Гань-гань Тянь-Шань

Удмурт Дунне
By Удмурт Дунне Сентябрь 29, 2015 11:52

Гань-гань Тянь-Шань

Киргизиысь Тянь-Шань гурезьёсы вуылэмзы бере Ижысь Шулаков кузпалъёслэн мылкыдзы пӧзе. Инкуазьзэ, калыксэ нокыӵе Египетэн, Турциен, Вьетнамен уд ӵошаты, пе!

Сюрес уг жадьыты

— Кема малпаськимы, кытчы шутэтскыны мыномы шуыса, — веранзэ мытӥз Наталья Шулакова. — Таиландэ, Вьетнаме, Турцие, Египетэ вуылӥмы ини. Зарезь дурын шунды улын вез-вез кыллеммы ӧз поты. Сюлэммы куриз маке но аспӧртэмлыкозэ. Озьы Интернетысь бугыръяськонъямы ӝимимы «Бадӟым гонка» огазеяськон вылэ. Солэн кивалтӥсез отчы гожтэм, Тянь-Шань гурезьёсы группа, пе, люкасько. Туспуктэмъёсыз милемды гочатӥзы. Но соку ик сюлмаськыны кутским: кытын сиён пӧраломы, кытын изёмы, кытын пинь сузяломы? Нош учкод ке, дуннеез котыръянлэн ческытэз ӵапак та бордын вылэм.

Ми кадь мылкыдъёсын улӥсьёс трос вылӥллям — группаямы 22 адями люкаськиз. Уксё трос ӧз куре — котькуд адямилы 24 сюрс манет. Отчы пыре: кӧттырон, страховка, сюрес, сётӥзы на палатка-спальник. Киргизиозь мынӥмы автобусэн 2 но ӝыны нунал. Паймоно кадь: сюрес чик ӧз жадьыты. Автобус угось ӟеч, вӧл-вӧл вал.
Киргизие потӥмы Казахстан пыр. Милемлы со шӧггес потӥз — оло ширтӥськод, оло уд — укно сьӧрысь суред уг воштӥськы: ӵошкыт бусыос, ӵужпыръем возьёс-куакъёс. Но мар луэ отын, тӧлпери потэ ке! Номыр уг адскы — омырын ӵуж-ӵуж луо бугыръяське.

Тянь-шань34

Киргизъёс будэто верблюд но вал.

Киргизие пыреммы бере милемыз автобусысь 2 «Газеле» интыязы. Угось гурезь сюресъёстӥ ширтыны таосын умойгес. Отысь водительёс мынэсьтым кӧтме но шурдытъязы, серемме но поттылӥзы. Гань-ганесь. Руль бергатӥсьмылэн 1 кияз — кыскон, мукетаз — телефон. Визьтэммыса мынэ, ай 3 полэс обгонэ потэ! Одӥг пол нош воксё ышиз. «Газельмы» сюрес шорын ик сылэ. Бӧрсямы машинаослэсь кузь-кузь черод кылдӥз ини, пипкето. Кытӥ ке ӧвӧл дорамы тодмотэм пиосмурт пыриз. «Газельмес» сюрес дуре дугдытӥз но ышиз.

Совето Союзлэсь мӧзмон

Киргизиын 6 миллион пала адями улэ. Шӧдӥське: татын ӟучъёсты гажало, ӟуч сямен вольыт вераськыны быгато. Шуныт кылъёсын тодазы ваё Совето Союзэз. Соку, пе, алилэсь ӟечгес улӥськомы вал. Зэм, куанер улэм-вылэмзы адске: выль коркаос уг ӝутӥсько, син шоры йӧто пурысь «хрущёвкаос» гинэ.

Гуртъёсын улонзы эшшо но начар. Корка нерге пуктыны кирпич асьсэос дасяло. Куроез луоен суралто но шунды шорын пыжо. Яке юртаосын уло. Пуэз кечат-вамат пукто но сое куроен шобырто. Зоръёслэсь уд кышкаське-а, юаськомы. Татын, пе, со ӧжыт кыдыртэ. Юртаын ми но одӥг уймес ортчытӥмы. Ижын сыӵе ческыт мон ноку ӧй изьылы, дыр.

