Та дуннеын асьмеос куноос

Удмурт Дунне
By Удмурт Дунне Октябрь 15, 2015 13:43

шкляевОскись калык 8-тӥ октябре буре вайиз преподобной Сергий Радонежскиез, нош туннэ, 9-тӥ коньывуонэ, асьмеос сћлы кариськомы апостолэз Иоанн Богословез.

Кынмиз — шуназ

Сергий Радонежский сярысь трос верамын но гожъямын вал ини. Но мынам лыдӟисьёслы тодазы вайытэме потэ та святойлэсь ӟеч сямзэ, кудӥз али туж уг тырмы адямиослы. Дун-чылкыт Сергий дан утчанлэсь, ушъяськонлэсь палэнскылӥз. Тодады вае ай, кӧня со юрттылӥз сютэм, висись но ултӥям адямиослы, но одӥг ӟеч ужзэ но шара вераса ӧз ветлы. Огпол со доры пересь воргорон висись пизэ вайиз, но солэн нылпиез сюрес вылын кулэм. Сергий Радонежский, кайгуэн зӥбем воргоронэз адӟыса, сокем сюлмысь вӧсяськиз, Инмар улӟытӥз улонысь кошкем пиналэз. Но преподобной Сергий пиосмуртлы шуиз: тынад пиед кынмем, жуммем, тон ке сое кулэм кожамед. Сергий Радонежский ӧз лэзьы та сярысь адямиослы вераны. Нош малпалэ ай, туала вакытэ та выллем учыр луысал ке, со иворен кемалась дан поттысалзы ини, вань СМИ-ос возьматысалзы но верасалзы.

Берпуметӥ кыл

9-тӥ октябре сӥлы кариськом Иоанн Богослов апостолэз. Иисуслэн вань дышетскисьёсыз пӧлысь со кортӵогам Христослэн Киросэз дорын огназ пумозяз вал, сое ик куриз утисьмы Инмар Анай сярысь сюлмаськыны. Дун-чылкыт Иоанн — Инмарлэн быръем муртэз. Со огназ 12 апостолъёс пӧлысь кема улӥз но ас кулонэныз кошкиз югыт дуннеысь. Дышетскисьёссэ косӥз сое сюен шобыртыны. Огшап дыр ортчыса, адямиос усьтӥзы солэсь шайгузэ но паймизы — Иоаннлэн мугорыз отын ӧй вал.

Музъем вылын улон сюресэз йылпумъяськыку ини, Иоанн гожтӥз, мар вите калыкез азьланяз. Тае дышетскисезлы шараяз ачиз Инмармы. Тросэзлы Иоанн Богословлэн гожъямъёсыз тодмо «Апокалипсис» нимын (со Выль Сӥзёнлэн берпуметӥ книгаез луэ). Та книгаын верамын, Иисус Христос музъем вылэ кыкетӥзэ лыктоз шуыса, со азьын адямиос кылчинъёсты адӟозы, кулэмъёс улӟыса султозы, инбамысь тыл усьылоз но мукет учыръёс луозы. Иоанн Богослов гожтэ: адямиос (уката ик кивалтӥсьёс) Инмарен сётэм сюресъёсты уг адӟо яке юромо мыдлане вамышто. Талы куке но пум вуоз. Ваньмыз со йылпумъяськоз Кышкыт судэн. Отын калык берпуметӥ кылзэ вералоз Кылдытӥсьмылы. Куд-ог преданиосъя сое вералоз Россия, нош со кыл «простить кар» шуэм луоз. Кышкыт суд бере выль инбам но выль музъем кылдозы, отын уз луы уродэзлы инты.

Блаженной Матроналэн обросэз.

Блаженной Матроналэн обросэз.

«Мон пумитало»

14-тӥ октябре асьмеос пусйиськом огзэ бадӟым черк праздникез — Пукроез. Инмар Анайлэн Покровезлы сӥзем нунал Россиын тужгес сӥлы карымонэз. Асьмелэн трос Покровлы сӥзем храмъёс, монастырьёс, черкъёс. Кылсярысь, Москваысь Покров монастырьын утисько XX даурысь тужгес яратоно святойлэн лысьӧмъёсыз — блаженной Матронушкалэн. Со вордскем дырысеныз синтэм но ляб тазалыко вал, аслаз улон сэрегез ӧй вал, нош кӧня калык ветлӥз дораз, юрттэт-буйган утчаса, визь-кенеш юаса! Дун-чылкыт Матронушка калыкез ӧз тышкаськылы, ӧз индылы, котьку шуылӥз: оске Инмарлы. Инмар одӥг сямен учке, асьмеос, сьӧлыкоос — мукет сямен. Кинэ асьмеос адямиен ум лыдъяське, соос ик ӵемысь Инмар азьын ваньмызлэсь вылӥын сыло. Татын лыдэ уг басьтӥсько узырлык, дышетскем, дан, кивалтон, чеберъяськон. Валтӥсь интыын адямилэн лул-сюлэмыныз Инмарлы оскемез но Утисьмылэн курон-косонъёсызъя улэмез. Матронушка вералляз на: кин вӧсяськиз, оскиз, вазиськиз мыным, мон соосты кулэмзы бере пумитало.

