Эстониын улон-вылон сярысь 10 тужгес но пумиськылӥсь юанъёс, маде Ирина Зангарик.

Удмурт Дунне
By Удмурт Дунне Июль 2, 2015 14:34
зангарик

Эстониысь дышетскем Ирина Зангарик.

Ар ӵоже Эстониын дышетски. Кыӵе юанъёссы кылдо адямиослэн та страна пумысен?

1. Ӟучъёсыз уг ярато отын?
Котькуд нунал тышкало! Ульчае потыса уг вуттӥськы, кин ке, мыжыкъёсыныз шонаса, дорам лыктэ ни. Лыз-вож ымнырын ветлӥсько. Улӥськом кышкаса, куарамес поттыны дӥсьтытэк. Тӥ, зэмзэ но, озьы малпаськоды? Бен, котькытын но национализмен висись адямиос сюро, но оске, дунне вылын адекватной адямиос тросгес!

2. Отын удмуртъёсты тодо-а?
Кӧня ке тодо, малы ке шуоно Эстон шаерын ог 300 удмурт улэ. Кызьы соос татчы вуизы? Мон уг тодӥськы! Инмар гинэ тодэ, дыр. Оло, дунтэк wi-fi яке карт утчаса?
Со сяна, 9 толэзь ӵоже (кыл сётӥсько!) нуналаз одӥг пол ке но ми Настя эшеным вераллямы удмуртъёс, финъёс, эстонъёс, венгеръёс, пельнянь, Брангурт песянайёс сярысь. Валамы: сыӵе «лекциез» лякытгес радъяны ӝытазе яке уйин, барын яке клубын капчиям студентъёслы. Час ортчыса, соос асьсэлэсь нимзэс но уг ни тодо, но капчиен вераны быгато Удмурт Элькунлэсь быдӟалазэ.

3. Европаын умой уло, дыр?
О-о, соос ветло зарниен чеберъям азвесь сьӧросэ, сиськем бере ымдурзэс 100 евро купюраен ӵушыло. Коркаосазы, бразильской сериалъёсын сямен, пыдкутчанэн ветло. Соос понна «неевропейской» прислуга сиён пӧра, утялске, нылпиоссэс уте. Ватсаса, котькудӥз европеец англи кылын анай кылыныз сямен вераське, конечно, мынэсьтым но Настялэсь тузӥгес! Ми Европаысь ӧвӧл ук!

4. Эстонецъёс гызмылтӥсесь-а?
Так-то озьы быдэс дунне малпа, кадь. Но соос ӧвӧл тормозъёс. Эстонъёс шайтанъёс кадь шутэтско но юмшало! Ӵукнаозь! Нош ӵукна сайкало но тулыс сяська тусын дышетскыны кошко. Эстонъёс самоироничноесь. Соос уг возьдасько асьсэ яратоно чорыг сиёнзы, аспӧртэм кылзы, куазьзы сярысь серекъяны. Соос уг ярато юнме вераськыны, тужгес но кудӟытозязы. Кӧня ке ӟузьыны шедьто ке, ымзэс уд пытса ни: «Удмуртъёс — милям родняосмы», «Ойдо кырӟалом эстон кырӟанъёсты», «Песянайме Сибире келязы», «Тон дунне вылын самой ӟеч адями! Тон мынам удмурт сузэре! Ум люкиське, ум люкиське, ноку но ум люкиське! Сябась!» Эшшо соос, удмуртъёс сямен ик, тодмотэм адямиослы уг оско, мурт каро, но одӥг пол сазь дыръязы тонэ эш каризы ке — пыраклы! Таяз аре мыным кылдӥз синмаськем эстон синъёсты адӟыны, эстон курыт синкылиосты ӵушылыны но эстон кӧтӝожез кылзыны.

5. Уд мӧзмиськы-а?
Уг мӧзмиськы! Анай-атае доры бертасал, бакчае потыса, кияр сиысал, матысь эшъёсыным адскысал, кунояськысал но берен кошкысал. Зэмзэ вераса, мыным эстон омырен туж капчи шокаське. Яратоно эше котьку вӧзам, анай-атайме котькуд нунал скайпысь адӟисько. Университет студентъёслы сётэ тузӥ лыдӟиськонни, Эстон шаер — дунтэк wi-fi, Лённарт Мери нимо фонд — тырмыт стипендия.

6. Туган шедьтӥд ни-а отысь?
Яратоно юан! Кылӥськом ялан! Соин йырингес туганэным авка пуктӥ «ВКонтактее». Туган сярысь юанъёс огвакытлы вуэмысь дугдӥзы. Кыкетӥ тулкым вуиз выль юанэн: «Кытысь бон туганэд?» Туганэ Германиысь. Кылдӥз ке — бызё. Юри сое ӧй утча. Тузӥ удмурт сюрысал ке, удмуртлы но бызьысал! Татчыозь тузӥ удмурт нылъёс гинэ сюрылӥзы. Хм.. Тоже урод ӧвӧл…

7. Мар сиыса отын улӥськоды ни?
Толэзьлэн кутсконаз — авокадо, пицца, сок, ческыт сиён. Куддыръя ресторанын, кафеын, столовойын. Толэзьлэн пумаз — сьӧдчабей ӝук но ву.

8. Англи кылын умой вераськиськод, дыр, ни?
Эстоние кошкытозь но, туж ик урод уг вераськиськы вал. Но, аудиториын пукыса, ортчем дырез дышетод-а яке нуналаз 24 час англи (эстон но) кыл пӧлын улод-а — пӧртэмез вань. Озьыен, али ми тросгес тодӥськом юмшанэн, утялскон-пӧраськонэн герӟаськем кылъёсты, урод кылъёсты. Куддыръя уйшорын сайкатӥсез луэ, амал ӧвӧл, интыязы пуктыны быгатыны кулэ.

9. Общагаын улӥськоды-а?
О-о, 5 этажъем общежитиын. Татын уло адямиос. Кӧня ке чонариез адӟи, но одӥг таракан но сюресэ вамен ӧз на поты! Куноос котьку но быгато лыктыны, инты вань ке (ӧвӧл но ке) изьыны. Туала комнатае УдГУ общагаысь 2 комнаталэсь бадњымгес. Оглом блокын 3 комната, 5-6 муртлы. Милям вань 5-6 муртлы (!) кухня, душ но сьӧрос. Эшшо 1-тӥ этажын вань 5 мисьтаськон машинаен но 5 дћськут куасьтон интыен прачечной, кытчы пырыны луэ, комендантлэн пыд дорозяз йыбырттытэк (но 2 евро тырыса)! Со сяна, 5-тӥ этажысь сю пол лифтэн медад васька шуыса, интернет агай котьку шумпотыса возьматэ, вань-а али прачечнойын буш машина, ӧвӧл ке, кӧня минут ортчыса, бушез луоз. Нялтас вераса, комендантмы — зарни кышномурт! Серекъятэк. Мынэсьтым блокме, кытын 3 адями гинэ, со вань сюлмыныз яратэ. Туж оскеме потэ, мон поннагес шуыса, но сюлмы тодэ: 2 мусолэсь но мусо, чеберлэсь но чебер, французлэсь но француз пиос понна. Бен! Нылъёс но пиос капчиен одӥг блокын уло.

10. Диссер гожтӥд ни-а?
Мае гожтӥ?

Басьтэмын Ирина Зангариклэн блогысьтыз.

Удмурт Дунне
By Удмурт Дунне Июль 2, 2015 14:34
  • Valery Lozhkin

    !!!!!