«Лух авт» («Ангальский мыс») газетлэн валтӥсь редакторез, писатель Геннадий Кельчин: «Хантлэн городын но улэмез потэ, инкуазез но уг вунэты»

Удмурт Дунне
By Удмурт Дунне Июль 14, 2015 08:08

«Лух авт» («Ангальский мыс») газетлэн валтӥсь редакторез, писатель Геннадий Кельчин: «Хантлэн городын но улэмез потэ, инкуазез но уг вунэты»

4-14-1

«Лух авт» («Ангальский мыс») газетлэн валтӥсь редакторез, писатель Геннадий Кельчин.

Иже, Россиысь фин-угор прессалэн ортчем фестиваляз, вуылӥз Ямало-Ненецкой автономной округлэн шоркараз потӥсь «Лух авт» («Ангальский мыс») газетлэн валтӥсь редакторез, писатель Геннадий Кельчин. 

Вӧсез улӟытон

— Ас вакытаз  мон сям-йылолъёсмес утён сярысь воксё уг сюлмаськиськы вал. Тодэ но ӧз лыктылы, — шуэ Геннадий Павлович. — 1984-тӥ арын радиоын ужаны кутски. Пыдлось гуртэ хантъёс доры командировкае мынӥсько но, монэн вераськемзы но уг поты. Вордскем кылын но соослэсь юалляськисько, но пумозяз малы ке уг усьтӥсько, монэ мурт каро. Кема малпаськи, малы озьы шуыса. Хантъёслэсь дӥсьсэс вурытӥ — соку ик шорам мукет синмын учкыны ӧдъязы. Со дырысен сюлэмам маиз ке бугырскиз. Шедьтӥсько ке, вашкала арбериосты бичасько. Ачим но быгатӥсько мар но со лэсьтыны: воргорон кускерттон пунӥсько, пурт вӧлӥсько.

Культурамы вужере кыльыны кутскылӥз. 1950-тӥ-60-тӥ аръёсы вордӥськемъёс анай кылын верасько ик ай, нош егитъёсызгес — туж шер. Ямало-Ненец округын 46 сюрс хантъёс лыдъясько, но ӝыныез но кылзэс уг тодо ни. Куд-огез ассэ юри хант гожтэ. Хант нимаськон понна куд-ог воргоронъёс хант нылъёсты кышно басьто. Выжы калыклы кун ласянь юрттэт вань ук. Кылсярысь, гуртын улӥськод ке, вордон вылысь пужейёс басьтыны юртто, снегоход дунтэк сёто. Кин но со озьы узырмыны выре.

Но зэмос хант узырлык сьӧры уг уйиськы. Со лыдъя: астэ ачид магазинтэк сюдыны-вордыны быгатыны кулэ.  Пулэсь но кортлэсь тусьты-пуньыез гажа. Юртъерын магазинысь басьтэм арбериос трос ке, воргоронлэн киыз мырк, шуо, номыре ачиз уг пӧрмыты.

Собере, зэмос хант туж чакла курбон сётонэз (жертвоприношение). Совето вакытэ курбон сётыны алэмын вал. 1990-тӥ аръёсы гинэ асьме сям-йылолъёсмес улӟытон борды басьтӥськимы. Кылсярысь, пусйыны ӧдъямы гондырлэсь нуналзэ. 2012-тӥ арын экспедиция радъямы вашкала вӧсь доры. Урал гурезьёс котырысь Берёзовской ёросысь Балбанты ты дурын выжы калыкмы вашкала дыръя курбон сётэ вал. Адямилэсь вирзэ кисьто вал. Али курбонлы пужеез ваё.

Со вӧсь инты зол аналтэмын вал. 50 ар ӵоже со вылтӥ сюрес но лёгиллям вылэм ни. Утялтӥмы. Вӧсяськон азьын пужеез вандыны мыным шуд усиз. Вӧсь медаз аналмы ни шуыса, котырзэ учкисез юнматӥм. Вӧсез утьыса возе одӥг адями — выжыысь выжые сыӵе дан усе, нылпиосыз ӧвӧл ке, мукет муртэ быръё. Табере бадӟым вӧсь дыръя ты котыре артысь гуртъёсысь пиосъёс лыкто. Кышноослы татчы сюрес пытсамын. 5-7 арлы огпол вир сётон ортче. Та дыр куспын вордӥськем пиналъёсты вӧсе вайиськомы, соослы шуд куриськомы, сям-йылолъёсмес возьматӥськомы. Пияш ачиз лыктыны уг быгаты ке, атаез я мукет мурт солэсь ньӧлэн пукыӵсэ вае. Сое вӧсяськомы но кузёезлы берыктӥськомы, тон воин,  ас музъемдэ утьыны кулэ шуыса.

