Ыж уг яраты зын гид куазез

Удмурт Дунне
By Удмурт Дунне Октябрь 8, 2015 11:18
ыж

Чебер будон понна ыжлы 2,5-3 квадрат метр инты кулэ.

Галина С.,
Пичи Пурга ёрос

Ыж вордыны малпасько. Гидэ бадӟым ӧвӧл, но висъетъёслы люкылэмын ик. Соин ик парсьёсы вӧзы ыжез интыясал. Азьвыл отын курег возисько вал — парсь сиыны кутскиз но, курдасько ни. Котькуд животлы нимысьтыз инты кулэ, шуо. Нош кудбыдӟа инты висъяно?

Гуртын уноез пудозэ одӥг липет улын пӧртэм висъетъёсын возе. Соин но куддыръя курегъёсыныды сямен шудтэм учыръёс пумиськыло. Парсь уго йырйиськыны яратэ, нош вирез адӟе-шӧдэ ке, урме. Соин ик висъетъёсты рос-прос лэсьтоно, куртчылӥськыны медаз быгатэ шуыса. Но тылобурдоосты воксё но нимаз вордыны ӵектысал. Бурдоос уго сюры но утчало, кыед зынзы но чидантэм зын — животъёслы со уз кельшы. Кыедысьтызы омыре потӥсь микробъёс пудо пушкы но сюрозы, лябӟытозы.

Ыж сокем бырйиськись ӧвӧл, шуиськомы ке но, солы парсь кыед зын уг кельшы. Тужгес кышкыт, гидын тӧл уг ветлы ке. Соку шоканы луонтэм секыт луэ. Таин сэрен ыж урод сиське. Со сяна, парсь сиськыны но паняс, кыедэз но уногес люкаське бере, гидын мускыт луэ. Нош ыжъёслы кӧс, чылкыт, югыт но вӧл-вӧл висъет кулэ. Мускыт ке, со черланы ӧдъя. Парсьёсын артэ сяна мукет пыртон инты ӧвӧл ке, ыжлы выжзэ 20 сантиметрлы ке но вылэгес ӝутэ. Соку парсьлэн кыедэз дораз уз пыры ни. Озьы но кот ке, ыж улэ уногес куро я пул пызь вӧлдылэ. Толэз потон понна улаз валён вылысь 100-120 килограмм куро кулэ луоз. Пыдъёсыз кӧсын мед улозы. Собере, выж одно ик чурыт луыны кулэ. Небыт но выйись азьын улӥз ке, пыдъёсыз висьыны ӧдъялозы.

Гидэз тазатыса возёно, нош пӧртэм пудоос артэ ке, сое тужгес но чылкыт возьыны тыршоно. Кыедэз сузян сярысь гинэ уг вераськы. Пӧртэм нымы-кибыос медаз лобалэ, комакъёс медаз бызьылэ. Таос бордысь уго олокыӵе но висён одӥг пудолэсь мукетызлы выжоз. Борддоръёсты но выжез изваскаен ӵемгес маялляно.

Чебер будон но пи поттон вылысь 1 ыжлы 2,5-3 квадрат метр инты кулэ. Татчы ик интыяны чакламын тусь но. Солэн кузьдалаез 30-40 сантиметр луыны кулэ. Югыт мед луоз. Парсьлы воксё но 0,8 квадрат метр но тырмоз, мумы парсьлы — 5-10 квадрат метр.

Гидын инты ӧвӧл, шуиськоды. Но ыж сокем уг кынмы. Лапас улын, котыртэм пушкын но шуныт выж вылын солы гидтэк но умой. Зэм, тӧл медаз пыры. Ӟырт кезьытэн гинэ сое гидэ улляно. Нош кырын тазалыкез эшшо но юнмалоз. Соин ик дырын-дырын сое кыре одно поттано.

Туспуктӥз Д. Корнилов

Удмурт Дунне
By Удмурт Дунне Октябрь 8, 2015 11:18