Тянь-шань1

Юрта пуктӥске чаляк.

Уждунъёссы татын пичиесь. Шуом, милициын ужасьёссы, асьме коньдонэн вераса, 10-12 сюрс манет басьто. 15 сюрс манет уждун отын бусьтыр лыдъяське ини. Коньдонэз воштоно ке, 1 сом понна сёто 1 манет. Дунъёссы пӧртэмесь: асьсэ будэтэм-поттэмзы сылэ дунтэм, ваемез — дуно. Кылсярысь, Россиысь ваем канфетэз татын вузало 2 поллы дуногес.

Дыр Киргизиын, Удмурт шаерын сярысь, 2 часлы вазьгес мынэ. Соин ик кивалтӥсьмы кема изьыны маза ӧз сётылы. Асьме дорын 6 час ке, отын 4 — та дыре ми султӥськомы вал ини. Угось шуак пеймыт кариське — лампочкаез кысэм кадь. Шунды гурезьёс сьӧры хоп! кошке — ульчаын ӝомал кузёяськыны ӧдъя.

Кампетэн ӝук

Ми кузпалэным кутӥмы вал 2 рюкзак — 70 но 20 литръем. Группаен кивалтӥсь Паша эшшо сётӥз на… 120 литръемзэ. Маиз но отын ӧвӧл: тушёнка, кеньыр, изён котыръёс, палатка… Нырысь нуналаз мон сое ӝутыны ӧй вормы: юрттэ! — черекъясько. Собере ини мугор дышиз, лэся. Гурезьёсын солэсь секталазэ ӧй ик шӧдылы. Юрттӥзы на бодыос. Соос мыным эш интыын вал. Группаысьтымы дуннеез котыръям адямиос визьмоесь вылӥллям — магазинысь боды басьтӥллям. Тубыку вакчи кариське, васькыку кузёмытыны луэ. Гурезь висёнэн ӧм курадӟе. Но мукет группаысь дырекъясь нылашез берлань васькытӥзы ик.

Олеген ми котьку пелотонын — лидеръёслэн группаязы — шаплы вамышъяллямы. Паша ушъятэк ӧз чидалля: вот, шуэ, соку ик, пе, адске — таос гуртын будэмын! Ма, кивалтӥсьмы ачиз но — паймымон воргорон. Сое нырысьсэ адӟи но, синъёсы питыръяськизы: мугорыз нычыр-начыр гинэ. Малпай, кызьы меда та бадӟым песьтэръёсын гурезьёсы тубоз?! Но учкод ке — макем кужмо, чидась вылэм! Аслэсьтыз песьтэръёссэ ӝог нуоз, мукетъёсызлы юрттӥськоз на.

Пусйысал на созэ но: Паша валаса бырйылӥз шутэтскылон-изён интыосмес но. Йыр выламы одӥг пичи кӧльы но ӧз усьы, одӥг чибинь но ӧз куртчы. Нош огзэ группаез бадӟым изъёс согиллям. Ӵапак гурезьысь кӧльыос усьылон-васькон интые шутэтскыны выдӥллям. Одӥг нылашез гинэ улэпен поттӥллям…

Тянь-Шань

Токтогульской тыметэз котырто гольык гурезьёс.

Сиён дасяллямы асьмеос ик. Кин шаплыгес мынэ, со ик пӧраськыны кутске. Ми весь пелотонын вал бере, пурты котырын ӵем бергалляно луылӥз. Мукетъёссэ витьытозь угось, кӧт тыбыре лякиськоз.

Сиён-юонмес чаклатэк кутӥськеммы. Берло нуналъёсаз кылизы на рис но кампет гинэ. Ма карод — кампетэн ӝук пӧзьтӥмы. Озьы ик луиз шыдэн: пуртые мар кылем куямы, пакетысь курег лымез суралтӥмы на чорыг консерваен. Инкуазьын сыӵе но сиён верантэм ческыт кошке вылэм!

