Кырӟамысь дугдӥз ке, скал вордоз

Удмурт Дунне
By Удмурт Дунне Апрель 8, 2015 09:37
Михаил Ворончихин.

Михаил Ворончихин.

Фольклор кырӟанъя но эктонъя «Айкай» кун театрысь кырӟась Михаил Ворончихин эшъёссэ ческыт пӧраськемен куноятылэ.

Глаз ёросысь Качкашур гуртын вордскем но будэм пияш котьку но анаезлы гур котырын юрттӥськылӥз. Пӧраськон дыръя сӥль корано-а, пушкес дасяно-а — ваньзэ пичи Миша лэсьтылӥз. Кузпалъяськемез бере но ӟеч сямъёслэсь ӧз куштӥськы, та вакытэ но пушкес дасян — солэн ужез.

Дано артист нуналлы быдэ мугорзэ кыдатэ, куаразэ волятэ но туж чакласькыса сиське, кожасько вал. Нош артист паймытӥз, ваньзэ, пе, сиисько. Тужгес яратэ удмурт пӧраськемъёсты, йӧлэн пӧзьтэм рис но тари ӝукъёсты, нош пельнянь, пе, азьтэмъёслэн сиёнзы, номыр сиыны луэ ке, соку гинэ сое пӧзьтэ.

— Гур азьын пыжем сиёнлэн шӧмыз чылкак мукет луэ, — шуэ Михаил Ворончихин. — Перепеч сярысь ке верано, только сӥлен мед луоз, дуръёссэ ӝужыт кутӥськомы, тросгес пушкесэз мед тэроз шуыса. Шаньги сииськомы вал емышъёсын гинэ, картошен — туж шер.

Михаил Ворончихин улонзэ син азяз пуктыны уг быгаты йӧлтэк но сӥльтэк. Нуналлы быдэ йӧлын ӝук сиысал, йӧл юысал. Кырӟамысь дугдӥ ке, скал вордо шуыса, кышкатъя. Туж гажа парсь сӥлез, одно ик кӧйыз бордаз мед луоз. Ымпумъёстӥ вӧй мед виялоз.

Ӟег пызен перепеч

Кулэ: ӟег пызь, кунян но парсь сӥль (кӧйыз луиз ке, умойгес), сугон, 6-8 курегпуз.
Ыль яке пӧзьтэм сӥлез тусьын корано сугонэн ӵош. Сое тусьтые пононо, отчы ватсано ыль курегпуз но сурано пӧзьтэм сӥльлэн сӥятэм лымыныз. Шӧмызъя будэтоно сылал, изэм пӧсьтурын.
Перепечез котькудӥз ас сяменыз лэсьтыны быгатэ. Перепеч кыӵлэн дурыз 1 сантиметр ӝужда мед луоз.

Тулыс салат

Кулэ: кубиста, 1 огреч, 1 ческыт пӧсьтурын, ӵынатэм курег сӥль, майонез но горчица.
Ваньзэ векчи юдоно, майонезэн но горчицаен суралтоно. Ӝог сиён дась.

Валентина Емельянова

Туспуктэмез М. Ворончихинлэн

Удмурт Дунне
By Удмурт Дунне Апрель 8, 2015 09:37