Швейцария — уксё возён шыкыс

Удмурт Дунне
By Удмурт Дунне Июль 6, 2015 12:43

Ужано кунгож сьӧрын, улоно Россиын? 

Ижысь Евгений Исупов котыръяз ни быдэс дуннеез: коньдон дурыны вуттӥз США-ын, Англиын, Финляндиын. Нош таяз радэ сое гочатӥз Швейцария. Маиныз меда?

Гань-гань

Женя Исуповен вераськимы скайп пыр.

— Пӧртэм кунъёсты адӟи ни, нош такем гань-ганьзэ — ноку но! — шуэ Евгений. — Нокин нокытчы уг дырты, номырлы уг ӝожтӥськы, нокинэ уг курла! Воксё паймиськод — ма, таослэн огпол ке но пӧсекъямзы, маке сярысь сюлмаськемзы вань меда? Мон кадь гастарбайтеръёслэн гинэ ке шат…

— Швейцария — Европаысь самой узырез кун, нош люкам коньдонэзъя — дуннеысь вань странаос пӧлын 2-тӥ интыын, Америка бӧрсьы. Толэзь ӵоже шоро-куспо уждун отын 5 сюрс евро пала (300 сюрс манет). Та кунын ужаны лэзись виза басьтыны пӧрмытӥд ке, озьыен, туж удалтӥз!

Швейцарилэн экономикаез кужмо, соин ик Европаысь мукет кунъёсын улӥсьёс люкам коньдонзэс Швейцариысь банкъёсын возьыны выро — процентъёсыз лачак люкасько. Одӥг кылын вераса, Швейцария пыр быдэс дуннее вӧлме кузь коньдон. Татын улӥсьёслэн ужзы одно ик коньдон ужпумъёсын яке кыӵе ке калыккуспо огазеяськонъёсын герӟаськемын луоз. Толэзяз ичизэ 10-20 сюрс евро (600 сюрсысен 1 миллионлэсь ятыр манет) басьто. Таосын ӵошатыса, дышетӥсьёслэн, эмъясьёслэн уждунъёссы шӧдскымон ичи — та удысъёсын тыршо Европаысь мукет кунъёсысь вуэмъёс. Но Россиысь лыктэмъёслы школае я больницае интыяськыны секытгес: диплом ласянь чурытэсь куронъёс пуктӥсько — со Европаысь дышетон системалы тупаны кулэ. Со сяна, эмъясе яке дышетӥсе куриськисьлы туж ӟеч тодоно Швейцариысь одӥгзэ ке но кун кылэз — немец, итальян яке француз кылэз. Тунсыко: быремын ӧвӧл на Швейцариысь тужгес вашкалаез кыл — романш, соин вераське 0,7 процентэз калык.

— Татчы вуыса, валаськод Евросоюзлэсь пуштроссэ, — азьланьтэ Евгений. — Швейцарие тон вуэмын ке та огазеяськонэ пырись кунысь, озьыен, уже интыяськон ласянь нокыӵе шуг-секытъёс уз кылдэ, ватсаса документъёс но утчанэз уз лу. Со сяна, капчиен выжыяськыны быгатод Швейцариысь кыӵе ке шыпыт сэреге… Но кыӵе ке огазеяськонэн кивалтыны уд пишмыты: кивалтӥсь луыны быгатэ та кунлэн паспортэныз адями гинэ. Но палэнысь вуэмъёс лушкем ужаны дышизы ни: Швейцариысь кыӵе ке муртэ бумага вылын гинэ кивалтӥсь каро но та понна солы толэзьлы быдэ уксё тыро. Таосыдлэн ужатэк но кисызы тыро!

Швейцариын кышномуртъёслэн уждунзы 30 процентлы ичигес, воргоронъёслэн сярысь. Но со понна нылкышноослы пӧртэм пособиос висъясько: нылпи ваён-утён, юрт котырез возён понна. Швейцариысь уноез кышноос уг ужало. Но асьме кышномуртъёс сямен, уен-нуналэн пиналзы бордын уг пуко: соослы юрттӥсько няняос, нош таосыз ӵем дыръя — Россиысь я Украинаысь лыктэм нылъёс.

19-3-2

Улон инты туж дуно: квадрат метрез — 15 сюрс евроысен.

Чурыт

Та кун тужгес узырен лыдъяське ке но, уд адӟы зарнизэс-ваньбурзэс шара возьматӥсь адямиосты. Татысь калык такем байкиз, дыр, шырыт улыны быгатэменыз. Уждунзы ичи ӧвӧл ке но, соос дунозэ басьтыны уз дыртэ. Тае адӟыны луоз сиён-юон басьямзы вылысь но: Швейцариын со укыр дуно, басьяськыны потало бускель Францие. Одӥг ласянь, шонер кадь — мар дунозэ басьянэз. Нош мукет ласянь, уксёдэ мар сокем шыръялод меда, толэзяз миллион манетлэсь ятыр уждун басьтӥськод ке… Но ӵапак та учырын ик шараяське швейцарецъёслэн аспӧртэмлыксы.
Асьсэос сярысь соос серемпыр верало: странамы, пе, милям самой веськрес, тодӥськомы ук сиёнлэсь дунзэ — мултэссэ ум сииське. Зэм но, Европаысь кунъёс пӧлын куаёнэн курадӟисьёслэн лыдзы тужгес но ичи Швейцариын, нош азьпал радын — Великобритания.

