Кызьы сюроно Крыме

Удмурт Дунне
By Удмурт Дунне Август 27, 2015 15:27

Адямиос отпусклы быдэс ар дасясько, шуо. Милям весь огпорма: гурт, бакча, нюлэс… Но туэ маке соиз но, таиз но ӧйлась, зорен акыльтӥськиз, потӥз гужеме вуылэм.

Куинь кузя кунгож сьӧры потыны дуногес кадь, соин ик Россимылэн выль улосъёсаз — Крыме но Севастополе — вуылыны малпам. Билетъёс, валамон, поездэ но, самолётэ но ӧвӧл, нош мылкыд бурдъяськемын ни. Кылиз одӥг амал — сюрес вылэ машинаен потыны.

Водительмы бен пумитъяськиз ик — 500 иськемлэсь кыдёке ветлэме ӧвӧл, уг дӥсьтӥськы, но удмурт кышномуртэ кин вормем ин…

Татарстанэтӥ ӝог уд ширты: котькуд гуртын — камераос. ГИБДД-ысь кӧня «салам» вуоз ни меда.

Мынӥськом тодмоосмылэн верамзыя но навигаторъя. Огез мукетызлы уг тупа. Соиз валамон: тодмоос тыл пыртӥ потэмын ни бере, вераллям вакчигес сюресэз, нош навигатор келя, инмысен учкыса — кызьы кулэ. Ми мынӥськом асьме тодэмъя — указательёслы оскиськыса. Бӧрысь тодмоосмы серекъязы: визьтэмъёс, Самара пыр потоно вал, объездной кузя тӥ 50 иськемлы тросгес ортчиллямды…

Сюрес вылэ потыкуды, навигатор сяна, сьӧрады одно басьтэ сюресъёсын карта.

P1020861

Севастопольын вань сиё-дано ужрадъёс ортчыло ярдурысьтызы Выйтэм корабльёслы сӥзем синпелет вӧзын

Ӝытлань вуиськом Саратов улосэ. Тани кытын миым калык бугыръяськиз, Нырысетӥ канал пыр но кӧня ке пол возьматӥзы. Мышкын 800 иськем. Туннэ понна тырмоз, дугдӥськом сюрес дурысь гостиницае. Малпасько, амалэн юаллясько ай кунокуа кузёослэсь. Кузёосыз лымшор палась лыктэмъёс вылӥллям, ӵапак соос но интыысь калык куспын ик керетон ӝуалскылӥз соку. Дунъёссэс сяна, номыр уг верало. Кунокуа: один адямилы инты — 500 манет, машинаез дугдытон инты — 50 манет, кӧш сиён — 150-200 манет.

Нырысь сюремаз гостиницае эн пыре. Куд-огаз вань кухняез но, отын аслыд маке пӧраны луоно. Нош дунъёс одӥг кадесь.

Ӵуказеяз ортчоно быдэс Саратов улосэз — кышкатӥзы, отӥ тужгес урод сюресъёс шуыса.

Озьы ик вылэм — лэймыт сюрес вылысь вуштон вылэ сюриськод кадь. Кӧня ке час озьы лэйкаса, изем потыны кутске. Паллянэ-буре учкиськод, номыр тунсыкозэ уд адӟиськы — котыр бусы-бусы-бусы… Гырымтэ. Писпуос но ӧвӧл. Асьмелэн ик шулдыр. Я, коть тунсыко гурт нимъёс потӥзы: Дворянское, Генеральское… Татын дворянъёслэн поместьеоссы вылӥллям, вылды. Инты нимъёс, нялтас вераса, зэмзэ но, тунсыко наука вылэм — соосъя кунмылэсь быдэс историзэ тодыны луоно. Кылсярысь, Самара улостӥ ортчоно Чапаевск, Энгельс, Маркс городъёс вӧзтӥ. Но тужгес тунсыко нимъёс мыным потӥзы Краснодар улосысь портлы матысь интыосын: Батарейка, Ильич, За Родину, нош Крымысь Бахчисарай ёросын, тодӥськоды-а, кыӵе гурт вань? Приятное свидание! Бордаз ик Счастливое, Радостное, Весёлое…
Волгоград улосын сюрес вольыт, но сюбег. Солань-талань одӥг полоса, нош бадӟым машинаос вистэм-вожтэм мыно, пичиосыз уката но кузьыли мында, виссы ик ӧвӧл, кӧбератэк пумитэ пото. Кытын ке ремонт, кытын ке — авария. Камаз но кыӵе ке пичи иномарка ваче шуккиськемын, машинаос ӝуамын… Бертыкумы отчы венокъёс тыремын ни вал…

P1020757

Укно сьӧрын — гурезь но, зарезь но. Таӵе кунокуаын быдэс семьяен улыны луэ нуналаз 1 сюрс манетэн гинэ.

