Л. Рубальскаялы — 70 арес

Удмурт Дунне
By Удмурт Дунне Сентябрь 24, 2015 11:07
Без имени-1

Л. Рубальская

24-тӥ куарусёнэ 70 арес тырмоз Россиысь тодмо кылбурчилы Лариса Рубальскаялы.

Лариса Рубальская вордӥськиз Москваын. Школа бере ужаз библиотекаын, вал корректор, машинистка. Заочно амалэн дышетскиз Москва улосысь Н. Крупская нимо пединститутысь филология факультетын. Озьы ик йылпумъяз япон кылъёсъя курсъёсты. Собере ужаз Япониысь «Асахи» газетлэн Москваын потӥсь ёзаз кылысь кылэ берыктӥсь луыса.

Ачиз верамъя, кырӟан гожъяны со кутскем янгышен, Владимир Мигуля крезьгурчиен тодматскемез бере. Солэн нырысетӥ кырӟанэз нимаське «Воспоминание», быдэстӥз сое Валентина Толкунова. Со дырысен Лариса Рубальская 600-лэсь уно кырӟан гожтӥз ни. Кылбурчи валче ужа В. Добрынин, Д. Тухманов, В. Чайка, А. Добронравов, И. Крутой но мукет крезьгурчиосын. Композиторъёс ярато солэсь кылбуръёссэ, угось чуръёсыз крезьгур вылэ умой пуксё.

Арлыд сярысь эн юа

* * *
Кин ке пеймытын ӝуатэ ӵуж тылъёс…
Мон тынад ӧтьымтэ уйшорбер куноед.
Малы сокем мӧзмыт, ӟазырес куараед.
Тон сярысь шуыло: валантэм нылкышно…

Валантэм нылкышно, валантэм.
Укшаськод ӧлексы бурдолы.
Мӧзмыса бурдъёстэ шымыртэм.
Мылкыдыд ни уг сузь лобаны…
Кин-о меда мон луо тыныд?
Кин-о меда мон луо тыныд?
Валантэм нылкышно, нылкышно…

Уг куры: простить кар.
Уд вазь пумитам.
Кошкеме чик уг поты
Дорысьтыд ӵукнапал…
Мӧзмыт синъёсыд но монэ шумпотто,
Валантэм луэмдэ кемалась яратко.

Валантэм нылкышно, валантэм…
Укшаськод ӧлексы бурдолы.
Мӧзмыса бурдъёстэ шымыртэм.
Мылкыдыд ни уг сузь лобаны…
Кин-о меда мон луо тыныд?
Кин-о меда мон луо тыныд?
Валантэм нылкышно, нылкышно…

* * *

Маялты кезьыт киосыныд
Мынэсьтым тылын ӝуась бамме.
Тон сыӵе кема вал мыным мурт,
Сыӵе ӝог дуно, матын луид.

* * *
Сӥзьыл зор. Тӧл пазяз
куаръёсты.
Тани ми но ум быгатке
ӵош луыны.
Ми дырозь но озьы вал,
али но озьы:
Люкиським, но ӧз кысы
яратонмы…

***

Арлыды сярысь тон
Эн юа.
Со уг тупа лул-мылкыдылы.
Ушъяса чебер кылъёс эн утча,
Вазь ай даурме
Йылпумъяны.
Мон ай вань ӟардонъёсты
Ӧй адӟы,
Ай ӧй пумита ваньзэ акшанъёсты.
Вань юанъёслы ӧй валэкты:
Дуннеын шудо-а мон улӥ?
Арлыды сярысь тон эн юа…
Быдэсмонтэмзэ мон вунэтӥ.
Толло ярдуре бордысь мон выльысь
Вамыштӥ но эктыса кошки.
Малпанам мон ялан лобасько на,
Оскисько зэмос эшъёсылы.
Оскисько озьы ик —
Бер ӧвӧл на
Яратэмедлы оскиськыны.

* * *

Улонын номыр но ӧй возьма ни,
Каллен дыши, лэся, одӥгнамлы.
Синучкон но шыпыт кырмыштӥз тӥни:
Дыр вуиз атай нимын вазиськыны.

Мексикан сериалысь геройёсын ӵош
Бӧрдылӥ мон ялан ӝытъёсы.
Но тонэ адӟыса, синмаськи но —
Улонэ берытскиз йырчукин.

Ӵок ойдо, ӵуштаськылӥ ке,
Ӵок ойдо — егит ӧвӧл.
Ӵуштаськылэмлэсь ӧз кыльы
Сюлэмам яра бервыл.
Сутӥськи, ӝуай — ӧй быры,
Котькудӥз янгышалля.
Мон эшшо сю пол но дась на
Ӝуаны яратыса.

Вунэм кылъёсты кылӥ но —
Мон выльысь егитоми.
Сьӧлыко малпанъёслэсь
Нош берга ини йыры.
Макем ческыт изьтэк потэм уйёс,
Ум ӵыдӥське ӵукна люкиськыны.
Кырмыштӥзы шыпыт синучконъёс:
Вазь ай нимтулын вазиськыны.

Берыктӥз Зинаида Рябинина

Удмурт Дунне
By Удмурт Дунне Сентябрь 24, 2015 11:07