Эмъясь суредъёс

Удмурт Дунне
By Удмурт Дунне Октябрь 8, 2015 10:57
В. С. Ниязов (2)

Виталий Ниязов

Дэри ёросысь Ожмос (Бабино) черкогуртысь Виталий Ниязов 70 аресказ бадӟымесь картинаос кылдытъян борды басьтӥськиз.

Тодмо суредасьёслэн сямен ик, ужъёсыз нимысьтыз каталоген поттэмын. Та вакытэ 82 аресъем Виталий Семёновичлэн ог 50 суредъёсыз. Соосты возён но возьматъян инты пумысен самодеятельной художник ялан малпаськылӥз.

— Суредаськон уже монэ ӝог пересьмонлэсь уте кадь, — маде Виталий Семёнович. — Нылылы поттылӥ: куд-ог ужъёсы, оло, дунтэмен ке но вузаськозы. Одӥг суреддэ но ми ум вузалэ, ваньзэ утём, калыклы возьматъялом, шуиз со. Тӥни соку ик картинаосты возён-возьматъян галерея выллем маке лэсьтон сярысь кенешим.

В. Ниязов ачиз ик проект малпаз. Лэсьтӥськон материал нылпиосыз вуттӥзы. Уж вырӟиз. Суредасьлы бускельёсыз но, тодмоосыз но, пиосыз но юрттӥськизы.

Огаз шундыё шуныт нуналэ Виталий Семёновичлэн корка дораз трос калык люкаськиз. Гуртоос сяна, ёрос администрациын ужасьёс но, Ижкарысь куноос но, журналистъёс но вуизы. Урам тыр шулдыр крезьгур чузъяське. Картинаослэн выль корказы но, азбар но яркыт шаръёсын чеберъямын. Нош корка кузёез уд тодма, ява. Йыраз — зарезьын уясь капитанлэн фуражкаез, гадяз — медальёс. Якубовичлэн выллем тӧдьы пуштрес мыйык будэтэменыз но паймытӥз куд-огзэ.

Ужрадлы черкогуртысь культура юртын ужасьёс нимысьтыз сценарий дасяллям.

— Геройёсты палэнысь утчано ӧвӧл. Тани со — асьмемын артэ. Виталий Семёнович, арлыдыз шоры учкытэк, туала улонмес шулдыргес карыны сюлмаське, — пусйиз Кун Кенешлэн депутатэз, фермер Михаил Лебедев.

— Та галереяе бадӟымъёс но, пиналъёс но ветлозы. Будӥсь нылпиос — со асьмелэн зарни фондмы, нош тӥ, Виталий Семёнович — милям азвесь фондмы. Черкогуртмес но, ёросмес но данъяськоды, — вераз Ожмос муниципал кылдытэтлэн йырыз Алексей Краснопёров.

Мукетъёсыз но пумиськонэ лыктэмъёс суредасьлэн творчествоезлы вылӥ дунъет сётӥзы, шуныт кылъёссэс веразы. Виталий Семёновичлэсь нылзэ Людмилаез но ушъятэк ӧз кельтэ. Со атайзэ котьку бурдъяны сюлмаське, ужрадэз радъян понна но трос бызьылӥз, коньдонзэ висъяз.

Тани горд лента вандэмын. Люкаськемъёс галерея пушкы вамыштӥзы. Зэм, со бадӟым ӧвӧл. Но отын югыт, борддоръёсы суредъёс ошылэмын. Котькуд уж сярысь нимысьтыз вераськон ӝутыны луысал. Картинаос пыр Виталий Семёновичлэсь улонзэ но адӟиськод. 20 арлэсь кема ни со огназ улэ, кузпалыз секыт висемез бере улонысь кошкиз. Нош суредъёсыз В. Ниязовлэсь аслэсьтыз но мылкыдзэ бурдъяло, эмъяло.

Выль юртэз ожмосъёс соку ик галерея шуизы. Бадӟыматыса верамын ке но, шаерысьтымы гуртъёсын таӵеез ӧй вал на. Оскем потэ, аспӧртэм мӧйы художниклы ёросын гинэ ӧвӧл, элькун ласянь но саклык висъяськоз. Быгатонлыкез дыраз дунъяно.

Ульфат Бадретдинов

Удмурт Дунне
By Удмурт Дунне Октябрь 8, 2015 10:57