Э, пе, ӟазеге… Мумы ӟазег тулыссэ пуз вылэ пуксе

Удмурт Дунне
By Удмурт Дунне Апрель 8, 2015 10:08

Леонид Первевозчиков,

Пудо эмъянъя управлениысь инспектор

Ӟазег пӧлын ӟазег вань. Куд-огез пузаса но пузъёссэ уг шунты. Мар кароно тылобурдолэсь мумы луон мылкыдзэ сайкатон понна?

Сайкатон

Умой ӟазегез кыдёкысен тодманы луэ. Со шергес пуза, карысьтыз но соку ик васькыны уг дырты. Васькыса но котыраз ик берга. Интыяз сылыны чидасьтэм, юн кесяськись, куашетэмлэсь я пыд куаралэсь карысьтыз султӥсь тылобурдолэн мумы луон мылкыдыз куддыр воксё но сайкатэк быгатэ. Кышномуртъёс пӧлын но котькыӵеез вань ук. Нырысетӥ улон араз ӟазег куддыр пуза гинэ. Со пукыны дышымтэ на уго. Мумыосты 5-6 ар вордо. Но тужгес умой утиськись, трос пузась луо соос 2-тӥ-4-тӥ араз. Тӧлпузъёс медаз луэ шуыса, айызэ 3 армысь огпол вошъяно. Та юрттэ на вир сураськемлэсь утиськыны, таза ӟазегпиос вордыны.
Но вань луонлык тужгес ваменэс ӟазеглэсь но мылкыдзэ воштыны.

Ӟазег пуксёз сыӵе каре гинэ, кытчы со азьвыл пузалляз. Пузъёссэ мукет азе выжтӥды ке, соосты со куштыны быгатоз. Кӧня ке ӟазегез одӥг липет улэ пуктыны малпаськоды ке, ог-огзэс медаз адӟе — висъет лэсьтэ, озьы соослы каньылгес луоз, ог-огзэс исаса уз улэ.

Карез пуктоно музэ. Ӵемысь сое рейкаослэсь гинэ шукко. Пулъёс вискы пась кельтоно, но ӟазеглэн йырыз отчы медаз тэры — ёркалоз. Висъёс юрттозы омырлы ветлыны, пыдэсаз вӧлдэм куро но уз пыкмы, уз сисьмы. Чырсась куро пушкын пузъёс сӧриськозы. Карез пуктоно пеймыт сэргы. Номыр уродэз ӧвӧл, кык-куинь но кар шуккиды ке. Кудӥз кельшиз, сояз ик пуксёз тылобурдо. Но огзэ но ӧс котыре эн пуктэ — пыраменыды-потаменыды, азбарысь пӧртэм куараос шуккиськемен, ӟазег отын пукыны ик уз быгаты. Борддоръёс кезьытэсь ке, карзэ бордаз ик эн ляке.

Гидын 15 градус луыны кулэ. Кезьыт ке, обогревательдэс огдырлы лэзьялэ.

Карез ӧз кельшы ке, ӟазег пуззэ лушкем азе вайылыны кутскоз. Пузаны мылкыдзэ ӝутон вылысь караз пӧечи пуз понэ.

Воксё пуксемез ке уг поты, ӟазегез луэ четлык улэ пуктыны. Гадьысьтыз кӧня ке тылызэ ишкалтэ но караз понэ на, аслаз кадь мед йӧтоз. Кык-куинь нунал куспын со дышыны кулэ. Зэм, осконтэмез улэ умой пузъёсты пуктыны жаль. Соин ик пу пузъёсты пуктэ. Четлыкез басьтэм бере ӟазег карысьтыз ӧз султы ни ке, соосты умойёсызлы воштоды бер ӝыт — пеймытэн мар каремдэс валатэкгес кылёз.

Ӟазег пуксьыны малпа ни шуыса, возьматоз карез котыраз но пушказ тылыосыз луозы. Озьы тылобурдо карзэ дася.

ӟазег

Ӵукнаез возьман

Ӟазег ӵемгес пуза вазь ӵукна, нунал кельтыса. Соин ик чакланы эн вунэтэ. Одно ик пуззэ утялтэ но 12-15 градус шуныт но пеймыт интые понэ. Гидэ эн кельтэ. Кынмыны шедем сяна, пузэ кӧм пыртӥ пыӵало тузон но гидысь вань кырсез но зынэз. Та пузлэсь ӟечлыксэ сӧре. Собере, пузъёсты 20 нуналлэсь кема утёно ӧвӧл — вужмемезлэн пайдаез сыӵегес луоз ни.

