Кунэз утё Россиысь туристъёс

Удмурт Дунне
By Удмурт Дунне Июль 7, 2015 11:45

Кылэз тодон — ӟеч капитал

Удмурт кун университетысь кунгожсьӧр кылъёсъя институтысь дышетӥсь Юлия Терёшина котькуд гужем кытчы ке но вуылыны тырше, англи кылэз тодэмзэ волятэ.

budva-1

Будваысь синпелет.

Сьӧд нюлэсо кун

Россиысь калыклы туж кельше Черногориын шутэтскыны. Отчы виза басьтонэз ӧвӧл — потыны лэземын 30 нуналлы. Инкуазез но туж шулдыр: гурезьёс вискын — лыз зарезьёс, чылкыт омыр, вож-вож нюлэсъёс. Черногорилэн нимыз но потэмын сьӧд нюлэсъёсын шобыртэм гурезьёслы луыса. 1992-тӥ арысен та кун пыртэмын дуннеысь тужгес но чылкыт интыос пӧлы, отын алэмын производство радъяны.

— Будва городэ вуыса, син шоры йӧтӥзы урамын вуз карись воргоронъёс, — вера Юлия. — Огезлэсь пӧртэм йӧноесь, кужмоесь, егитэсь, нош басьясьёслы ӵекто чыры-пырыос: я мульы, я оливка вӧй, я зарезьысь кутэм чорыг. Котьма ке но, асьмелэн егитъёсмы озьы, векчи товарен вуз карыса, уз пуке, йӧн-йӧнгес интыын уж утчалозы. Кафеос борды юнматэмын нимысьтыз адямиос, ураметӥ ортчись калыкез соос кужмысь сямен сиськонниязы пыртыны выро. Сотэк кафелэн табышез уз люкаськы, пичи поттэм барышсэ но вытъёс «сиёзы».

Балкан шормуӵысь кунъёсты зол сӧсыртӥз Югославиын ож. Сербия но Черногория соку, 2006-тӥ арын, нимазы кариськизы. Та ожен йырин Балкан шормуӵысь кунъёс пыд вылазы султыны ӧз ворме на. Черногориын, кылсярысь, та ож бере дунъёс инмозь тэтчизы, производство дугдӥз. Вылаз ик, кун экологияя нимысьтыз зонае пыртэмын, таин сэрен промышленностья предприятиос ужзэс уретоно луизы. Берло аръёсы пытсаськиз 1 но ӝыны сюрс огазеяськон, уно калык ужтэк кылиз. Соос амалтэк басьтӥськоно луизы чыры-пыры уж борды.

Будва городысь гинэ пумиталод луо пляжез: Черногорилэн мукет интыосаз со векчи кӧльыослэсь. Туристъёс сомында — выдыны-пуксьыны инты уд шедьты. Вамышлы быдэ чузъяське ӟуч кыл, ма, черногорецъёслы но секыт ӧвӧл ӟуч сямен лабыртыны: кылъёслэн выжызы одӥг. Пляжын ву вылын радэн-радэн сыло яхтаос, пыжъёс. Гужем Черногориын улон пӧзе — туристъёслэсь кӧня быгато, сомында коньдон кысконо. Сӥзьыл зоръёс кутскизы ке, табышсы чик уз луы ни.
Тужгес удалтэмын круизъёслы чаклам лайнеръёслэн капитанъёссылы: соос толэзяз 2 сюрс евро (140 сюрс манет пала) басьто, пе. Огшоры пыжъёслэн кузёоссы туристъёслы ӵекто зарезетӥ ворттылыны, чорыганы — та понна куро 6 евро (420 манет). Кутэм чорыгдэ аслыд ик сёто, сое кафее нуыса, син азяд ик сиён пӧраны быгатозы. Но та понна кисыдэ дася: 20 евролэсь (1 сюрс 300 манет пала) ичи уз басьтэ.

2010-тӥ арысен Черногория — Евросоюзэ пыртыны кандидат. Таин валче кунлы амалтэк пыӵатоно луэ ни Еврозоналы тупась куронъёсты. Кылсярысь, кун быдэсак выжиз евро вылэ. Балкан ож бере кыштыр юнманы кутскись экономиказы нош ик зурканы ќдъяз: огазеяськонъёслы азинскыны табере эшшо но секыт луиз — та ласянь соосты зӥбо Евросоюзлэн чурыт куронъёсыз. Черногорилэн кун долгез уно миллиард евроосын лыдъяське.

Та учырын Черногорилы лыдэ басьтоно вылэм Грециын кылдэм югдурез. Таослэн но экономиказы рос-прос юнмамын ӧй вал, Евросоюзэ пыризы — солэн юрттэтэз кунзэс гуысь поттыны юрттоз, малпазы. Но табере адӟиськомы: Грецилэн экономикаез воксё куашкатэмын, талэн бервылыз уно дасо аръёсын шӧдӥськоз огшоры калык вылын. Но Черногорилэн президентэз Филипп Вуянович кылем арын итӥськиз Евросоюзлэн Россилы пумит санкциосыз борды. Лыдэ ӧз басьты Россиысь туристъёслэсь, ваньбур басьтӥсьёслэсь люкаськись табышез, нош ӵапак соос вылын та дырозь возиськиз Черногорилэн экономикаез.

— Черногориын улӥсьёс верало: зэмос капитал — ӟуч кылэз тодон, — азинтэ веранзэ Юлия. — Ӟуч сямен вераськыны быгатӥд ке, сютэм уд кулы, пе.