Шаерысьтымы нырысе-тӥез монастырь но, со усьтэмын Балезино ёросын 1993-тӥ арын, сӥземын Инмар Анайлэн Покровезлы. Берло аръёссэ та монастырьын духовник луыса тырше архимандрит Силуан (Бояров), со доры службаосы Россилэн пӧртэм сэрегъёсысьтыз адямиос вуыло.

Кулэмъёсты буре ваён

Пукро азьын асьме но мукет епархиосын буре ваё улонысь кошкем адямиосты, туэ со 10-тӥ октябре тупа. Черк уставын та поминка ӧвӧл, но калыкъёс Покров азьын кӧснуналэ черке лыкто, собере шайвылэ мыно улонысь кошкем ӵыжы-выжыоссэс буре вайыны. Со шумпоттэ, адямиос кулэм бӧлякъёссэс уг вунэто, соослэн лулзы понна Инмар азьын вӧсясько шуыса. Шайвылын, кулэм адямилэн гуэз дорын, сылыкумы, эшшо огпол валаськомы: та дуннеын асьмеос куноос гинэ. Асьмеос куноос Атаймы дорын, кин адямилы ваньзэ сётӥз ӟеч улон понна, кин простить каре сьӧлыкъёсмес, асьмеос та сярысь куриськомы ке.
Улонысь кошкем ӵыжы-выжыостэс буре вайыку, одно ик вӧсяське соос понна. Дорады-а, черкын-а, шайвылын-а шуэ:

«Кузё-Инмаре, буре вай кулэм муртъёстэ: (адямиостылэсь нимъёссэс вералэ) — ваньзэс та дуннеысь кошкем выжы-кумыосме, иськавынъёсме, эшъёсме-матысьёсме, Атыкай музъемез утьыса оже быремъёсты — вань кулэм православной христианъёсты. Соослэсь тодыса но тодытэк, ас эриксыя но эриктэм лэсьтэм вань сьӧлыкъёссэс кушты но пумтэм вапумъёс ӵоже каньыллыко улон азяд дун-сьӧлыктэмъёсын огазе интыя (кирос карыса йыбырттоно)».

Вормонтэм ӧвӧл

21-тӥ коньывуонэ сӥлы кариськом эшшо одӥг югдытӥсез — Трифон Вятскиез. Асьме епархиын та преподобнойлы сӥзем одӥг гинэ храм, со сылэ Балезино ёросысь Покровской монастырьын. Отын ик вань дун-чылкыт ошмес, кытчы уно аръёс ӵоже адямиос ветло вулы. Инмар доры Трифон Вятский кошкиз 1612-тӥ арын. Та дуннеын улыкуз, пӧртэм шуг-секытъёсты, пӧяськонъёсты, монахъёслэсь сое «вузамзэс», ултӥянъёсты чидаз, но лек ӧз луы. Со ваньзэс простить кариз. Малы ке шуоно дун-сьӧлыктэм вал Инмар гинэ. Нош асьмелы шуг-секытъёс сётӥсько визьмаськон понна (азьланяз таӵе янгышъёс медам лэсьтэ ни шуыса) яке азьвыл сьӧлыкъёсмес быдтон понна. Ваньмыз со — лулмес утён понна.

Ӵем дыръя адями вылэ шуг-секытъёс, куректон-кайгуос усё ке, со чигиське, мылкыдыз-кужымез быре, ӟечезлы осконэз ыше. Святитель Филарет Московский шуылӥз: юскиськон, ӝож мылкыдъёслы сётӥськон — бадӟым сьӧлык, озьы тон аслэсьтыд ачид таласькод Инмарен сётэм дэлетэз. Вунэтоно ӧвӧл: Инмар вормонтэм шуг-секытъёсты асьмелы уг сёты.
Матысь нуналъёсы черк пусъе:

9-тӥ коньывуонэ — Дун-чылкыт Тихон Московский епископез буре ваён.
11-тӥ коньывуонэ — Пятидесятницая 19-тӥез арня. Преподобной Харитон Исповедникез сӥлы карон.
10-тӥ коньывуонэ — Пукро азьын поминка.
13-тӥ коньывуонэ — оскон понна курадӟем баӵкоез, Григорий Просветителез буре ваён.
14-тӥ коньывуонэ — Пукро, Инмар Анайлэн Покровезлы сӥзем черк праздник.
17-тӥ коньывуонэ — Гурий Казанский архиепископез сӥлы карон.
18-тӥ коньывуонэ — Пятидесятницая 20-тӥез арня. Москваысь Пётр, Алексий, Иона, Филипп, Ермоген святительёсты но Россиысь чудотворецъёсты буре ваён.
20-тӥ коньывуонэ — Инмар Анайлэсь Умиление оброссэ сӥлы карон.
23-тӥ коньывуонэ — Преподобной Амвросий Оптинский иеромонахез сӥлы карон.
25-тӥ коньывуонэ — Пятидесятницая 21-тӥез арня.
26-тӥ коньывуонэ — Инмар Анайлэсь Иверской иконазэ сӥлы карон.
31-тӥ коньывуонэ — Лука апостолэз но евангелистэз буре ваён нунал. Дун-чылкыт Иосиф Волоцкиез сӥлы карон.

Удмурт Дунне
By Удмурт Дунне Октябрь 15, 2015 13:43