Кыл быре, чеберез адӟыса

— Тани Тянь-Шань гурезьёс! — яркыт мылкыдъёссэ кисьтэ Наталья. — Кызьы соослэсь чеберзэс кылъёсын вераны — мон уг тодӥськы. Туспуктэм но сое пыр-пыр адӟытыны уз быгаты. Тянь-Шань герӟа 4 кунэз: Киргизиез, Китаез, Казахстанэз но Узбекистанэз. Китай кылысь берыктыса, нимыз ин гурезьёс шуэмез возьматэ. Котырак учкиськод — паймиськод: одӥг буш сэрегез но ӧвӧл! Вылысьтыз вылаз гурезьёс, гурезьёс… Соос сомында кадь — но ваньзы пӧртэмесь. Огезлэн йылаз лымы, йӧ кылле. Мукетыз ӝужыт-ӝужыт, вож-вож кызъёсын шобырскемын. Куинетӥез горд, ӵуж буёлъёсыныз синъёсты палёмытэ. Тянь-Шаньын гурезьёс пӧлысь ог 30-эз тужгес ӝужыт — 6 сюрс иськеме вӧлско. Пӧлысьтызы тужгес ӝужытэз — Вормон пик. Ӝуждалаез 7 сюрс 440 иськем.

Киргизъёс татын трос вал будэто. Пегӟозы шуыса кышканзы ӧвӧл — соосты кыӵе ке ущельее пырто но возё. Шӧдӥське: инкуазьзэс ту-у-уж! утьыса возё. Нокытысь но уд адӟы лошъяськись жуг-жагез. Котырак чылк-чылк. Инкуазь татын гань-гань шока!

Гурезь йылэ тубыны капчи ӧвӧл.

Ми 3 озерое вуылӥмы: Токтогульской тыметэ, Иссык-Куле но Ала-Кёле. Токтогульской тымет макем лыз-лыз, вуэз макем чылк-чылк! Пыласькытэк ӧм чидалэ. Солэсь котырзэ учкыса, Марсэ вуи кадь потӥз. Гурезьёс гольыкесь. Отын одӥг турын но, писпу но уг буды. Улӥын ог 40 градус пӧсь. Вылӥегес тубиськод — ӝокытэз уд шӧдӥськы. Мугорлы сыӵе капчи.

Ала-Кёль но буёлэныз синэз кыске. Югыт-лыз ву ӵашаын кадь шыпыт кылле. Мурдалаез ог 70 метр. Ву ледникъёсысь но водопадъёсысь ваське. Соин но со ӵаж-ӵаж кезьыт. Омырез но салкым вал. Вылысьтыз вылаз шуныт дӥсь дӥсяй. Тӧдьы бус ты вылэ я ваське, я нош ыше.

Тужгес зол паймытӥз Иссык-Куль. Пӧсь ты шуэмез возьматэ. Вуэз ноку уг кынмылы. Тӥни кытчы нылпиосын шутэтскыны ветлоно! Сьӧд зарезь дурын сямен ик пӧсь, ярдурын луо, вуэз чылк-чылк. Иссык-Куль Киргизиысь тужгес бадӟымез озеро лыдъяське. Мурдалаезъя дуннеысь тужгес мур 6 озероос пӧлы пыре. Угось 80 пала пичи шуръёс отчы васько.

Мон, созэ-тазэ мудрон интыосты адӟыса, кивалтӥсьмылы шуисько: талэсь чебер интыос ӧвӧл ини, дыр! Нош со эшшо гочатэ: ойдо, азьлань, отын эшшо но чебергес!

Огаз озерое вуиськом — пуксиськом. Шыпыт. Адями, таӵе чеберлыкез адӟыса, кылзэ ик ньылэ кадь. Мукетаз мынӥськом — шыпытаськом. Нош ик инкуазьлы абдраськом. Россиысь калык, Киргизиын шутэтскыны луэ шуыса, уггес тоды. Со понна Европаысь туристъёс татын кӧня!