Зэм но, Черногориез туж гажало Россиысь туристъёс. Ичи ӧвӧл татын улон инты басьтыны мылкыд карисьёс но. Таӵеос вань ини Удмурт шаерын но. Но Черногория Россилы пумит санкциосын соглаш кариськиз бере, та шӧдӥськытэк уз кыльы шутэтскисьёслэн лыдзы вылын.

Драгонлэн осконэз

— Пыжен ворттылоно кариськимы, — тодаз вае Ю. Терёшина. — Чылк-чылк тулкымъёс вылтӥ лэйкаса кадь пыжен мынӥськомы. Котырак — вож гурезьёс, зарезь шорын ик пумиськыло пичи шормуӵъёс: таос вылын излэсь юртъёс сыло. Синэз воштонтэм чебер суред! Пыжмылэн кузёез — 45 аресъем Драгон нимо черногорец. Ӟуч кылын со усто вераське ни. Тау, пе, со понна Россиысь туристъёслы. Кисы бордаз но шуккылэ — таиз понна но тау карисько, пе, соослы. Драгон егит дырысеныз ужамын Черногориысь алюминий поттон заводын. Но производство дугдытэмын вал, калык ужтэк кылиз. Ӵап соку Черногориын туризм паськытаны ӧдъяз. Драгон кема ӧз малпаськы, пыж басьтӥз, табере тани туристъёсты нуллэ-шумпоттэ.

— Толэзяз 400 евролэсь (28 сюрс манет пала) ятыр шер люкаське. Конкуренция татын бадӟым, мон кадь пыжъёсын адямиос зарезь дурын лачак, — шуэ со. — Туристъёс татчы уксёен лыкто, яхтаен яке лайнерен ворттылыны мылкыд каро. Соосын вожвылъяськыны милемлы секыт. Доходысьтым 100 евро (7 сюрс манет) мында кошке электроэнергия понна тыриськонлы, 20 евро сётӥсько вулы вытлы. Евросоюзэ пырыны турттӥськом ук, нош отын коммунальной услугаос туж дуноесь. Нокин лыдэ уг басьты пичи табышмес. Сӥзьыл зор-котъёс кутско ке, электрокужымлы эшшо тросгес кошке. Шунтӥськыны огъя системамы ӧвӧл, котькуд юрт быгатэмезъя аслаз техникаеныз шунтӥське. Озьы 170 евро (12 сюрс пала) кыле на ужтэк пукись кузпалме сюдыны, пиме будэтыны, юртме возьыны.

Ву вылын, шунды шорын гужембыт уяса, Драгонлэн куэз воксё сьӧд-сьӧд луэмын ни. Тӧдьы пиньёсыз гинэ чиляло. Туж кышка туристъёслэн кулэсмемзылэсь. Йыр бордаз кырмиське: мар каром соку, кызьы семьяме сюдом?!

Евроинтеграцилэсь номыр ӟечсэ уг витё Черногориысь фермеръёс но. Вытъёссы ӝутскозы, музъемез яке техникаез арендае кутон но туж дуно усёз. Та гинэ мар! Ӝажыоссы тырмозы Евросоюзысь мукет кунъёсын поттэм вузъёсын. Черногориысь фермеръёслы соосын вожвылъяськыны туж секыт луоз, производствозэс амалтэк пытсалозы.

Тужгес но паськыт вӧлмемын татын оливка будэтон но солэсь вӧй лэсьтон. Куд-огез выре сӥль поттонэн. Сое ӵынатыса, лэсьто калык сиёнзэс — пршут. Вамышлы быдэ — базаръёсысь, пичи лавкаосысь — пумиталод быдэс макесэн ӵынатэм парсь сӥлез. Сое вӧлэм кадь юдо но, кин маин сие ини — узыен но, бакча емышен но. Черногорецъёс верамъя, нылкышно, пе, одно пӧраны быгатыны кулэ сӥлен тырмытэм перецез но ӵынатэм сӥлен фасолез. Тазэ пӧрмытӥз ке, озьыен, нылашлы бызьыны дыр вуиз. Нош воргоронлы семья кылдытэмезлэсь азьло 5 оливка писпу, пе, мерттоно. Нялтас вераса, ӵапак Черногориын, Бар городын, сылэ Европаысь тужгес мӧйыез олива — солы 2 сюрс арлэсь ятыр. Йыре уг тэры малпан: со будыны кутскем ай Иисус Христос вордскемлэсь азьло. Та сяна но Черногориын ӧжыт ӧвӧл синпелетъёссы. Кылсярысь, Монтенегро городын интыяськемын Черногориысь Негош философлэн мавзолеез. Со пуксемын гурезь йылын: 700 пагӟаетӥ тубоно. Отысен адӟыны луэ быдэс Черногориез.

Та кунын, горд липетъёс сяна, син шоры йӧто дӥсез куасьтыны кыскам гозыос. Котькуд юртлэн нимаз ӧвӧл соос, быдэс ульчаослы огъя кыскемын. Дӥсез нокин уг лушка, дорын кадь лякыт мылкыд кылдэ: быдэс городэн одӥг семьяен кадь уло. Черногорецъёс пусъё: адямилэн тужгес но бадӟым узырлыкез но кужымез семьяез бордын. Таиз шӧдӥське вамышлы быдэ. Ӵем пумиталод, кылсярысь, 3-4 нылпиосыз котырын бергась атаез: со нокинэ уг адӟы, уг кылы — со семьяеныз шудо. Нялтас вераса, та кунын туж ярато пиналъёсты. Муртлэн пиналыз-а со, тодмоедлэн-а — вӧзтӥз вешатэк кошкыны уз быгатэ. Та бордын ик Черногорилэн аспӧртэмлыкез.

Елена Никитина

Удмурт Дунне
By Удмурт Дунне Июль 7, 2015 11:45