Аръёс но лыдпусъёс. «Удмурт дуннелы» — 100 ар!

Удмурт Дунне
By Удмурт Дунне Июнь 3, 2015 14:02

Аръёс но лыдпусъёс. «Удмурт дуннелы» — 100 ар!

Аръёс но лыдпусъёс

Газетлэн нимъёсыз

1915-тӥ ар, 4-тӥ февраль. 1914-тӥ арын пуромиз Дуннеысь нырысетӥ ож. Россиын улӥсь пӧртэм калыкъёслы вормон мылкыд пыӵатон понна Вяткаысь губернатор Андрей Гаврилович Чернявский Россиысь Правительстволэн нимыныз гожтӥз удмурт газет кылдытон сярысь распоряжение. Газетэз нимазы «Войнаысь ивор» («Военные вести»).Редакциен кивалтыны юнматӥзы Пётр Павлович Глезденёвез.

1915-тӥ-1916-тӥ аръёсы газет печатласькиз Вятка городысь типографиын. Чакламын вал кык арнялы одӥг пол поттыны, но 1915-тӥ ар ӵоже 9 номер гинэ потӥз. Со вал Россиысь Правительстволэн органэз. 1917-тӥ арын феврале буржуазно-демократической революция вормем бере удмурт газетэн кивалтӥз Огдыр (Временной Правительство). Куинь ар куспын потӥз быдэн 9 номер.

1917-тӥ ар, 15-тӥ август. Ожмаськонэз возьматэм сяна, «Войнаысь ивор» газетын печатласькизы дышетон но тазалыкез утён ужпумъёсын герӟаськем материалъёс.. Кылдытӥсьёссылэсь (учредительёссылэсь юатэк), та нуналысен газет потыны кутске «Удморт»нимын. Солэн редакторез луэ «Виль синь» газетын Пётр Глезденёв вӧзын кыкетӥ редактор луыса ужась священник Василий Крылов. Ченгешонъёс вал ке но, таӵе нимез берлогес юнматӥзы учредительёс но. Тазэ газетэз чакламын вал печатланы арнялы одӥг пол. Потӥз 6 номер.

1918-тӥ ар, 24-тӥ январь. Граждан ож вакытэ Алабгоын (Елабугаын) потыны кутскиз «Виль синь» газет. Редакциен кивалтӥз социал-революционер (эсер) Константин Яковлев. Со вакытэ ик татын потӥзы «Кам тулкым», «Горд гырлы», «Сюрло» газетъёс.Большевикъёслэн лыдъямзыя, огез но та изданиос гордъёс пала дур ӧз басьтэ. Ваньзэ ворсазы, нош тужгес тодмоез «Виль синь» большевикъёслэн газетсылы пӧрмиз.

Газетлэн кӧня ке номерез потэм бере К. Яковлевез кивалтон ужлэсь палэнтӥзы, со интые кыл кутӥсьёс луизы Иван Векшин но Прокопий Горохов.

Удмурт газет таӵе нимын берпуметӥзэ потӥз 6-тӥ сентябре, номерлэн редакторез вал Трофим Борисов. «Виль синь» газетлэн 22 номерез потӥз.

1918-тӥ ар, 31-тӥ октябрь. «Гудыри» газетлэн нырысетӥ номерез потӥз туала Татарстанысь Алабго (Елабуга) городын. Кыкетӥ номерез потӥз ӝыны толэзь ортчыса, 15-тӥ ноябре. Куинь номерзэ поттӥз Восточной фронтысь Кыкетӥ армилэн политотделэз. Колчак армия вуэмен, редакция огдырлы кошкылӥз Вятские Поляны городэ, отысь — Шихран станцие. Тӧдьыосты улляса, редакция берытскиз Алабгое. 31-тӥ июле Москваысь Наркомнацын кылдытэмын Россиысь удмуртъёслэн ужъёссыя отдел. Газетлэн редакторез луиз Трофим Кузьмич Борисов.

1920-тӥ ар, январь. «Гудыри» удмуртъёслэн ужъёссыя Центральной Комиссариатлэн органэз луэ. Газет потыны кутске Сарапул городын.

1920-тӥ ар, 4-тӥ ноябрь. В. И. Ленин но М. И. Калинин гожтӥзы Удмурт автономной область кылдытон сярысь декрет. «Гудыри» газет луиз РКП(б)-лэн областной комитетэзлэн но рабочей, крестьянской но красноармейской депутатъёслэн Областной Советсылэн органзы.

1921-тӥ ар, 4-тӥ март. «Гудыри» газет Глазовын потыны кутске.

1921-тӥ ар, 11-тӥ июль. Газетлэн редакциез Ижевске выже. Со дырысен удмурт газет Удмуртилэн шоркараз потэ.

1930-тӥ ар, 21-тӥ февраль. Партилэн обкомезлэн бюроез решение кутӥз «Гудыри» газетэз «Удмурт коммуна» ниманы. Та нимын со нырысьсэ потӥз 12-тӥ мартэ.

1941-тӥ ар. «Удмурт коммуна» пӧрмиз «Удмурт правда» газетлы. Одӥг бамез сӥземын вал удмурт кылын гожъямъёслы, куинь бамез «Удмуртская правда» газетысь берыктэмъёслы.

1943-тӥ ар, 5-тӥ ноябрь. Газет потыны кутске «Советской Удмуртия» нимын. Со луиз ВКП(б)-лэн Удмурт обкомезлэн но Ижевск горкомезлэн, УАССР-ысь Верховной Советлэн органзы.

1963-тӥ ар, март. КПСС-лэн Областной Комитетэз пуктэмъя 1963-тӥ арын «Советской Удмуртиез» огазеяло «Удмуртская правда» газетэн. Газетын пото ӟуч кылысь берыктэм материалъёс. Удмурт газетын ужась журналистъёс пӧрмо берыктӥсьёслы. Огазеям газетлэн валтӥсь редакторез луиз М. Гнедин.

1967-тӥ ар, март. Ужасьёс асьсэлэн правоосы понна нюръяськемен, «Советской Удмуртия» газет «Удмуртская правда» бордысь висъямын, кылдӥз нимаз редакция.

1990-тӥ ар. Газетлэн учредительёсыз — УАССР-ысь Верховной Совет, РСФСР-ысь Компартилэн элькун комитетэз, УАССР-ысь Министръёслэн Советсы но редколлегия.

1991-тӥ ар. Газетлэн учредительёсыз — Удмурт Республикаысь Верховной Совет, Министръёслэн Советсы но редакцилэн коллективез.

1992-тӥ ар, 1-тӥ январь. Газет потыны кутске «Удмурт дунне» нимын. Учредительёсыз — Удмурт Республикаысь Верховной Совет, Министръёслэн Советсы но редакцилэн коллективез.

1995-тӥ ар. Учредительёсыз — Удмурт Элькунысь Кун Кенеш но Правительство.

Вань та газетъёслы коньдон висъяськылӥз кун ёзъёсысь. Газет нимъёс но печатласькон интыос вошъяськыку но, редакциын ужасьёс но штатэ пыртымтэ авторъёс оглом соос ик кыльылӥзы. Гожтӥськисьёс но азьвылъёсыз ик вал. Политикаын югдур пӧртэм пала шонскылӥз ке но, ваньмыз газетъёс возьматъязы удмуртъёслэн бадӟым люкетсылэсь мылкыдзэ.

Удмурт Дунне
By Удмурт Дунне Июнь 3, 2015 14:02