Инсьӧре, выжыкылэ яке ортчем дауръёсы… Мар учконо та сӥзьылэ?

Удмурт Дунне
By Удмурт Дунне Сентябрь 22, 2015 12:22

Секыт ик вылэм учкымтэ киноос пӧлысь тужгес умойёссэ бырйыны. Режиссёрез, актёръёсты, трейлерез но критикъёслэсь кылъёссэс лыдэ басьтыса, бырйи куинь пӧртэм киноосты, кудъёссэ кинотеатръёсын сӥзьыл адӟыны луоз.

«Марсианин». Энди Уиралэн романэзъя Ридли Скотт режиссёрлэн киноез. Тае оградэ пуктыны луоз берло дыре потэм «Гравиация» но «Интерстеллар» инсьӧр сярысь киноосын. Тунсыко: Мэтт Дэймон но Джессика Честейн актёръёс «Интерстелларысь» «Марсианинэ» ӵош выжизы.

Валтӥсь герой огназ кыле Марсэ — командаез малпа, со кулӥз шуыса, но та инмуысь кошке. Марклы кызьы ке улэп кылёно — сиёнэз кӧня ке нуналлы гинэ тырмымон. Герой Робинзон Крузо выллем улонэз понна нюръяське, нош со вакытэ командаезлы быръёно луэ — бертоно, кызьы косэ инструкция, яке эшсэс мозмытыны Марсэ берытсконо. 16+

багровый пик

Валтӥсь героиня, егит но ненег, синмаське кыӵе ке пиосмуртлы но мынэ со доры улыны.

«Багровый пик». Тодмо ини: Гильермо дель Торо режиссёр яратэ кышкыт выжыкылъёсты. Татын но гажано жанрезлэсь кыдёке ӧз кошкы: акшан вакыт, тумошо костюмъёс, вампир тусъем актёръёс. Кылпумысь, Том Хиддлстон но Миа Васиковска «Выживут только любовники» киноын вир юисьёсты шудӥзы ни.

Валтӥсь героиня, егит но ненег, синмаське кыӵе ке пиосмуртлы но мынэ со доры улыны. Нош отын… корка тыр периос! Пегӟыны нылаш уг быгаты, соин солы та коркаен нюръяськыны гинэ кыле. Та киноез ачиз Стивен Кинг ушъяз.

P.S. Ляб сюлэмо адямиослы та киноез уйшор дыръя учконо ӧвӧл. 16+

«Макбет». Австралиысь тодмотэм Джастин Курзель режиссёрлэн киноез. Но со понна киноын дано актёръёс шудо — Майкл Фассбендер но Марион Котийяр — кыкназылэн ик «Оскаръёссы» вань. Шекспирлэсь пьесазэ нырысьсэ таӵе бадӟым блокбастер форматэн пукто, дыр. Трейлерез учкыса, «Гладиатор» киноез тодам вайи — сюй, вир, эксэйёс, пӧсь яратон, пунэмзэ берыктон — таиз но кино сыӵе ик учкымон луоно, дыр. 16+

Вера Штыкова

Удмурт Дунне
By Удмурт Дунне Сентябрь 22, 2015 12:22