Эн дыртэ! Сюрес вылын туж трос шӧртчиос, эн тырше соосын вожмаськыны. Машинаяды одно пуктэ видеорегистратор — марысь-мар ке, янгыш муртэ утчанэз уз луы.

Сюрес дуртӥ кытӥ гостиницаос вылысьтыз вылаз, кытӥ воксё ӧвӧл. Ростов улосэ пеймытэн пырим. Дугдонтӥ ум шедьтӥське.

— Мыном на, туннэ ичи ортчим, сотэк ӵуказе но зарезь дуре ум вуэ, — ваменске водительмы.

— Ум! Сотэк зарезь дуре воксё ум вуэ!

Воргоронъёсы мон шоры паймыса учко: мар-о, бусы шорын изём-а? Интыяськиськом бусы шоры. Нялтас вераса, татын солы паймонэз ӧвӧл, сюрес дур — ас кожазы шутэтскыны мынӥсьёслэн яратоно интызы: татын сисько, бушатско, кӧло, бӧрсязы вань жобзэс кельто… Чылкытгес инты утчаса, поттӥськом спальной мешокъёс, но шобрет кулэ уг луы — ӝокыт, куазь уг зоры. Ӵукна шундыен ӵош сайкаськод шундыберганъёс пӧлын. Чебер. Татын ик сьќрамы басьтэм газ вылын чай пӧзьтыса, гусъяськыса, ширтӥськом азьлань. Ӝоггес вуэм потэ зарезь дуре. Ӝоггес уг пӧрмы — Краснодар улосын котькытын ремонт. Сюрес лэсьтӥсьёс машинаосты черодэн одӥг полосатӥ лэзё. Одӥг интыын, уд оскелэ, вырӟылытэк кык час сылӥм! Эшшо час ӵоже мынӥм ӵӧжъёс музэн. Табере мон тодӥсько, мар со 35 градус пӧсен пробкаын сылон.

Машинаяды котьку возе юзмыт ву, эмъюм. Мӧзмонлэсь уте журнал-газет.

Чугун сюрес переездъёсын но сылӥськод каньсыраса. Нош со дыре татысь адямиос бизнес лэсьто. Киязы «300 манет» гожтэмез адӟыса, нырысь мазэ-созэ ӧй вала, эшъёсы лӧптыны ӧдъям бере нош воже потӥз. Котыр сюрес, пе, ӵекто, кытӥ ке гурт сьӧртӥ. Сылом, укыр шумпотозы. Мукетъёс но та нунал гуртоосты ӧз узырмытэ кадь.

Темрюкысен зарезез адӟыса, чаклам интые вуэм кадь потэ ни, но та Крым ӧвӧл на — Азов. Пролив туж матын ни, кыле на паромен выжыны. Сюрес дурысь кафеын кышкато: пароме пырытозь, ӝыны уй «отстойникын» сылоды на…

Ярам, та рад кышкатъянзы ӧз быдэсмы — накопителе пырем дырысен Керчь пала потытозь, 3 час ортчиз (бертыкумы — 2 час). Портын вань пуконъёсын шутэтскон зал, кафеос-буфетъёс.

