Мар со кам? Инты нимъёсъя кыллюкам потӥз

Удмурт Дунне
By Удмурт Дунне Июнь 23, 2015 14:01

1303168293Туэ, 70 арес тырмонэзлы сӥзьыса, тодосчи Михаил Атаманов «Язык Земли Удмуртской. Историко-этимологический словарь топонимов Волго-Уральского региона» книга поттӥз.

Та кыллюкаме пыртэмын 10 сюрс пала инты нимъёс: гурт, город нимъёс сяна, туж трос шур, нюк-гоп, ошмес, ты, бусы, возь, нюлэс, ульча, гурезь, сюрес нимъёс, вашкала шайёслэн, гуӵинъёслэн, каръёслэн но вашкала вӧсяськон интыослэн нимъёссы.

— Котькуд удмурт тодэ инты нимъёсты: Кам, Чупчи, Вало, Иж (шуръёс), Игра (Эгра), Алнаш (Анлаш), Селты (Сьӧлта), Шаркан, Кизнер, Кез (ёрос центръёс), Баграш-Бигра, Алганча Эгра, Полом, Бурангурт, Варзи-Ятчи (Варӟи-Ӟатча), Быги (гуртъёс), Иднакар, Узякар, Сьӧлтакар, Весьякар, Каргурезь, Поркар (вашкала каръёс). Нош сюосызлэн интыослэн нимъёссы ватӥськемын, этимологизэс тодыны уг луы, — шуэ Михаил Гаврилович.

Кызьы кылдэмын, мае возьмато инты нимъёс? Ӧжытэз шонер валэктон сётыны быгатоз. Соослэсь кылдэмзэс — этимологизэс — тодон понна трос дышетскыны, утчаськыны, юалляськыны кулэ. М. Атаманов, котьмаин, уката ик удмуртлыкен герӟаськем ужпумъёсын тунсыкъяськись мурт, 1971-тӥ арысен, университетын дышетскыкуз ик ини, пӧртэм ёросъёсын, улосъёсын улӥсь удмуртъёс доры вуылыса, инты нимъёсты люканы кутскиз. Тунсыко, Красноярск крайысь, Томск улосысь удмурт гуртъёсысь гожтэм инты нимъёс но та книгае сюремын. Кировысь, Казаньысь, Уфаысь, Пермьысь, Москваысь, Ижысь кун архивъёсын ужаса, тодосчи трос материал люказ на.

Кызьы верало инты нимъёсты эскерисьёс, котькуд гуртын вазен вылэм ог 120-150 бусы, шур, ошмес, мувыр, возь, нюлэс, сюрес, межа, ты нимъёс. Шуом, 20-тӥ даурлэн шораз Удмуртиын 3 сюрслэсь тросгес гуртъёс, починкаос вылӥллям. 3 сюрсэз 120-лы уноямы ке, потоз 360 сюрс инты ним. Макем бадӟым узырлык! Удмурт калыклэн туж вашкала дырысен туннэ нуналозь улон-вылонэзлэсь пытьыоссэ таос пӧлысь шедьтыны луоз: мар ужаз, маин кӧтсэ тыриз, кызьы шулдыръяськиз, кытын но кинлы вӧсяськиз, кыӵе пудо-живот вордӥз, кыӵе ю кизиз, кытчы ветлӥз пӧйшураны, мушканы, чорыганы, мульы, емыш бичаны, кытысь из поттӥз, ыргон, горд яке тӧдьы сюй ворттӥз. Та но трос мукет ужъёсты быдэсъямез сярысь инты нимъёсын герӟаськем веранъёсты шедьтыны луоз та узыр кыллюкамысь.

Кыллюкамлэн кутсконаз сётэмын бадӟым азькыл. Со юрттэ наукая ужез ӟечгес валаны. Пумаз сётэмын трос схемаосын картаос, соос син азе пуктыны юртто удмурт калыклэн историысьтыз трос суредъёсты. Куамын туспуктэмъёс возьмато, макем чебер асьмелэн шаермы!

Михаил Гаврилович жаляса вера, выль книгаез пичи тиражен потӥз, соин ик кыллюкамлэн асдуныз бадӟым луиз шуыса. Мукет ужъёсыз сямен ик, таиз но потэмын Вавож ёросысь Ӟозлуд-Какся гуртын вордскем, али Германиын улӥсь В. Березин юрттэмъя.

Елена Булычева,

филология наукаосъя кандидат

Удмурт Дунне
By Удмурт Дунне Июнь 23, 2015 14:01