лыдӟем бере валаськод: со уг адӟы азьвыл кышнозэ адямиен. Малы ке со тодаз уг вайы яратоно нылкышноеныз лулысь-сюлмысь диалогъёсты… Алёна со понна — пичи лул, кудӥз шумпоттэ чеберлыкеныз но нылкышно луэмез.

Тунсыко, роман туала удмурт интернет-словесностьлы матын шуыса. Геройлэн городысь транспортын нуналлы быдэ ворттылэмез сярысь лыдӟыкум, тодэ лыктӥз Удмурточка блогерлэн Ижкарысь 12-тӥ автобусын мынон-ветлон сюресэз сярысь гожъямъёсыз. Матвеев нуналысь нуналэ мынӥсь улонмес пусйись интернет-авторъёсын шӧдтэк шорысь огкылысь кадь луиз.

А-ля блогер

даралиБлогер:

— С. Матвеев нуйтӥськись улон сярысь гожтэ, сыӵе адӟонзы огшоры городын улӥсь сюрс удмуртъёслэн. Валтӥсь герой уг ветлы Лёша Шкляевез кылзыны, филармоние концертъёсты адӟыны. Мон шуысал, С. Матвеев литератураын выль амал шедьтэ — гожъяны огшоры улон сярысь. «Сиськи, миськтаськи, инстаграме пырай, контактын статус гожтӥ» выллем. Угось удмурт литератураын пӧртэм кыл шудонъёс, аляктонъёс акылтӥзы. Огласянь, роман туж умой возьматэ удмуртъёслэсь туннэ нуналзэс, мукет ласянь, удмурт сяммес возьматӥсь роман сое шуыны уз луы. Нуисько мон аслэсьтым блогме, потэ ке лыдӟе, потэ ке эн, вера кадь герой.

Яратон сярысь

арекееваПедагогика наукаосъя кандидат:

— «Эмезь гурезез» яратон сярысь романэз кадь лыдӟи. Бадӟым, зэмос яратон сярысь – оло со улонын одӥг пол пумиське. Котькӧня галинаос, оксанаос, наташаос мед луозы валтӥсь герой вӧзын, но сюлмаз, визьмаз, мылкыдъёсаз Алёна гинэ. Геройлэн но Алёналэн кусыпъёссы сярысь  лыдӟыку, йыре лыктэ малпан, кудзэ мадись мурт ачиз но шарая: «…малы та вакчи гинэ, пичильтык гинэ улон дыр кесэгамы, туж-туж яратыса но, кык сюлэмъёс, кыӵе ке шузи югдуръёслы сётӥськыса, нимаз улоно но курадӟоно луо — ведь кыкетӥез улон соос доры уз вуы ни, соос — вылӥ яратонэз гомӟытон понна — ноку но пумиськыны уз быгатэ ни. Ноку но». Огдыре ик романэз лыдӟыны мыным люкетӥзы валтӥсь геройёслэн прототипъёссы сярысь малпаськонъёсы. Но со аслам ни.

Мынам малпамея, романын син азе пуксе аслэсьтыз кӧтӝожзэ яратӥсь, ассэ ачиз жалясь но жалятӥсь, вогъяськись герой. Со дыре ик эгоизм мылкыдзэ вормись яке вормыны тыршись пиосмуртлэн малпанъёсыз-шӧдонъёсыз шараясько: «Уг луы та дунне вылын яратонтэк улыны!». Вӧсь кареммы потытэк (яке потыса?), вӧсь кариськом, вань улонмы нюръяськон: асэнымы, коӵышъёсынымы (=яратоно муртъёсынымы).

Зэмзэ вераса, произведенилэн укыр шара луись биографизм (автобиографизм) тодметъёсыз пушкам пумитъяськон мылкыд кылдытӥзы. Огдыре ик устоесь потӥзы авторлэн «литературной» шӧм кылдытӥсь амалъёсты кутэмез. Кылсярысь, авторлэн выль каб — роман-арбыт — малпамез. Романын трос символ пуштросъем сюжетъёсыз но образъёсыз («пуны», «коӵыш»); кутӥське уйвӧт амал, пумиське нимъёсын шудон, мистификация кылдытӥсь образъёс (Сергей Рябчиков, Борис Игнатьев). Мынам шӧдэмея, гожтос дневниклы матын луэ.

