Лыдӟиськись Гербер. Кызьпу арамаын «Удмурт дуннеез» сӥлы каризы

Удмурт Дунне
By Удмурт Дунне Июнь 22, 2015 16:27

Ижысь Индустриальной ёрослэн администрациез радъямъя шоркарысьтымы Кызьпу арамаын арлы быдэ Гербер ортчылэ. Туэ со «Удмурт дунне» газетлэн 100 ар тырмонэзлы сӥземын вал. Соин валче удмурт газетэз лыдӟисьёслэн фестивальзы радъяськиз.

DSC_0063

«Удмурт дуннеез» ӟечкылаз «Удмурт Кенешлэн» тӧроез Игорь Семёнов.

Азбаръёс

Выль шӧмо Гербер трос калыкез люказ — 10 сюрслэсь уно. Ижын улӥсьёсын ӵош ужрадэ шаерысьтымы 17 ёросысь делегациос пыриськизы.

Удмуртъёслэн шулдыръяськон интыязы гужем майбыр! Пӧсь куазьлэсь но, зорлэсь но ватӥськыны интыос вань. Гужем но «лымыя» — топольёс вылысь тӧдьы мамык вӧлак усе. Та шоры паймыса учке арамае пыронтӥын сылӥсь кечлы синпелет гинэ но.

Нуназелэсь азьло ик арама шорын «Удмурт дуннелэн» бадӟым флагез лопыръяськиз ини. Нош котыраз газетлэн приложениосызлэн — «Ингожлэн», «Берекетлэн», «Гердлэн» но «Dart»-лэн — пусъёссы. Пыронтӥысь пужымъёс вискын «Удмурт дуннелы» — 100 ар» баннер интыяськиз. Газетын ужасьёс азбарзэс радъязы — татысь басьтыны луиз газет, выль потэм «Удмурт дунне» энциклопедия но синпель кузьымъёс. Озьы ик, газетлы гожтӥськыса, лотереяе пыриськыны луонлык сётӥськиз.

«Удмурт дунне» котыре лыдӟисьёслэн нырысетӥ фестивалязы пыриськисьёс но интыяськизы. 17 ёросысь делегациос, ог-огенызы ӵошатскыса кадь ик, асьсэлэсь пичи азбаръёссэс чебертыны выризы. Возьматыны, вуз карыны ваем киужъёссы одӥгезлэсь мукетыз чебер адӟиськизы. Куное кожем адямиез одӥг азбарын но куноятытэк ӧз кельтэ, дыр. Фестивале пыриськыны, газетэз 100 ар тырмонэныз ӟечкыланы ёросъёсысь кырӟась-верась коллективъёс лыктӥллям.

— Ужрад сярысь тодыса, соку ик лыктоно кариським, — мылкыдзэ вераз Гракысь «Ашальчи» ансамбле ветлӥсь Лидия Князева. — Яратоно «Удмурт дунне» газетмес ӟечкылатэк кельтыны ӧй быгатысалмы. Газетэз но ведь куд-ог дыръя бӧрдыса лыдӟиськом — гожтэм иворъёслы сокем шумпотӥськом. Азьланяз тазьы ик иворъёсын мед шумпоттоз, трос лыдӟисьёсыз мед луозы «Удмурт дуннелэн».

Котькуд вуэм выль номер «ашальчиослэсь» мылкыдзэс ӝутэ, выль ужъёслы бурдъя. Соослэн верамзыя, тужгес но шумпото, газетын Грак ёрос сярысь иворъёс луо ке. Зэм но, шаерысь гуртъёс сярысь, «Удмурт дунне» сяна, нокыӵе мукет издание сомында уг гожъя. Газетысь «Сю сюрес» проект улсын гинэ ог 110 пичи гуртъёсын тодматскыны луиз ни.

Азбаръёс калыкез бордазы кырӟан-эктонъёсын кыскизы. Вотка ёросысь лыдӟисьёслэн азбарзы тужгес но бадӟым пӧрмиз. Усточиос пӧртэм киужъёсъя мастер-классъёс возьматӥзы, соин ик азбарысьтызы калык ӧз бырылы.

«Удмурт дунне» газетлэн бадӟым но узыр азбарез вӧзы ас азбаръёссэс усьтӥзы на Ижкарысь ёросъёс — таосыз но котыразы трос калыкез люказы.