Тубонлэсь секытгес васькон

Тянь-Шань20

Сиён-юонмес чаклатэк кутӥськеммы. Берло нуналъёсаз кылизы на рис но кампет гинэ.

Озероосы сяна, вуылӥмы 3 ущельее: Аламедин, Каракол но Арашан. Котькудаз ущельее шедён понна ог 15 иськемез пыдын ортчимы. Ваньмыз соос туж пӧртэмесь: Аламединын инкуазь Альпийской гурезьёслы тупа. Караколын — выжыкылын кадь ӝужыт, веськрес нюлэс. Арашан гурезьёс кӧльыё. Группаысьтымы пиос серекъяса Пашалы шуо, кызьы, пе, милемыз паспорттэк-визатэк Швейцарие вайыны быгатӥд?

Каракол ущельее огшоры гинэ сюрыны ӧм быгатэ — сюресэз ву басьтэм. Ӧраз изъёс куяса, мырдэм но кызьы потӥмы. Гурезьёс ултӥ ву урмыса кошке — мон быдӟа изъёсты пыгыр-погыр гинэ питыръя. Соку ини валаськод: та ӧре шедид ке, нокызьы но улэп уд кыльы. Туэ гужем Киргизиын туж пӧсь улэм. Гурезь йылъёсысь трос лымы шунам. Соин ик шуръёс ярдуръёсысь потэмын. Вӧзтӥз ик сюрес кошке. Со но ву пӧлын. Нош кыӵе кезьыт со! Асьме дорын вумы толалтэ но сыӵе юзмыт уг луы. Пинез миськыны уд быгаты — ваньмыз шальтрак куашкалозы кадь.

Гурезьёсын ӝоглыкмы час куспын 2 иськем гинэ вал. Ма, тыпыр-тапыр тубыны уг но яра — мугор омырлы, давленилы дышыса мед вуттоз. Лёгиськиськод но, пыд улысь векчи кӧльы, шур сямен, уллань кошке. Я азяд лол-лоп из шеде. Со вылэ тубыны курадњиськод. Озьы 3 сюрс 915 метре тубыны быгатӥмы — пилемъёслэсь вылие. Отын выжыкыл кузёяське: зор шапыкъёс я улӥысен вылӥе, я паллянысен буре ветло. Пилемъёсын тӧлъёс озьы кузёясько вылэм.

Витьымтэ шорысь кытысь ке дымбыр-йыг куараос шуккиськизы. Ваньмы шулӟектӥмы: самолёт усе, кытын ке бомба пуштӥз?! Паша гань-гань валэктӥз, озьы, пе, гурезьёсысь изъёс куашкало.

Тянь-Шань9

Ми 3 озерое вуылӥмы: Токтогульской тыметэ, Иссык-Куле но Ала-Кёле.

Арашан бере кынмем, жадем мугоръёсмес небӟытӥмы Пӧсь ошмесын. Йӧнатӥсь вуэз 54 градус шуныт. Кема пукыны ӧм чидалэ. Озьы ке но эмъясь кужымез пыӵаса вуэм ик. Уйин сайкай но шӧдӥсько: пушкысь сыӵе пӧсь потэ кадь…
Удмурт шаере бертонмы азьын кожатэк ӧм кыле Бишкекысь базаре. Со Можга городмы быдӟа. Ай 2 этажъем. Поезд вагонъёс вылысьтыз вылаз тыремын. Нырысетӥяз вуз каро, кыкетӥзэ склад интыын возё.

Киргизиысь бертэме бере йырам трос малпанъёс тымиськизы. Сюлэм нош ик сюрес вылэ куриське кадь. Угось вань кинъёслэсь адӟем карыны. Группаысьтымы тужгес пиналэзлы туристлы 9 арес сяна ӧй вал. Пияш одӥг пол но ӧз бӧрды, ӧз нургеты. Со вӧзын мыным возьыт но потылӥз — быдэс дуннеез котыръямын ини, ява. Тӥни кызьы нылпиосты будэтоно-дышетоно!

Ольга Корепанова

Удмурт Дунне
By Удмурт Дунне Сентябрь 29, 2015 11:52