Картэз улӟытэ кортэз, кышноез — шортэз

Удмурт Дунне
By Удмурт Дунне Апрель 8, 2015 08:46
Пичи Пурга ёросысь Эгра гуртысь Чернов кузпалъёс.

Пичи Пурга ёросысь Эгра гуртысь Чернов кузпалъёс.

Пичи Пурга ёросысь Эгра (Алганча-Игра) гуртысь Лидия но Михаил Чернов кузпалъёс кыкназы ик кибашлыесь. Соослэн юртъер котырзы но сандык кадь ӝикыт, чебер лэсьтэмын.

Корка пушказы пырыса, эшшо но золгес синъёс мальдыны шӧтало. Борддоръёсын Лидия Григорьевналэн суредам но пужъятэм ужъёсыз ошылэмын. Соос, пе, бушесь медам луэ. Син шоры йӧто Михаил Евгеньевичлэн киосыныз лэсьтэм шифоньер но мукет арбериос.

— Мар мынэсьтым ужме учконэз, гужем тӥ Лидалэсь бакчазэ учкыны лыктэ ай, — шуэ Михаил Евгеньевич. — Котырак сяськаос мерттэ — бакчае но, азбаре но, укно улэ но. Бер сӥзьылозь соос милемыз шумпоттыса возё. Ма, коркан но соос маке мында будо, пуштыр-пуштыр сяськаяло. Нош кыӵе Лида керттӥське, туж чебер вуриське но пужъятске. туж ческыт пӧра. Олоку гинэ ваньзэ лэсьтыса вуттэ.
Вазен Черновъёс туж трос пудо вордӥллям. Али, пе, ошпи куайытӥськом, кунян вордӥськом. Туэ мессэ скал каром, дыр, шуо, нылпиос, пе, йӧл куро. Турын октон-калтон сярысь уг сюлмасько — со али котькытын будэ, техниказы но котькыӵеез асьсэлэн вань.

Кузпалъёс кыкназы ик та гуртын будэмын. Лидия Григорьевна гуртазы тэшкылиосты 28 ар дышетӥз. Ачиз ик школаен но кивалтӥз. Кылем арысен, школазэс пытсамен, артысь Гожня школае выжиз, отчы нуналлы быдэ ветлэ.

Нош Михаил Евгеньевич «Уромское» ОПХ-ын механизатор вал, собере отысь кошкиз, туннэ ас понназ ужа.

— Ульчаысь-а, нюлэскысь-а, кытысь гинэ корт уг шедьты, ваньзэ доре вае, — кузпалыз сярысь вера Лидия Григорьевна. — Кытӥяз куаретӥсько, эн нуллы оломае но татчы, шуисько. Нош со нокыӵе уг кариськы, кыштыр гинэ аслэсьтыз ужзэ лэсьтэ. Собере мыным возьматэ ини, тани, пе, картошка мерттон лэсьтӥ. Кӧня ке дыр ортче но, нош паймытэ — таиз, пе, картошка октон луоз. Турын-куар коран но лэсьтӥз. Нош кыӵе соос ӝикыт, чебер лэсьтэмын! Пырак магазинысь басьтэмын, кожалод. Магазинысь детальёс басьтыса но куштӥськем техникалэсь куд-ог арбериоссэ октыса, со быдэс трактор бичаз.

Черновъёслэн азбаразы тротуарзы но кортлэсь лэсьтэмын. Со милям барометрмы, шуэ нылкышно. Куазьлэсь кыӵе луэмзэ соя, пе, тодӥськом. Сӥзьыл-толалтэ умой возьматэ кезьытэз, нош гужемзэ шунды шорын корт ӟырдаса улэ.

3-7-2

Черновъёслэн азбаразы тротуарзы но кортлэсь лэсьтэмын.

— Пуэн вырыны туж ик мылкыды ӧвӧл ни, — ачиз сярысь кепырасагес вера воргорон. — Пичи дыръям выри ик вал: вандылӥ но, лусйи но, суредай но. Но мылкыды малы ке корт борды кыстӥськиз.
Черновъёс ар талэсь азьвыл бакчаязы, вӧл-вӧл интые, пилорама усьтӥллям. Бадӟым лапассэ кузё вазенгес пуктэм ни вылэм. Нош марлы со быдӟа пӧрмиз шуыса, ачиз но валамтэ. Табере иназ луиз — пуэз липет улын, зорлэсь но, котлэсь но со утемын. Со сяна, пичи арбериосты лэсьтон понна нимаз мастерскоез вань на. Чернов отын, кортъёсыз пӧлын, шутэтске, малпаське, выльзэ но чеберзэ лэсьтыны бурдъяське. Ӵемысь дораз кузпалыз но пыралля, кулэ дыръяз юрттэ, кытӥ-отӥ визь-нод но сётъя.

Чернов кузпалъёс 3 нылъёссэс будэтӥзы. Олесязы вуриськыны яратэ. Женя, бисерез сузьйыса, пӧртэм арбериос лэсьтэ. Таня тунсыкъяське компьютерен.

Черновъёслэн Ваня нуныкайзылы 6 арес ини. Таиз песятаез понна быремын — со вӧзын гинэ, трактор руль сьӧрын, уй-нунал пукысал, дыр.

Чернов кузпалъёслы туж синмаськи. Инмар соосты юнме огазеямтэ, дыр, одӥг-огзэс валаса но яратыса уло, кыкназы ик киужъёсын выро.

— Аслад киосыныд лэсьтэм ужед эшшо дуногес кадь потэ, — шуэ Лидия Григорьевна. — Али магазинын оломар но вань. Отысь басьтэм арберилы табере нокин уз паймы ни. Нош куке аслэсьтыд лэсьтэм арберидэ кузьмаськод, соку адямилэн ымнырыз ик воштӥське.

Вуж корказэс кесяса, Черновъёс улыно-вылыно чебер юрт пуктӥллям, укноосазы тузӥесь наличникъёс тыриллям. Нырысь ик корказэс пӧртэм буёлъёсын буяса возиллям, берло аръёсы сайдинген шобыртӥллям. Табере, пе, тросэз шуӧ юнме ваньмызлэн сямен коркадэс кариды, азьлоез ик чебер вал.

Любовь Тихонова

Удмурт Дунне
By Удмурт Дунне Апрель 8, 2015 08:46