Кышно быръён

— Жаляса верано, ачим сям-йылолъёсты утён понна нюръяськисько, нош пиналъёсме уг дышетӥськы. Сюлэмы вандӥське. Нылъёс мынам. Соос но хант кылын уг верасько. Кузпалы Коми Республикаысь. Педучилищеын дышетскыкум, тодматскимы соин. Зэм, асьме выжыысь кышно басьтымтэе атаелы ӧй кельшысал. Агае ӟучез кышно басьтӥз вал. Соку пиезлы атай шуиз: тон мынам пие ӧвӧл, доре эн берта. Отӥяз агае хант кышно вайиз. Монэ но атай озьы ик карысал, дыр, но кышнояськыкум улэп ӧй вал ни.

Дышетӥсь луо шуыса, пичи дыръям ноку ӧй малпалля. Мон туж куанер семьяын будэмын. Милемыз кулакъёс радэ пыртӥзы но пужей уллёмес талазы. 200  йыр вал соос. Семьялы ичизэ араз 120 пужей вордоно умой улон понна. Сое уго чорыглы, чорыг вӧйлы воштылӥзы. Берлозэ холодильниктэк 2-3 ар утьыны луэ вал.

Сакыр песокмы но ӧй вал. Сукариез песок шуыса син азямы пуктӥськом вал. Ми 5 кузя нылпиос вал. Ваньмылы сиён ӧз тырмылы. Мон пичиез. Монэ анае 51 аресказ вайиз. 6 аресысен винтовкаен пӧйшурасько. Хантъёс асьсэ пиналъёссэс пичиысен талы дышето. Чорыгез али но трос-трос сылалтӥськом. Зэм, инспекторъёс зол чаклало, чорыгасьёсты кутыло, штраф тырыто. Но магазинэн уд улы: 1 кило муксун 700 манет сылэ. Шоро-куспо уждун 50 сюрс манет котыр ке но, хантъёс магазин чот улыны дышемын ӧвӧл.

Туж потэ вал лётчик луэме. «Артек» лагерьын шутэтскыкум, космонавтикалы сӥзем музеез адӟыса, лётчикъёслы синмаськи. Но мугорын удалтӥськымтэ. Туж потэ вал механизатор луэме. Хантъёслы техникаез тодэм туж кулэ. Тундраын запчасть ӧвӧл уго, автосервисъёс но олокӧня сю иськемлы ог-огзылэсь кыдёкын. Но механизаторлы дышетскыны кыдёке мыноно вал. Педучилище 100 иськемын гинэ. Соин ик отчы пыри.

LUH-AVT

Печатлам куара

Дышетсконме йылпумъяме бере шуд усиз Москвае вуыны — армиын служба вуттӥз. Но мон городын аслым инты ӧй шедьты —  кезьыт уг тырмы вал. Соин но куанер вордскем палъёсам берытски. Радиое ужаны ӧтизы. Отӥяз, калыкен огкыл шедьтыны быгатэмме адӟыса, 2000-тӥ арын «Лух авт» выль кылдытэм газетэ редакторе юнматӥзы. Отчыозь милям, хантъёслэн, куарамы ӧй вал. Газет потыны кутскемен, сюлмаськон кылдӥз: кыӵе диалектлы бадӟымгес саклык висъяно? Мон кивалтӥсь бере, аслэсьтымзэ валтӥсь кари. Туннэ 3 диалектэн гожъяськиськом.  Тиражмы 700 экземпляр. Пужей уллё дугдэм интые газетэз вертолётэн нуиськомы.

Асьме алфавитмес туннэ Интернетэ пыртыны выриськомы. Тазэ вормимы ке, мынэсьтым шудоез уз луы.

Веросъёс гожъясько. Сотэк уг луы — кылэз волятыны кулэ. Улонысьтым басьтэм учыръёсты калык дорозь вуттӥсько. Со сяна, ӟуч произведениосты хант кылэ берыктӥсько. Сергей Есенин, Александр Пушкин, Антон Чехов озьы вуизы ни хант калык дорозь. Уг вунэтӥськы выжыкылъёсты но. Соосты нылпиосмы табере анай кылынызы школаосын дышето.

Пенсие потыса, гуртын улэме потэ. Вордскем Шурышкаре бордаз кыске. Весь кык пукон вылын улӥсько кадь. Мугоры — Салехардын, сюлэм — гуртын. Шутэтскон нуналъёсты чидатэк возьмасько, вуо ке, соку ик кыре дыртӥсько. Инкуазетӥ ветлӥсько, пӧйшурасько.

Елена Сараматова

Удмурт Дунне
By Удмурт Дунне Июль 14, 2015 08:08