Кияр мерттӥсько пул пызе

Удмурт Дунне
By Удмурт Дунне Апрель 8, 2015 13:00
Огреч вуоз, июнь кутскыку.

Огреч вуоз, июнь кутскыку.

Ирина Оглезнева, кема аръёс ӵоже сад-бакча возись

Июньлэн нырысетӥ нуналъёсаз ик семьяме киярен сюдыны кутскисько. Кидысъёсты удатӥсько апреле ик укно азьын.

Кидысъёс ог 4-7 нунал ӵоже потыны выро — та вакытлы соосты шуныт интые пуктӥсько. Но бычыямзы бере ог 15-16 градусын возисько — сотэк юнме кузь нуйтӥсько, лябесь луо. Корка пушкады ӝокыт ке, уйлы ке но укноостэс ӟубис кельтылэ.

Кияр кидысъёс, нимаз-нимаз выжыятыса, умойгес будо. Али лавкаын торфлэсь лэсьтэм стаканъёс вузасько — соос умой луозы. Но мон ачим гинэ но мерттон инты лэсьтӥсько. Газетэз ог 15 сантиметр пасьта вандылӥсько. Кӧня ке полэс бинялтӥсько, клеен лякисько, луоз скрепкаен гинэ но юнматыны. Пыдэссэ одно пытсанэз ӧвӧл. Со стаканъёсме чуренак тырисько векчи пул яке картон вылэ, котькудаз быдэн 1 кидыс согисько.

Бен, удъёсты ящикын но будэтыны луоз. Но выжызэс вӧсь каронтэм вылысь соосты мерттоно пул пызе. Но эн вунэтэ: ящике понэмлэсь азьло пул пызез быректэм вуэн кисьтоно. Улаз кӧня ке гинэ ватсано кема кыллем кыед, ӟеч сюй — кияр удъёс соку таза будозы. Пудо уд вордӥське ке, кыедэз воштӥсь удобрение али лавкаын но вань. Кидысъёсты кизисько пул пызе ик. Ог 1 но ӝыны сантиметр мурдалае.

Кияръёсме майлэн нырысетӥ нуналъёсаз ик поттӥсько теплицае. Музъемез мускыт мед улоз — арнялы одӥг пол ке но шуныт вуэн кисьтано, чакласьконо, будосъёслэсь выжыоссэс вӧсь карыны медад шедьтэ.

Удмурт Дунне
By Удмурт Дунне Апрель 8, 2015 13:00