Удмурт Дунне
By Удмурт Дунне Июнь 17, 2015 12:24

8-тӥ-10-тӥ инвожое Дэбес черкогуртын ортчиз фин-угор туспуктылӥсьёслэн семинарзы. Куноос тубазы Байгурезь йылэ, удмуртъёслэн пӧйшуран но веник керттон сямъёсынызы, ёросысь кибашлыослэн ужъёсынызы тодматскизы, Сибирь трактлы сӥзем музее пыразы.

Вань туспуктылӥсьёс нырысь ик люкаськизы Наговицыно гуртэ. Куноосты, эсьмаса, куазь гинэ но шумпотыса — зорен — пумитаз. Пичильтык кыдырамез бере нош ик шунды пальышалляз. Соин, лэся, ужрадэ люкаськемъёс серекъязы, куноос понна, пе, инкуазь ассэ котыр ласянь возьматӥз: йӧзор, зор, ӵушкась шунды, вуюись, лек тӧл, кезьыт уй — ваньмыз огазе люкаськиз. Нош туспуктылӥсьёслы солэсь бадӟым шуд ӧвӧл, дыр.

Наговицыно гурт шаерысьтымы мукет гуртъёслэсь номырин ик уг висъяськы: одӥг гинэ ульча вож турынэн шобыртӥськемын, гурт пумын пичильтык ӵыпетъёс чиляло, соос сьӧрын — «Зарни дага» шутэтскон инты. Солэн кузёез Галина Рылова вордскем гуртсэ улӟытыны малпам. Шутэтскон инты бордаз кыске ватка выжыысь валъёсын. Соос татын асьсэды туж эркын шӧдо.
Куноослы њеч туспуктэмъёс лэсьтыны сӥзьыса, вераськизы Дэбес ёрос администрацилэн йырыз Андрей Иванов но Сюрногурт муниципал кылдытэтлэн йырыз Олег Байдалин, капчи мылкыд пыӵатӥзы Дэбес черкогуртысь культурая но туризмъя «Сибирь тракт» центрын ужасьёс.

Котькинлэсь вазь Дэбес ёросэ вуизы Коми Республикаысь куноос. Та республикаысь Журналистъёслэн союзэнызы кивалтӥсь, «Звезда» газетлэн валтӥсь редакторез Эдуард Пименов шумпотэ, котькуд ужрад, пе, ас сяменыз шулдыр луэ, чебер интыос туспуктэме кылё.

— Туспуктылӥсьёслэн семинарзы туэ 5-тӥзэ ортче, — шуэ Фин-угор журналистъёслэн содружествозылэн председателез Николай Ишуткин. — Наговицыно гуртэз утчаса Удмуртиысь сюресъёс кузя кема ворттылэмысьтымы, мылкыдмы кӧня ке куашказ вал, но кулэ интые вуэммы бере со сярысь пичи но ӧм жалялэ ни. Семинар пӧртэм улосъёсын радъяське, озьы фин-угор туспуктћсьёс ог-огенызы матысьгес тодматско, эшлыко фотооссы Интернет вотэсэз басьто.

Ужрадэ ветлӥзы шаерысьтымы газет-журналъёсын ужасьёс но. Семинарлэн шорсюлмыз герӟаськемын дышетсконэн. Таяз учыре ас быгатонлыкъёссэ шараяз Удмуртилэн Президентэзлэн но Правительствоезлэн пресс-службаязы трос аръёс ӵоже ужам фотограф Николай Глухов. Ужрадэ люкаськемъёс Николай Александровичез сак кылзӥзы, пӧртэм юанъёс сётъязы, со угось трос паймымонзэ усьтӥз.

— Фотографъёслы но ас быгатонлыкъёссэс будэтон сярысь сюлмаськоно, — шуэ «Марий Эл» газетысь фотокорреспондент Денис Речкин. — Нырысетӥез семинар 2005-тӥ арын Марий Элын ортчиз, аслым трос тунсыкозэ басьтӥ кадь, Удмуртиысь но тыро песьтэрен бертӥсько. Туж кельшиз инкуазьды.

Ёрос администрацилэн йырыз фин-угор фотографъёслэн семинарзылы тыро-пыдо дасяськем. Кенеш ортчытон залэ вань юрттӥсьёссэ люкам. Соос куноослэн юанъёссылы валэктон сётӥзы.

Дэбес ёросын бадӟым саклык висъяло туризмлы. Кылем арын, пе, дӥнязы 10 сюрслэсь ятыр адями куное вуылэм. Азьланяз солэсь но трос калык пумитаны дасясько. Чупчи шур дурын пӧртэм ужрадъёс ортчытъяло. Кылсярысь, Удмурт Льӧм гуртысь «Льӧмпу сяськаос» коллектив фин-угор куноослы возьматӥз веник керттон йылолэз. Коллективысь кыллы усто кышномурт Надежда Жуйкова верамъя, удмурт йылол-сямъёсты гуртысьтызы бичало. Куноос Чупчи кузя веник келязы, шумпотымон, одӥгзылэн но со ву пыдсы ӧз выйы. Озьыен, азьпал улонзы шулдыр луыны кулэ.

Куноосты паймытӥз Байгурезь. Выжытӥз визыласа бызись Чупчи шур но гурезь сярысь мадёсъёсты ваньзы ымзэс усьтыса кылзӥзы. Люкаськемъёс понна тунсыко вожвылъяськон ортчиз. Гурезе тыро сюмыкен ӝог тубид ке, льӧль малпанъёсыд быдэсмозы, пе. Котькинлэсь ӝог гурезе тубизы но чаркае лэзем виназэс ӧз пальккалэ «Удмурт дунне» газетлэн редакторез Зинаида Рябинина, Дэбесысь Татьяна Хохрякова но Ханты-Мансийскысь Александр Вьюткин. вормисе потӥз З. Рябинина, со ик утӥз мунё — Байгурезьлэсь кузёзэ.

Та нуналэ ик гурезь йылын ортчиз кылбур лыдӟисьёслэн вожвылъяськонзы. Вормисе потӥз Дэбес ёрос газетын трос аръёс ӵоже ужам но «Пужымо Байгурезь» литературной объединениез кылдытӥсь Тамара Комарова.

Туспуктӥсьёслы синмаськи, кӧлонэз валасьтэм адямиос вылӥллям. 3 часын султыса, шундылэсь ӝужамзэ туспуктыны ветлӥзы. Соосты-а уд шуы чеберлыкез адӟисьёс! Дэбес ёросын семинар йылпумъяськиз. Но сӥё-дано ужрадъёс азинско.

Валентина Емельянова

Туспуктӥз автор

Удмурт Дунне
By Удмурт Дунне Июнь 17, 2015 12:24