Оштолэзе бакча сярысчь сюлмаськоно

Удмурт Дунне
By Удмурт Дунне Апрель 8, 2015 11:34

Венедикт Дадыкин, агроном

Апрель пумын, май кутсконын куазьлы оскыны уг луы на: я шунды тыбырез пыже, я выльысь кынтэ.

Лэсьтӥськом шуныт убо

Музъем «шуна», омыр 5 градус котыр возиськыны кутске ке. Сад-бакча возисьёслы та вакытэ дыртоно, котькуд нунал дуно — музъеме лымы ву пыӵаса быремлэсь азьло убоосты дасяно.

Тросэз сад-бакча возисьёс лымы люкъёсты пазяло-таркало, ӝоггес мед шуналозы шуыса. Озьы музъемзы вазьгес шупа. Валамон, нырысь кизиськом теплицаосы. Нош теплицады ӧвӧл ке, бырйыны луоз шунды шорысь вырйыло интыез. Сое нырысь ик быректэм вуэн пуж-пуж кисьтано, собере арнялы сьӧд зӧк плёнкаен шобыртоно. Кезьытъёсты чидась салатэз, редисэз, укропез кизьыны 2-3 квадрат метр гинэ но тырмоз.

Нош шунытэз яратӥсь кабачокъёслы, патиссонъёслы, уката ик огречъёслы нимысьтыз шуныт убо одно дасяно. Со понна убо кузя ог 30-40 сантиметръем канава гудоно, сое вуж куроен, кылем арысь кылем куаръёсын тырмытоно, лапкатонэз ӧвӧл. Кыед ватсады ке — уката умой луоз. Вылтӥз ог 2 сантиметр ӝужда сюен согоно. Убое мерттӥськем бере вылаз корт дугаос тыроно но плёнкаен шобыртоно. Тӧл медаз ветлы шуыса, плёнкалэсь дуръёссэ пачкатоно.

Мон ачим куддыр дугаос но уг тыриськы. Музъемез шобыртӥсько сьӧд плёнкаен, сое пась карылӥсько но отчы кабачок, каун кидысъёсты донгасько. Шобрет улын +15 градус луэ ке, огреч но мерттыны яралоз ни. Будӥсь удъёс кынмыны медаз шеде шуыса, вылазы капчи небыт сюй, кылем арысь кылем куаръёсты тырисько на.

Шуныт убо лэсьтыны эшшо одӥг амал вань. Сое пулъёслэсь ӧжытсэ ог 50 сантиметр пала ӝутоно. Музъемысь кезьытэз кортнан понна короблэн пыдсаз пластик бутылкаосты чурен тыроно. Соос пытсамын мед луозы — ӵапак пушкысьтызы омыр убоез кезьытлэсь утёз. Убо вылэ тыроно кылем арысь кылем куаръёсты, векчи вайёсты, собере — ӟеч сюй.

Вазь кизьыку, кидысъёс кӧсэсь, бычыяны кутскымтэесь мед луозы — озьы соос уз сисьме.

4-7-2

Сииськом чырстурын но пушнер

Кема аръем будосъёсты кизись-возисьёс тулыс ик витамино сиён вылэ выжыны быгато ни. Шунась лымы улысь соку ик бычыяны кутско ботун сугон, шпинат, чырстурын, ревень. Но эн вунэтэ: вазь потӥсь будосъёслы витаминъёс кулэ — шунам лымы ву гинэ уг тырмы, соин ик соосты сюдоно азот удобрениосын — мочевинаен яке аммиак селитраен (1 ведра вуэ 1 бадӟым пуньы).

Кема аръем будосъёсты кидысысь будэтыны секытгес. Соин ик соосты выжыен мерттыны турттэ — вазь ик сиыны ярамон луозы.

Эшшо: нырысетӥ витаминъёс пыд улын тулыс ик пото: пушнер, унябей. Унябейлэсь кузял шӧмзэ быдтон понна нырысь ик ог ӝыны час ӵоже сылал вуын возёно. Солэсь салат лэсьтӥды ке, ческыт сяна, тазалыклы туж пайдаё луоз. Нош пушнер но унябей куаръёсты парем вуэн йырсидэс миське — пунэтъёсты юнмалозы.

Сутэрлэн соку-соку гинэ бычыясь куаръёсыз туж ческыт зыно но пайдаё. С витаминэз отын, емышъёсыныз ӵошатыса, 3 поллы тросгес. Соин ик, чай парыкуды, эн вунэтэ та сярысь!

Сутэрпу мерттӥськом, астра кизиськом

Сутэрпуосты, улмопуосты но мукет емышо куакъёсты-писпуосты улӟыны-вожектыны кутскыкузы ик, пазяно нымы-кибыослэсь суретъёсын — соос али пӧртэм пумоесь, кылсярысь, умой луозы «ФАС» таблеткаос (10 литр вуэ 2-сэ пононо). Берло дыре кылдӥзы лякиськись лентаос. Соос вамен выллань тубыны уг быгаты нымы-кибыослэн армизы — эскере.

Емышо писпуос, куакъёс мерттыны чакласькоды ке, та уждэс озьы ик берлолы эн кельтэ. Умой луоз, соосты куаръёссы потэмлэсь азьло выль интые выжыятӥды ке, озьы соос вӧсь уг луо. Уката дыртоно сутэрпуэн, крыжовникен, жимолостен — таосыз, мукет будосъёсын ӵошатыса, ӝоггес вожектыны кутско.

Вунэтыны уг яра сяськаос сярысь но! Пырак музъеме кизьыны луоз ни календулаез, астраез, космеяез но куд-ог мукетъёссэ.

Туспуктэм: Александр Горбунов

Удмурт Дунне
By Удмурт Дунне Апрель 8, 2015 11:34