Ӟазег улэ 10-13 пузлэсь уно пононо ӧвӧл — ваньзэс огкадь шунтыны уз вормы. Гидын тӧл но медаз шула, но омырез но тырмымон медло. Чипыослы сярысь, ӟазегпиослы 5 поллы уногес кислород кулэ.
Тылобурдолэсь тросгес пузамзэ возьмаськоды ке, сое умойгес сюдэ. Эн жалялэ витаминъёсты но минералъёсты. Пузаны кутскемзы азьын мумы ӟазегъёс, айыосыныз ӵошатыса, ӝыны килограммлы секытэсьгес. Секталазы шуак усе ке, озьыен, урод сюдӥськоды. Туж пайдаё сиён — удам чабей. Но ӟазегдэс эн куайытэ — пузамысь дугдоз.

Собере, нырысетӥ араз ӟазегъёс урод пузало. Шорлыдын ӟазегпузлэн секталаез 150-160 грамм. 220 граммлэсь секытгес ке, сое пи поттон вылысь возёно ӧвӧл — 2 ӵужо со. Ӟазегдылы ик пыргытыса сюдэ.
Ӟазегез пузъёсыз вылэ ӝыт пуктэ. Уй ӵоже ум йылтӥз со выль роляз пыроз. Умой мумы соку ик пузъёссэ ас улаз питыръя, умой шобыртэ, бергатыны ӧдъя. Со сиськон сярысь но куддыр вунэтэ. Соин ик карез доры одно пуктоно посудаен ву, сезьы но чабей. Кизер сиён туж эн сётъялэ: кӧтаз йӧтӥз ке, пузъёссэ сапталоз. Сыӵе пуз сӧриськыны быгатоз.

Пуктэмды бере нырысь нуналъёсаз ӟазег котыртӥ эн ик бергалэ. Сиемез уг поты ке, кужмысь эн каре. Карезлы дышиз ке, ачиз султоз. Зэм, куинетӥ нуналаз но сиён шоры уг учкылы ке, каллен бурдъёстӥз кутэ но кар вылысьтыз васькытэ, сиён доры вуттэ. Сюдон вылысь 20 минутлэсь кема юмшатыны уг яра. Туж умой луоз, со дыр куспын ӟазег вуын пыласькиз ке. Аслаз но мылкыдыз капчи луоз, пузъёссэ но кот тылыосыныз коттоз. Ву ӧвӧл ке, асьтэос пузъёссэ пазялэ 15-тӥ-16-тӥ нуналысен, нырысь нунал келляса, собере нуналлы быдэ. Ву 39-40 градус шуныт медло.

Пузъёсты эскерон

Ӟазег сиськыку, чаклалэ пузъёссэ. Пилиськем-паньгамзэ куштэ. Со сись уго — умоез юн возиське. Сое исатэк кельтӥды ке, сись пузысь микробъёс чылкыт пузъёс борды лякиськозы но кӧм пыртӥ пушказ пырозы, кылдэм ӟазегпиез быдтозы.

Пузъёсты югыт шорын учкыны кулэ 10-тӥ-11-тӥ нуналаз. Пиё пуз ке со, ӵужаз пеймыт горд вишты адӟиськыны кулэ — со кылдэм лул, со бордысь пӧртэм интыосы горд вирсэръёс кошкыны кулэ. Пуз лултэм ке, пушкыз чылкыт. Нош пиез кулэмын ке, виресь кульчоосты гинэ адӟоды. Урод пузъёсты одно ик карысь утялтоно, соос ӟазеглэсь шунытсэ гинэ кыскыса улозы. Али вань кужымез сётоно ӟеч ӟазегпи поттонлы.
Кыкетӥзэ пузъёсты котыр ласянь эскероно 27-тӥ нуналаз. Югыт шоры карыку, адӟиськыны кулэ вырӟылӥсь вужер.

30 нунал куспын ӟазегпиос ӵогиськыны кулэ. Мумызы улысь соосты куасьмемзы бере гинэ басьтоно. Гогыоссэс йодэн сутӥды ке, ӝоггес бурмозы. Кӧм туж юн но ӟазегпи сое пильыны уг вормы ке, пузэз шуныт вуэн гылтоно но ӟазег улэ пононо. Озьы но уг вормы ке ӵогиськыны, пичи пась лэсьтоно.

Куасьмем ӟазегпиосты шуныт азе пыртоно. Ӝоггес мед чебертӥськозы шуыса, соосты кӧс азе коробкае интыяно, улзэс ӵем вошъяно. Вадьсазы 200-300 ваттъем лампа ошоно. Лампа огкадь мед шунтоз шуыса, патрон борды кортлэсь 60 сантиметръем круг вандыса шедьытоно. Со радиусэтӥ огкадь шуныт лыктэ. Лампа улын 28-30 градуслэсь пӧсь луыны кулэ ӧвӧл. Вань пузъёсысь ӟазегпиос ӵогиськем бере гинэ пиосты мумызы улэ поттоно.

Туспуктэмез Денис Корниловлэн

 

Удмурт Дунне
By Удмурт Дунне Апрель 8, 2015 10:08