Озьы, куинь нунал мыныса, ми Крымын! Но шутэтскон интые вуытозь, эшшо кӧня ке ортчоно на. Зэм, 2 сюрс 400 иськемен ӵошатыса, со номыр кадь уг йӧты ни. Приморске вуон азьын кык-куинь иськем азьлапал сыло ни улон инты ӵектӥсьёс. Ноку но соку ик соглаш эн кариське. Нырысетӥосыз милемлы 2 сюрс манетэн улон инты ӵекто вал, кыкетӥосыз 1 сюрс 500-эн, куинетӥосыз кыскаса сямен сьӧразы нуизы куиньнамы вылысь 600 манетэн. Шукрес ӧвӧл, но валес чылкыт, кухня, душ, сьӧрос вань — одӥг уйлы мар кулэ на, угось џуказеяз ми малпам Ялта пала шонтыны. Огласянь, машинаен усто — одӥг ветлэмен пырам Феодосие, Коктебеле, Судаке. Котькудаз одно ик кожам пляже, одӥг ке но музее, крепосте. Мыным мусо потӥз Коктебель. Судак дуногес, но чылкытгес. Туристъёсты ас бордаз кыске Генуэзской крепостеныз. Вырӟиськом Алушта пала. Судаке ик кылёно вылэм, угось гурезьёсысь 80 иськем серпантин сюресъёстӥ мынонэз ӧйтӧд маин ӵошатод — шурдыса лул потӥське вал.

P1020871

Крымын тужгес тунсыкоез — «Греция». Вашкала грекъёслэн Херсонес городзы табере культурая памятник луэ.

Кинлэн гурезь сюресъёстӥ машина нуллэмез ӧвӧл, быръелэ котыр сюресэз — кӧня ке иськемлы тросгес ортчоды, но со понна вольыт азьтӥ сокем кышкыт ӧвӧл.

Алушта бере вылысьтыз вылаз сюро пичи посёлокъёс. Пляжъёс интыяськемын сюрес дуре ик, шутэтскисьёсыз лачак. Морское, Рыбацкое посёлокъёсын туристъёс ву дурын ик уло — татын палаткаослэсь быдэс городок. Кин ке лыктэмын прицепен — «ачиз ветлӥсь коркаен». Адӟиське, адямиос арняен-арняен шутэтско: татын радъямын сиён пӧран инты, сьӧрос, котыр дӥськут ошылэмын, навесъёс лэсьтэмын. Люкс ӧвӧл, но со понна дунтэк. Ми тазьы шутэтскыны дась ӧвӧл на. Дугдыны вераськиськом Партенитэ яке Гурзуфе — отчы эшмы туж ӵем ветлэ, туж ушъя: Ялталы но матын, чылкыт но, дунтэм но. Дугдӥськом «Сдаётся квартира» таблицаен машина доры. «Бизнесмен» капчи мылкыдо пумитамы потэ. Сюрс манет, шуэ. Адямилы быдэ? — куалектӥсько. Куиньнады вылысь, пе. Ми шумпотэменымы ӝогак соглаш кариськиськом. Николай милемды пырак Артек доры вуттӥз, коркаез Аю-Даг гурезьлэсь ог 300 метр кемын гинэ. О, мар суред со! Укно дурысь коть эн ик кошкылы: чильпырась зарезь, йӧно гурезь, зарнивуам черк, лыз-лыз инвис, тӧдьы вучайыос… Малосемейка шуонтӥын ваньмыз вань: телевизор (одно ик Россиысь каналъёсын), плита, холодильник, кондиционер, чылкыт душ, туалет… Астэ шӧдӥськод дорын кадь. Корка кузёлэн кышноез, литва выжыысь кышномурт, маде, кытын мар интыяськемын, кызьы мыноно базаре, черке, музее, кыӵе тунсыко интыосы ветлыны луоно, кытысь мар дунтэмен басьтоно. Удалтӥз ке удалтӥз!

Зэм, ӵуказеяз мукет шутэтскисьёсын вераськыса, тодмо луиз: квартира шедьтыны луэ 600 манетэн но, нош «сарай» (озьы шуо частникъёслэсь пичи пристройёссэс) — 300-400 манетэн. Кинлы кызьы удалтоз. Уйин вуисьёслэсь тросгес кыско. Николай аслэсьтыз патерзэ гинэ уг ӵекты, сюрес вылэ со пота нуналлы быдэ: солэн базаяз кӧня ке адрес: «сарайёсысен» кутскыса, коттеджъёсозь. Паймытӥз: коттедж, пе, сылэ суткаяз 2,5-5 сюрс манет гинэ (гостиницаын одӥг инты сомында).

Дунтэмгес улон инты шедьтыны луэ… Интернет пыр. Со сяна, ӧжытгес дун пукто кемалы квартира курисьёслы.