— Татысь калыклэн шырыт луэмез адӟиське ву вылын но: асьмеос кадь отын нокин но пуж-пуж уг мисьтаськы! — веранзэ азьланьтэ Женя. — Мисьтаськон машина бырйыкузы но, нырысь ик чаклалозы, трос-а ву быдтэ со?

Экономиказылэн эшшо одӥг аспӧртэмлыкез: Европаысь вань кунъёс пӧлын Швейцариын тужгес но пичиесь вытъёс. Со сяна, законэн лэземын армилэсь палэнскыны — со понна кунлэн бюджетаз берыктоно луод 30 аресозяд поттэм вань доходэдлэсь 3 процентсэ. Но уксёлы шырыт-чурыт луэменызы таӵе амалэз кутӥсьёс трос ик уг люкасько. Ма, аръёсын служить каронэз ӧвӧл ук. Пенсие потытозяд, арлы быдэ одӥг арня кыстӥськись военной сборъёсы пыриськид ке — ярам. Вылаз ик, та понна 2 поллы тросгес уждун басьтод.

19-3-3

Тӥям куко пукон возьматэ ожъёслы пумит луонэз — калык медаз сӧсырмы власть понна нюръяськонын!

Чал-чал

— Мон понна абдрамон таиз но: Швейцариын нокин уг нюръяськы шузимытӥсь суретъёслэн вӧлмеменызы, — пайме Е. Исупов. — Врач рецепт сётыны быгатоз кыӵе ке шузимытӥсь сурет басьтыны. Эшшо ке наркоманъёслы юрттэт висъяське сиён-юон, улон инты ласянь. Кун лыдъямъя, наркоманъёсын нюръяськон бюджетлы дуногес усе, шузимытӥсь суретъёсын, кӧттыронэн-сэреген юрттон сярысь. Адямиослэн мылкыдзы ӟеч луиз ке, йыртэманы кулэлыкез но, пе, уз лу…

Швейцариын улӥсьёс туж гажало шыпытэз. Ӝытазе 10 час бере, урамъёсын гинэ ӧвӧл, коркаосын но чылкак чус луэ. Душын мисьтӥськыны гинэ но уг дӥсьто ни, сьӧросын вуэз но чакласькыса лэзё — нокыӵе куара но медаз люкеты бускельёслы. Макем вазь шыпыт луоз но макем тырмыт изёд, сокем пайдаё ужаны пӧрмытод вуись нуналэ. Нош макем ӟеч тыршод — сокем ӝог узырмод. Та малпан мур пыӵамын ни Швейцариын улӥсьёслэн йыразы. Чусэз тӥясьёслы чакламын бадӟым тыриськонъёс.

— Ӟучъёс татын лачак, — вера Евгений. — Но воргоронъёслы татчы выжыяськыны секытгес: пыртосэ кельтыны мылкыд карисьёс уг шедё. Нош Россиысь но Украинаысь нылъёсты Швейцариысь воргоронъёс бадӟым мылкыдын кышнолы басьто. Таиз но уксёлы чурыт луэменызы, малпасько: ӟуч кышнолы коньдон тыронэз ӧвӧл — со пӧраськоз но, утялскоз но, киужен но выроз. Дунтэк, ассэ жалятэк, «кышно ук мон» шуыса. Нош Швейцариысь нылкышноос асьсэ сярысьгес сюлмаськыны дышемын — ваньмон дырзэс, пӧраськыса, шок-пуль ужаса, уз ортчытэ. Шутэтскыны мынозы, книга лыдӟозы яке телевизор азьын пукозы. Но соослэн асьсэ сярысь сюлмаськемзы, меӵак вераса, чик уг адӟиськы: урамъёсысь ӵем синйылтод лусьтыр-ласьтыр дӥсяськем, буяськымтэ, сынаськымтэ нылкышноосты…

Евгений Исупов Швейцариын коньдон дурыны чакла ог ӝыны ар ӵоже, тырше со автозаправкаын. Ижысь улон интыме, пе, Америкаын поттэм коньдонэным выльдӥ, нош Швейцариын дурем уксёеным, пе, бертыса сюан ортчыто.

Елена Никитина

Туспуктэмъёс вотэсысь басьтэмын

Удмурт Дунне
By Удмурт Дунне Июль 6, 2015 12:43