Ӟеч книга гожтӥське кема, лыдӟиське чаляк. Мускоысь писателен Полина Дашковаен кенешон.

Удмурт Дунне
By Удмурт Дунне Сентябрь 17, 2015 14:35
дашкова

П. Дашкова

Москваысь тодмо писательлэсь Полина Дашковалэсь творчествозэ критикъёс вылӥ дунъяло. Со гожъя детективъёс но историен герӟаськем романъёс. Шаерысьтымы лыдӟисьёсыныз пумиськылӥз «Лыд-ӟиськы, Ижкар!» фестивальын.

Шахматэн шудон кадь

— Мар бордысен кутскиды гожъяськыны?

— Писатель луыса мон вордӥськи ни. Пичи дырысен ик котыр улонэз синйылтылӥ, мае ке тодам кельтылӥ, собере гожъяны но кутски. 10 арескам малпай, роман гожто шуыса. Но нырысетӥ книгаме бер гожтӥ, быдэ вуыса, пичиез нылы будэм бере. Али но син азям пуктӥсько на машинкаен печатлам векчи рукописьме. Сое мон нуи огаз книга поттонние. Лыктӥ: пичи висъет, борддор кузя книга ӝажыос, котыр рукописьёс. Монэ пумитаз жадем тусо адями. Рукописьме вайи, шуисько, кельто. Ну кельтэ, шуиз воргорон, толэзь ортчыса, ӧм жингыртэ ке, берен басьтыны лыктоды. Жингыртӥзы, 2-3 нунал ортчыса. Шумпотэмме кызьы вераны ик ӧй вала. Со йырпоромымон, куке адӟиськод, кызьы тодмотэм адямиос тынэсьтыд книгаостэ лыдӟо. Издательствоын кушем ним малпаны косӥзы, Татьяна Поляченко, пе, умой уг кылӥськы. Озьы, нылылэсь нимзэ но аслэсьтым фамилиме кутыса, выль ним малпай — Полина Дашкова. Эшшо ке пичи дыръям монэ Полина ниманы ӧдъяло вылэм.

— Тӥ детективъёс но исторической романъёс гожъяськоды, та жанръёс ог-огзылы матын шуыса-а?

— Мае мон гожъясько, детективен ниманы уг луы. Россиын, зэмзэ ке, зэмос детектив гожъясьёс ӧжыт. Угось та жанр — шахматэн шудон. Татын валтӥсез луэ тугаськем учыр, герой — кыкетӥ интыын, со бугорез сэрттыны-пертчыны кулэ. Асьме литературамылэн чылкак мукет сям-йылолъёсыз. Произведениын валтӥсез луэ герой, со сярысь ми кулэ ваньзэ тодыны: кытысь со потэмын, кызьы ортчиз солэн пичи дырыз… Соин ик мон шуисько: гожъясько остросюжетной романъёс. Кытын вань кышкыт учыр, герой шӧдэ мукет адямилэн улонэз понна кыл кутэмзэ. Нош историлы сӥзем романъёс сярысь ке, странамылэн быдэс улонэз — остросюжетной. Котькудмылы сое тодыны но валаны кулэ.

— «Небо над бездной» романды. 20-тӥ аръёс, Ленин но Сталин. Со вакытэ история зол сурамын-пожамын.

— 1913-тӥ арын Россия пыре вал 5 тужгес но азинскем странаос пӧлы. Мар кулэ карыны странаен сое сокем зол куашкатон понна? Тае валан понна тырмыт учкыны со вакытысь туспуктэмъёсты. Отысь адӟыны луэ калыклэсь улэмзэ. История — со нырысь ик адямиос. Асьмемын берло 100 ар куспын мар луиз шуыса валан понна вань документъёсты учкыны кулэ ӧвӧл. Тӥ кулэ тодыны асьтэ семьядылэсь историзэ, выжыдэс, маин пӧртэм дыре выризы песянай-песятайёсты. Историкъёслэсь ужъёссэс лыдӟыку, котьку лыдэ басьтоно, соос кин ке пала дурбасьто шуыса. Отын фактъёс мылкыдъёс мышкы ватскемын. Озьы ик луэ лыдӟыны тодэ ваёнъёсты. Ваньзэ тае пыр-поч учкыса, пыртӥд поттыса, валаны луэ историмес, со вакытысь политикаез. Нош историез тодыса, валаломы туала улонмес но.

— Кыӵе геройдылы асьтэлэсь сямдэс кузьмады?

— Писатель котькуд геройзэ ас пыртӥз поттэ. Но мынам альтер-эгое пыӵамын «Золотой песок» романысь Никита Ракитинлы. Со но писатель. Кыӵе югдуре сюре солэн семьяез, сыӵе ик учыре мынамез но вуыны быгатысал. Одӥг пол мон доры вазиськиз городысь лушкаськисьёс пӧлысь тодмо адямилэн пиез. Со малпа вал, улонэз сярысь книга гожтыны кулэ шуыса. Со одно ик луысал бестселлер, соя Голливудын кино пуктысалзы, валтӥсь героез шудысал Киану Ривз. Мон син азям пуктӥ, кызьы бугыръяськоно луоз йыртэмасьёслэн улоназы. Но мар луысал собере мынам улонэным? Мон соосъя ӧй кариськы, нылкышно роман гожъясь авторъёс доры вазиськы, шуи. Со понна та учыр «Золотой песок» книга гожтыны мылкыд сётӥз.

