Кызьы дӥсяськоно та сӥзьылэ?

Удмурт Дунне
By Удмурт Дунне Сентябрь 22, 2015 12:11

Штанэд паськыт, пальтоед бадӟым, шарфед музозь ошиське? Тод: туала дыре тон тужгес тузӥ.

Со сярысь вералоз кубиста кадь дӥсяськемды но. Кылсярысь, кышкано ӧвӧл огдыре дӥсяны пӧртэм тусо но буёло пыдес дорозь дэрем но паськыт штан. Озьы ик огшоры штанэз аспӧртэм карыны луэ, вылаз вакчи юбка яке шлейф дӥсяса.

сӥзьыл тус

Сӥзьыл тус.

Дизайнеръёс али берытско ретро-фасонъёс пала: выль материалъёсты кутыса, вуро 70-тӥ-80-тӥ аръёсы кадь дӥсь. Соин ик утчаськы анаедлэн шыкысысьтыз, оло, аслыд тупась дэрем я кофта шедёз. Али мода возьматонъёсысь адӟыны луэ мугорез пачкатӥсьтэм эркын дӥсьёсты. Дэремъёс луо паськытэсь, трапеция выллемесь, кус борды уг ӝиптӥсько. Пальтоос, курткаос но сыӵеесь ик. Дӥсь басьтыкуды, оло, юан но кылдоз: «Та пальто мыным бадӟым ӧвӧл-а?» Ӧвӧл.

Дизайнеръёс трос шуныт буёлъёсты куто. Ӵуж, льӧль, ӵужпыръем-горд, нап-горд — та буёлъёс сӥзьыл дӥськутэз яркыт каро. Таӵе ик буёлъёс пӧртэм суредо басмаосын но кутӥсько. Азьпалан мыно кечато-вамато, абстракция, будосъёсын но пудо-животъёсын суредъёс. Кезьытъёсын йырин берытско ыж гон басмалэсь, сое твид шуо, вурем дэремъёс, кофтаос но пальтоос.

Озьы ик котькуд адямилэн сандыказ луыны кулэ керттэм кофтаос — кузь я вакчи саесо, сарвылэз шобыртӥсь я гогыозь гинэ. Эн вунэтэ дӥсяны нап-ӵуж, я горд колготки.

Мултэс уз луы, вылады трос чыры-пыры арбериос (аксессуаръёс) ошылӥды ке. Дизайнеръёс туэ туж ярато бахромаез. Эн пайме, адямиослэн юбкаоссы гинэ ӧвӧл, штанъёссы но, кофтаоссы но тӧлъя-буръя сэзъясько ке.

Тузӥ луон понна дӥсьын одно ик кыӵе ке чеберман арбери луыны кулэ. Соос табере ас понназы но улыны быгато. Шузияське. Нокин номыр уз шуы, юбкаяды чилясь брошь тэчиды ке, нош керттэм кофтады вылэ гоно весь ошиды ке. Озьы ик тросэз модая юртъёс али сяськаослэсь бадӟым пель угыос лэсьто. Чыртыез ватон понна потто пӧртэм воротникъёс, бисерен пужыятэм манишкаос, нош кинлы та мултэс потэ — бинялтэ чыртыдэс векчи но кузь шарфен яке паськыт палантинэн.

Ксения Шкляева

Удмурт Дунне
By Удмурт Дунне Сентябрь 22, 2015 12:11