Зинаида Рябинина: Тау шуэмдылы тау!

Удмурт Дунне
By Удмурт Дунне Июнь 22, 2015 13:30

Зинаида Рябинина, валтӥсь редактор:

рябинКема верам сэбедмы ортчиз! Арня ӵоже «Удмурт дунне» быдэс удмурт дуннеен юмшаз!

Мылкыдъёс-малпанъёс али ке но уг буйгало. Табере милемлы Удмуртиысь гинэ ӧвӧл, мукет улосъёсысь но адямиос жингыръяло, паймемзэс верало. Кудӥз «куректэ»: милям но 100 армы матэктэ, кызьы тӥ сямен пӧрмытоно?

Нош кӧня ке ар талэсь азьло, бадӟым юбилей сярысь кылпум поттыкумы, тросэз киынызы шонтылӥзы: малы со кулэ, токма кужым но коньдон быдтон… Меӵак вераса, ӧз но оскылэ, бадӟым ужрад ортчытыны пӧрмытом шуыса, но ми тодылӥм: быгатом! Мар со бӧрсьысь бӧрсе 4 нунал ӵоже одӥг редакцилы бадӟым ужрадъёс ортчытон, уг вера, угось ваньмыз пӧрмиз малпамлэсь но ӟеч!

Кин тодӥз вал, театре гужем куазен калык уз тэры шуыса, кин возьмаз Кызьпу арамае 10 сюрс муртэ, угось котькугес ик 5 сюрс луэ вал.

Со дыре ик ми ӧм аналтэ газетмес — со котьку сямен ик дыраз потӥз.

Серекъям вал, праздник ортчытом но ваньмы отпуске кошком. Но лыдӟись возьма ни выль иворъёсты, праздникысь выль туспуктэмъёсты. Кинлы ке милям ужмы кулэтэм йӧтэ, нош кин ке бӧрдыса жингыртэ, тау каре — сыӵеос понна уката зол тыршем потэ. Ӵапак Лыдӟисьлы луыса быгатӥм яратоно газетмес данъяны — тӥ ке ӧй лыктысалды, ваньмыз бездысал.

Вождэс эн вае, ваньмызлы ӝукмы, перепечмы, шуныт кылмы ӧз тырмы ке, азьпалан асьмелэн даурмы кузь ай, ми оскиськом солы.

Нош туннэ мынам нимысьтыз тау кареме потэ газетлэн юрттӥсьёсызлы но эшъёсызлы: Печатья но ивор вӧлмытонъя агентстволы, Журналистъёслэн огазеяськонзылы, «Удмурт Кенеш» огазеяськонлы но солэн ёросъёсысь ёзъёсызлы, Ижысь Индустриальной ёрос администрацилы, Дэбес ёрос администрацилы, Эшъяськон юртлы, Удмурт театрлы, Удмурт филармонилы, Национальной библиотекалы, «Мынам Удмуртие» телерадиокомпанилы, Ижысь «Пастарель» огазеяськонлы, «Айкай» театрлы, Брангуртысь песянайёслы, Воткаысь крезьчиослы, Богдан Анфиногеновлы, Аня Камалилы, Дэри ёросысь Пероггуртысь «Кильтырнаос», Пальникысь «Тюрагай», Кияса ёросысь «Купанча», Ижысь «Задор мылкыд» ансамбльёслы но ваньмызлы-ваньмызлы, кин та дано нуналъёсы милемын ӵош вал, кин туннэ но милемын!

Удмурт Дунне
By Удмурт Дунне Июнь 22, 2015 13:30