Ручка интые фотоаппарат

Удмурт Дунне
By Удмурт Дунне Июнь 9, 2015 14:13
Марий Элысь туспуктӥсь Д. Речкин

Марий Элысь туспуктӥсь Д. Речкин

Дэбесын толон аслэсьтыз ужзэ мытӥз Россиысь фин-угор журналистъёслэн семинарзы.

Россиысь фин-угор журналистъёсты Дэбес музъем шуныт пумитаз. Ӵукназэ жаль зориз ке но, ӝытаз, куноосты пумитаку, инбамын шунды потӥз. Дэбесысь культурая но туризмъя центрын ужасьёс фотографъёсты кырӟанъёсын шумпоттӥзы, перепечен куноятӥз, ёросысьтызы сиё-дано интыосын тодматӥзы.

Россиысь но шаерысьтымы журналистъёсты ӟечкыланы лыктӥзы Дэбес ёросысь муниципал кылдытэтъёслэн кивалтӥсьёссы, сӥё-дано адямиос.

Туннэ но фотожурналистъёсты тунсыко нунал возьма на. Соос Байгурезе тубалозы, Дэбесысь 3 сэрего интыенызы тодматскозы, пӧйшурасьёслэсь инкуазьлы йыр-пыд сётонзэс адӟозы, Сибирь трактлы сӥзем музее ветлозы. Нош кызьы фотоостэк? Ваньзэ тае соос фотое пуктылозы. Семинаре вуэмъёс Байгурезь выжыын палаткаосын кӧлозы но тылскем вылын пӧзьтэм ӝук сиёзы.

Азьвыл аръёссэ таӵе ужрадъёс ортчизы вал Марий Элын, Комиын, Мордовиын, Ханты-Мансийск но Ямало-Ненецк автономной округъёсын.

УД

 

Удмурт Дунне
By Удмурт Дунне Июнь 9, 2015 14:13