Тужгес но монэ синмаськытэ романысь «литература пушкын литература» сюжет, со ӵемгес цитация амалэн кутӥське, куддыръя произведениослэн пуштроссы но верамын луэ. Нырысь ик, озьы роман паськытгес но мургес луэ, огшоры улонлэсь (быт шуонлэсь) вылӥегес ӝутске, эстетикаен пыӵа. Авторлэн лыдӟисезлэсь тодон-валанзэ, лыдӟиськон культуразэ будэтон мылкыдыз но лушкемак шараяське кадь отын. Собере кунгож писательёслэн, соослэн книгаоссылэн, геройёссылэн йӧспӧртэмесь нимъёссы бордысь, чеберлык гинэ ӧвӧл, ческыт зын но («аромат»!) вӧлме кадь: «Мюриель Барбери. Барбери. Кыӵе чебер кылӥське! «Барбарис» выллем»». Матильда… «Француз» сюжет нимысьтыз инты басьтэ романын. Яратон темаез усьтыны со тужгес тупа…

«Евангелие от Матвеева»шибанов

Филология наукаосъя кандидат, литературовед:

— Матвеев литератураын усьтӥз — гуртын вордскем адямилэсь городын выжыяськыны тыршемзэ. Солэн героез та ласянь ӟугырес. Со адӟиське «Ъ» кылбур бичетаз. «Шузи» романаз  бадӟым инты басьтэ серекъян- ирония. Со ассэ гинэ уг, вань удмурт интеллигенциез серекъя. «Чорыглэсь лушкам кылбуранъёс» романаз уйбыртон пыр возьматэмын, кыӵе уйвӧтъёс курадӟыто город дуннее вуэм удмуртэз. «Эмезь гурезь» азьланьтэ «Шузи» романзэ. Но татын герой буйгамын, лапкамын ни. Городлы со табере кемалась улэ ни.  Жанр ласянь учконо ке, та романъёслэн вань герӟась кужымзы — реализм пала выжон. Но Матвеевлэн реализмез азьвыл реализмлэсь мукетгес. Романлэн пуш сузьетэныз валтэ дыр. Татын ар ачиз кузёяське, инкуазь вошъяськемен геройёслэн улонзы но вошъяське. Валантэм, мар автор бомжъёслэн улонзы пыр вераны турттэ. Герой трос лыдӟиське, таин со компенсировать каре гурт улонзэ ыштэмзэ, яке пуш дуннезэ тырмытыны турттэ.

Классической романэ мукет произведенилэсь люкетсэ пыртӥськод ке, малпаськоно, кызьы соосты сюжетэн герӟано. Нош Матвеев сомында авторъёсты романэзлэн сюжетэныз нокызьы уг герӟа. Кнуст Гамсонэз пусъе, собере эшсэ Борис Игнатьевез тодаз вае, 300 манет вылэ вуэ. Но малы со Кнуст Гамсон отын кутэмын? Анна Гавальда, Фред Варга одӥг пол гинэ уг пото. Та посмодернизмлэн огез тодметэз луэ. Но со бордын гинэ ужпум ӧвӧл. Та книгаосты автор ваньзэ лыдӟемын. Герой шуэ кадь, тӥ та романъёсты лыдӟемын ӧвӧл ке но, тӥ шудоесь. Герой уг тэбиньы, тӥ но та романъёсты лыдӟе, шуыса. Литературоведлэсь Татьяна Душенковалэсь кылӥськиз вал: С. Матвеев «Евангелие от Матвеева» гожтэ шуыса. Соин сэрен мынам пушкам со выллем уж лыдӟыны мылкыды вал. Но оло Душенковаен Матвеевен шуозы но — та ик вань со «Евангелие от Матвеева».

«УД»

 

 

Удмурт Дунне
By Удмурт Дунне Октябрь 28, 2015 13:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<