Генезис. Дуннелэн шимесэз но чеберез — 1 час 50 минут куспын

Удмурт Дунне
By Удмурт Дунне Октябрь 28, 2015 09:14

Вим Вендерс немец режиссёр Себастьян Сальгадо туспуктӥсь сярысь «Соль Земли» кино лэсьтӥз. Та кино — «Оскарлы» валтӥсь номинант. Мон туж паймо, Вим Вендерс статуэткаез ӧз басьты ке.

Кинолэн инъетэз — Сальгадолэн сьӧд-тӧдьы туспуктэмъёсыз, отын сураськемын туспуктӥсьлэн философиез но биографиез.

С. Сальгадолэн Африкаысь огез туспуктэмез.

С. Сальгадолэн Африкаысь огез туспуктэмез.

Сальгадо вордскиз Бразилиын. Писпуосын куашетӥсь интыысь кошконо луиз кунын военной диктатура муген. Кема аръёс ӵоже со Франциын улӥз, дуннелэсь тужгес курадӟись интыоссэ котыръяз. Солэн туспуктэмъёсаз — дуннелэн вань возьытэз. Нигериысь, Эфиопиысь сютэм-вутэм кӧшкемыт нуналъёс, Кувейтысь шимес тылпуос, Югославиысь ож, Руандаысь геноцид… Калер, кулэм пиналъёс, куасьмем пересьёс, ог-огзэс быдтӥсь калыкъёс… Учкись гань-гань будэ-улэ кадь аслаз шуныт убояз, нош Сальгадо сое отысь выжыеныз ишкалтэ но синъёссэ усьтыны, улон вӧсез шӧдыны куре (косэ!). Улон вылэ ӝожтӥськыны кыл уг ни берытскы со туспуктэмъёсты адӟем бере. Ма быдӟа меда луыны кулэ Сальгадолэн сюлмыз, кызьы со пушказ вань адӟемзэ тэрытӥз, кызьы чиданэз тырмиз? Африкаысь кошкыкуз, Сальгадо, пе, осконзэ ыштӥз, адямилэн улыны правоез вань шуыса.

Со бӧрсьы Сальгадо дораз бертӥз но адӟиз: куке но вож буёлъёсын пыӵам вордскем палъёсыз бездыт-пурысь луиллям. Син азяды пуктэ ай шундыен сутэм гольык музъемез. Сальгадо кышноеныз ӵош кутскиз писпуос мерттыны. Мертто, нош писпуос куасьмо. Соос выльысь мертто, нош писпуос выльысь куасьмо. 15 ар ортчыса гинэ, инкуазь бакель кариз. Али со интыын 2,5 миллионлэсь трос писпу будэ, отчы берытскизы пӧйшуръёс. Ас ужаменыз Сальгадо возьматӥз, арам карем музъемез, инкуазез, дуннеез улӟытыны луэ шуыса.

Бразилиын нюлэс мерттыса, сюлэм яраоссэ бурмытыса, Сальгадо шурдымон быдӟым проект борды басьтӥськиз — дуннелэсь чеберлыксэ, быдӟымлыксэ инкуазь пыр возьматыны малпаз: эксэйлыко тӧдьы гондыръёсты, китъёсты, замокъёслы укшась йӧгурезьёсты, визьмо слонъёсты, ӵыжы-выжы луись маймылъёсты, Галапагоссысь ташбакаез, кудӥз, оло, Дарвинэз но адӟиз ай… Макем паймымон та Музъеммы! Пужейёсты возись ненецъёсын — соосты со Сибирьысь ковбойёс нимаз, мукет адямиосын кусып возисьтэм, джунглиосын улӥсь индеецъёсын тодматскыса, Сальгадо шуиз: «Соослэсь шудо адямиос дуннеын ӧвӧл». Та люкетын туспуктӥсьлэн адямиосты зол яратэмез усьтӥське.

Кинолэн нимыз Матвейлэн Евангелиысьтыз чуръёсысь басьтэмын: «Тӥ — музъемлэн сылалэз. Нош сылал шӧмзэ ыштӥз ке, кузьытсэ кызьы берыктод? Со номырлы уз яра ни, адямиослы лёган вылысь зӥртыны гинэ кылёз на». 12+

Вера ШТЫКОВА

Удмурт Дунне
By Удмурт Дунне Октябрь 28, 2015 09:14