Гурзуфын сокем кельшиз — вить нуналлы татчы аналским. 90 ар талэсь азьло ӵап татчы юнме пуктӥллямтэ нылпиослы «Артек» калыккуспо лагерез — татын, пе, тужгес чылкыт инты.

Ялтае нырысьсэ ум вуиське, номыр воштӥськымтэ. Пляж, Гурзуфын сярысь, кырсьгес, калык тросгес. Дунъёсын токма кышкатӥзы — квартираос мукет интыосынлэсь шӧдскымон дуно ӧвӧл. Сиён-юон дун быдэс Крымын огкадь — асьмелэсь ог 20 процентлы дуногес. Но котькуд пляжын, кафеос сяна, вань столовойёс, отын сиёнлэн ӟечлыкез урод ӧвӧл, но шӧдскымон дунтэм.

палатки 1.jpg2

Зарезь дурын гужем кылдо «дикарьёслэн» гуртъёссы.

Сьӧрады одно басьтэ наличной коньдон! Сбербанк Крымын уг ужа на. Тыриськыны луэ Мастеркард картаен яке вашкала сямен — киысь кие коньдонэн.

Севастопольлы кыле на кык нуналмы гинэ. Вераським, татын пляжын дырмес токма ум быдтэ, тодмо-дано интыостӥ ветлом. Озьы ик карим. Но тросаз ик ӧм вуттӥське. Севастополь уго историен укыр узыр город. Кык войнаез пырпотыса выльысь улӟем интыен татын улӥсьёс туж данъясько. Со нуналъёсы ӵап дасясько вал Военно-морской флотлэсь вордӥськем нуналзэ пусйыны, нуналлы быдэ репетициос ортчыло. Нош парадзэ адӟон понна дунтэк инты кутыны адямиос, пе, площаде 3 часын уйин мыно ни. Кӧлӥсьёслы ӵекто трибунаосы дунын билет — 1 сюрс 800 манет.

Кык нунал ӵоже Херсонесэ, Панорамае, Малахов курганэ сяна ӧм вуттӥське — дыр быриз, сюрес вылэ потоно. Жаль, сомында адӟытэк кылиськиз. Куке вуылоно на вал.

Эн сётэ коньдондэс ульчаын сылӥсь менеджеръёслы — мынэ пырак музее, шыръялоды ог 500 манет котыр. Пиналдылэсь арессэ кулэстэ, асьтэлэсь ватсалэ (школьникъёслы но пенсионеръёслы — скидкаос, документ уг куро).

…Городысь потӥськод но — кыӵе ке верантэм шумпотонэн пачыласькод, угось табере сюрес нуэ доре! Табере со тодмо, ӧжытгес йыромылӥськод, шергес дугдылӥськод. Форумъёсын тросэз малы ке гожто: сюрес вылэ шутэтскон нуналэ эн потэлэ. Милемлы ӵапак субботае-арняе бертыны яраз — сюрес вылын машинаос шӧдскымон ичигес. Зэм, чылкак приключение шуонтэк бертыны ӧз кылды. Шутэтскыны дугдылыку, Самараысь водительёс Татарстанэ потыны дэмлазы выль сюрестӥ — отӥ, пе, ӝоггес луоз. Мар бен, вакчигес ке, дорлы матынгес, куазь пеймытэн ни кожим тодмотэм городэ. Со пыр потыса, мынӥськом-мынӥськом бусыетӥ, кулэ интые ум вуиське. Кин ке бен уйбыт но руль бергатэ, но милям йырмы укыр дуно, кышкаськом. Мыныкумы бусыын кӧлӥм ук, дышем сямен ойдо ог уйзэ чидалом на, ӵектӥсько. Эшшо кӧня ке иськем мыныса, сюрес урдсы пыриськом. Жадем вылысь соку ик умме усиськом. Сайкаськом… шайвыл дорын. Оло бӧрдод, оло серекъялод. Юри но уд малпа шуэм мактал.
Нуназе котыр Иже вуом ни. Инмарлы тау, озьы ик луиз. Тунсыко шутэтским, однако, но… жадим. Отпуск — секыт уж, сое радъяны быгатон кулэ вылэм.

Ольга Зорина

Удмурт Дунне
By Удмурт Дунне Август 27, 2015 15:27