DSC_0051

Кузьым — гожтӥськон

Нуназе котыр тӧршор сцена вылысен люкаськем калыкез Герберен но «Удмурт дунне» газетлэн котырес лыдпусэныз ӟечкылаз Ижкарлэн йырыз Александр Ушаков:

— Ижлэсь нуналзэ пусйиськом валтӥсь кун праздникен — Россилэн нуналэныз — ӵош. Со туж умой тупамын. Угось шоркармылэн сюресэз герӟаськемын кунмес кужмогес, йӧногес каронэн. Туннэ Ижын улћсьёс городлэсь выль историзэ гожто. Ӝужало выль улон юртъёс, нылпи садъёс, стадионъёс, чеберско азбаръёс, урамъёс. Шаерамы туж синмаськымон калык улэ.

Шуныт кылъёс вераз «Удмурт Кенеш» огазеяськонлэн тӧроез Игорь Семёнов.

— Удмурт газет-журналъёс пӧлын «Удмурт дунне» азьветлӥсь луэ. Туннэ Герберын со бадӟым азбар радъяз. Ойдолэ «Удмурт дуннелэн» юбилеяз солы кузьым лэсьтом: азбараз кожыса, газетлы гожтӥськом, — ӵектӥз Игорь Семёнов.

Калыкез шумпоттӥзы «Айкай» театр, Ижысь нылпи коллективъёс, ёросысь коллективъёс. «Удмурт дунне» газетын ужасьёсын калыкез тодматӥз валтӥсь редактор Зинаида Рябинина. Удмурт шаер сярысь гожъясьёсты учкисьёс пӧсь кичабонъёсын пумитазы.

«Удмурт дуннелы» 100 ар тырмонэн валче газетлэн авторъёсыз пӧлын «Даур куара» конкурс ялэмын вал. Сцена вылысен дипломъёс, таукаронъёс басьтӥзы «проза», «публицистика», «кылбурет», «Ивор куды», «драма» номинациосын вормисьёс. Кузьымтэк ӧз кыле газетэз вӧлмытыны юрттӥсьёс но.

Лыдӟисьёслэн фестивалязы лыктэмъёслэн азбаръёссы но пусъемын вал. Тужгес шулдырез луиз алнашъёслэн азбарзы, тужгес чебер ӝӧксы вал Шаркан ёросысь лыдӟисьёслэн, тужгес ческытэн лыдъямын пичи пургаослэн пыжиськемъёссы.

DSC_0226

Dart концертэз нуо В. Крестьянинов но А. Тутаева

Эшъёс уноялозы

Уно калык люкаськылӥз егитъёслы потӥсь «Dart» приложенилэн шулдыръяськон азбараз. «Шунды» огазеяськонэн валче чебер концерт радъямын вал. Кырӟазы но эктӥзы Алина Егорова, Мария Бочкарёва, Влада Митрофанова, Мурӝол Underground, Таня Тихонова, Лилия Леонтьева, Ваня Белослудцев, L.I.A.R. Татын ик котькуд мылкыд карись ас кылбурзэ яке яратоно ужзэ лыдӟыны быгатӥз — ужаз эрико микрофон. Егитъёсын ӵош площадкалэн ужаз мӧйыос но мыло-кыдо пыриськизы.

— Арлыд люкаськемъя удмурт луэмез эшшо но золгес шӧдоно. Сюлэм весь концертъёсы, удмурт ужрадъёсы кыске. Туж яратӥсько егит кырӟасьёсмес, тужгес но аспӧртэмлыко потэ Богдан Анфиногенов, — вераз Вавож ёросысь Валентина Шубина.

Площадка бер ӝытозь ужаз. Егитъёсты но люкаськем калыкез удмурт позыръяськонын-дискотекаын шумпоттӥз на.

Куазь быдэс нунал зорлэсь возиськиз. Нунал пумын гинэ губи зор пужнӥз. Но со но ӵапак интыяз луиз: вань жадемез гылтӥз. Оскон пыӵаз: ӝукез вӧсяку, Инмарлы, ӟечсэ курыса, юнме ӧм вазиське — гырем-кизем бусыосмы тыр шепен веттаськозы. «Удмурт дунне» газетмылэн эшъёсыз уката трос луозы.

Павел Вахрушев

Удмурт Дунне
By Удмурт Дунне Июнь 22, 2015 16:27