— Шуиськоды, ныры-сетӥ книгады бере ик тодмо луиды?

— Кызьы озьы пӧрмиз, мон уг тодӥськы. Мынам одӥг лэчыт веранэз тодам ваеме потэ — лэсьты мае быгатӥськод, мар луоз — луоз. Яратоно уждэ одно ик сюлмысь лэсьтоно. Мон тодӥсько сыӵе адямиосты, кудъёсыз, пӧртэм амалъёсты кутыса, тодмо луыны тыршо. Но талант ӧвӧл ке, со кемалы ӧвӧл. Урод-а, умой-а нырысетӥ книгаед, сое калык пӧлы чаляк вӧлмытыны луэ. Нош басьтозы меда сое, 10 ар ортчыса, лыдӟозы на меда тынэсьтыд мукет книгаостэ? Таиз сярысь писательлы умой малпаськыны кулэ. Ӟуч литератураын вал сыӵе вакыт — гожъяллязы йыружъёс но йыртэмасьёс сярысь, ӵемысь асьсэос бандитъёс куремъя ик. Сыӵе книгаосты жаг пӧлы куштэм потэ. Таӵе литература ог 5 ар возиськиз, собере куашказ. Сое воштӥз гламур. Таиз но кема ӧз возиськы. Угось мода сьӧры уйиськыса гожтэм книгаос калык пӧлын кема уг уло.

Валантэм вакыт

— Нош кызьы тӥ дунъясалды туала литератураез?

— Ӧжыт сыӵе книгаос, кудъёссэ лыдӟыса быдтӥськод но соку ик выльысен нырысетӥ бамзэ усьтӥськод. Мон понна со Ф. Достоевскийлэн «Братья Карамазовы» романэз. Мон уг лыдӟиськы Д. Донцоваез, Т. Поляковаез, уг яратӥськы соосты дунъяны но. Ми ужаськом пӧртэм жанръёсын. Шуом, туала «конвейерной литератураын» лыдӟымон авторъёс ӧжыт, но соос вань. Зэмзэ ке, умой писательёслэн конкурентъёссы ӧвӧл. Ӟеч книга гожтӥське кема, нош лыдӟиське чаляк. Адями одӥг авторлэсь усто книгазэ лыдӟиз ке, лыдӟоз солэсь мукет произведениоссэ но.

— Туала вакыт сярысь гожтоды-а?

— Али мон уг валаськы, мар луэ Россиен, мар даурто адямиос. Телевизорме 2 ар воксё но уг лэзьяськы ни. Отысь сомында вожпотон кисьтӥське — мыным урод луэ. Мынэ ожен ӵошатымон пропаганда. Адямиос ваньмызлы талы оско. Украинаен герӟаськем югдур буйгатскиз ке, ваньзэ тае йырам бергатыны кутско ни. Оло, соку валало, мар бордысен кутскыны. Нош али мон гожтӥсько 1970-тӥ аръёслы сӥзем роман.

— Кызьы семьяяды учко тодмо луэмды шоры?

— Семьяе но матысь эшъёсы пӧлын мон огшоры адями, соос мынам тодмо луэме сярысь кыл но уг поттыло. Соосты мукетыз сюлмаськытэ: тазалыке гинэ умой мед луоз.

— Туала дыре литератураен вырон сюдэ-а?

— Мон котьку малпасько вал, сюдэ шуыса. Но али малпанэ воштӥське ни. Чаклалэ асьтэос: гожтӥд роман, али дунъёсты лыдэ басьтыса, одӥг книгаед сылоз 500 манет. Собере со потэ вотэсэ — кинлэн мылыз потэ, лыдӟе. Нош книгаос кыллё ӝажыос вылын, уг вузасько, нош милям гонорармы ӧжытгес но ӧжытгес кыле. Со бадӟым ужпум. Западын вотэсысь литератураез дунтэк лыдӟисьёс бадӟым штрафъёс тыро. Нош милям писательлэсь ужзэ уг дунъяло. Но сюлэмез мукетыз шунтэ. Одӥг пол вуз каронниын мон доры лыктӥз песянай но кузьмаз Паскалы пӧзьтэм курегпуз но дун-чылкыт Пантелеймонлэсь оброссэ. Мынэсьтым книгаосме лыдӟыса, госпитальын кыллись пиезлэн азьлань улонэзлы осконэз ӝуатскем, пыд йылаз султоз шуыса, аслыз кыл сётэм. Мон улонысь таӵе учыръёсты трос тодӥсько. Соос бере валаськод, юнме та сюресэз ӧд бырйы шуыса.

Мария Векшина

Удмурт Дунне
By Удмурт Дунне Сентябрь 17, 2015 14:35