Бродский бере Нобель премиез басьтӥз Алексиевич

Удмурт Дунне
By Удмурт Дунне Октябрь 28, 2015 10:34

Туэ Нобельлэн литературая премиез сётэмын Белоруссиысь Светлана Алексиевичлы.

aleksievich

Литература удысын Нобель премиен пусъемын 14 нылкышно, соос пӧлын С. Алексиевич.

Светлана Алексиевичлэн ӵыжы-выжыосыз — белорусъёс но украинецъёс. Вордӥськемын со Украинаын 1948-тӥ арын, пичи дыръяз выжемын Белоруссие. Гожъяське ӟуч кылын. Ужамын газетъёсын но журналъёсын. Журналист луэмез шӧдӥське чеберлыко произведениосаз — соос кылдо адямиосын пумиськылыса вераськемъёс вылын, интервью жанрез тодэ вайыто. Озьы, кылсярысь, гожтэмын «У войны не женское лицо» романэз. Со быдэстэмын вал ини 1983-тӥ арын, но печатласькиз 1985-тӥ арын, выльдӥськон кутскем бере гинэ. Отчыозь С. Алексиевичез янгыше уськытъяллязы ож вакытэз огшоры улонэз сямен возьматэмез понна: улонзэс Родина понна сётэм геройёстэк, «Ура!» кесяськонъёстэк. «У войны не женское лицо» романэзъя Россиысь, Белоруссиысь тросэз театръёс пуктӥзы спектакльёс.

Афган ож бере С. Алексиевич гожтӥз «Цинковые мальчики», Чернобыль пуштэм бере «Чернобыльская молитва» романъёссэ. 2013-тӥ арын потӥз «Время секонд хэнд» книгаез. Таиз произведениез СССР-ын быдэ вуэм, улэм адямиос сярысь. Коммунизм куашказ, ми кылим, гожтэ С. Алексиевич книгалэн азькылаз, перестройкалэн сутӥсь тылаз шедем муртъёс пќлы ассэ но пыртыса. Писатель ортчиз Россиетӥ, Белоруссиетӥ, трос адямиосын пумиськылӥз. Соосын вераськемъёсысь пӧрмиз та книга.

С. Алексиевич кӧня ке арлы Европае кошкылӥз, берытскиз Белоруссие. Нобель премия солы сётэмын социализм бере улонэз зэмос возьматэмез понна. Озьы та данъетэз нырысьсэ басьтӥз журналист.

Кык ар талэсь азьло С. Алексиевич дэмламын вал ини та дано премилы. Но Нобельлэн мылкыдыныз (коньдонэныз-а, шуод) кузёяськисьёс Белоруссиын быръёнъёсты витизы, шӧдске. Угось С. Алексиевич А. Лукашенколы пумит вераськылэ. Мукет ласянь, С. Алексиевичез, оло, ӧй но адӟысалзы ай, белорусъёслэн президентсы Украина но Россия куспы ӧй ке пыриськысал, Россилэсь авиабазазэ Белоруссиын пуктыны пумит ӧй луысал ке. Литература, котькызьы бергаты, со бадӟым политика. Ӟуч кылын гожъяськись писатель берлозэ Нобель премиез басьтӥз вал 1987-тӥ арын. Со вал диссидент И. Бродский — СССР-ысь пегӟем кылбурчи.

Svetlana_Aleksievich__Vremya_sekond_hendУльчаын но гур азь палан вераськонъёсысь

Светлана Алексиевичлэн «Время секонд хэнд» книгаысьтыз оглюкет

«Али начар луыны возьыт. Али ваньмыз спортэн выро. Мон ке азбар ӵужисьёс но возьмаськисьёс пӧлысь. Азьло озьы пушкамы ватскылӥм пурысь улонлэсь. Улӥськод но уд адӟиськы, кыӵе инкуазь укно сьӧрын. Ми кышноеным йылпумъямы Петербургысь (соку Ленинградысь) университетлэсь философия факультетсэ. Со азбар утялтӥз, мон котельнойын эстӥськи. Одӥг сутка ужаськод — кыксэ гуртад пукиськод. Инженер со вакытэ басьтэ вал 130 манет, мон — 90, эркын улон понна 40 манет жаль ӧй вал. Книга лыдӟыса улӥмы, трос лыдӟиськимы. Вераськылӥмы. Оскимы, выль малпанъёс вордӥськом шуыса. Революция мед луысал, шумпотыса малпаллямы, но кышкаллямы, со вакытэз ум адӟе ни шуыса. Ас югдамы улӥмы, кыӵе лек тќлъёс пельто ульчаын, ӧм тодылэ. Шунытэз яратӥсь сяськаос кадь. Бӧрысь валамы ини, йырамы гинэ вылӥллям Запад но, капитализм но, ӟуч калык но. Асьмеды асьмеос пӧяллямы. Книгаосын но гур азь палъёсамы кылдытӥм ӧвӧлтэм Россиез.

Перестройка вакытэ со малпам дуннемылы пум вуиз. Капитализм ваньзэ куашкатӥз. 90 манет луиз 10 доллар. Ма соин басьтод… Гур азь палась потӥмы ульчае но валамы, малпанъёсмы милям ӧвӧл шуыса, калыклы юрттыны номырин ум быгатӥське. Олокытысь-марысь кыл-дӥзы воксё мукет адямиос — горд пиджакъёсын но зарни зундэсъёсын егит пиос. Коньдонэд вань ке — тон адями, ӧвӧл ке — пудо. Гегельлэсь вань произведениоссэ лыдӟид? Вот шузи! Мандельштамез лыдӟыны сяна, мае тӥ быгатӥськоды! Озьы усьтӥськиз трос вылез. Интеллигенция кураськон калозь вуиз. Милям паркамы кришнаитъёс полевой кухня пуктӥзы но мар но со сиён люкылӥзы. Начар, но чылкыт дӥсяськем пересьёс маке кузьда черодэ султылӥзы, куд-огез ымныръёссэс ватылӥзы. Со вакытэ милям 2 пиналъёсмы вал ини. Номыре сиыны луиз но, базаре потӥмы мороженой вузаны. Холодильникмы ӧвӧл, мороженоймы шуна, вия. Сютэм пиослы сое люкылӥськомы — сыӵе шумпото!

Кема тодамы возимы на «гур азь пал улонмес»… Яратыны быгатӥськомы вал. Нылкышноосмы кыӵеесь вал! Соос узыръёс вылэ ӧз ошиськылэ. Коньдонлы ӧз гочаллялэ. Табере яратонлы дырзы ӧвӧл — воргоронъёс но, нылкышноос но уксё потто. Озьы страна валаз, ма со коньдон — атомной бомбалэн пуштэмез кадь…»

Ольга Вахитова

Удмурт Дунне
By Удмурт Дунне Октябрь 28, 2015 10:34