Пылесос малпаське?

Удмурт Дунне
By Удмурт Дунне Апрель 2, 2015 15:23

Пылесос малпаське?

пылесос

Р2-Д2

Вуоно улонлэн одӥгез пусэз — роботъёс. Нырысь ик син азе пуксе корт машина — лултэм-сюлэмтэм ке но, вылтусызъя адямилы кельшись арбери. Но режиссёръёс но писательёс соосты лулъяло.

Дж. Лукас «Звёздные войны» — Р2-Д2 — пылесослы кельшись робот. Со вераське вакчи сигналъёсын, солэсь мудрон кылзэ котькин котьку вала. Р2-Д2 — бортинженер но, пилот но, эш но, дышетӥсь но. Со лякыт сямо, серекъятыны но быгатэ, нош аслаз ымнырыз ӧвӧл — соин ик мылкыдзэ валаны уг луы. 12+

Д. Джонс «Луна 2112» — Герти — та робот космической корабльлэн оглюкетэз луэ, соин ик корабльысь потамез уг луы. Интыысь интые нискыланы быгатӥсь бадӟым компьютер кадь. Таиз робот быгатэ вӧсь луэмез но эмъяны: со акылес нянька но, сюлмо доктор но. Мылкыдзэ возьмато экран вылэ потӥсь смайликъёс. 16+

Г. Дженнингс «Автостопом по галактике» — Марвин (та учыре Марвинэз кылдытӥсен лыдъяно Д. Адамс писателез, малы ке шуоно кино потӥз солэн книгаезъя) — депрессилэсь курадӟись робот. Ачиз со улонлэсь юрдэмзэ валэктэ тазьы: одӥг но задача уг быгаты визьзэ ӧжыт ке но вырӟытыны, малы ке шуоно со адямилэсь 50 сюрс поллы визьмогес. Вылтусызъя со корт шудон кадь — ки но, пыд но, быгылес йыр но вань. 12+

К. Нолан «Интерстеллар» — Тарс — мон малпамъя, котыр ласянь азинскем робот. Вырӟылытэк кылльыкуз — кровать быдӟа но матрац зӧкта чилясь корт пул. Зэмзэ ке, со конструктор кадь — быгатэ блокъёслы тӥяськылыны но, питран выллем бергаса, ветлыны, оломае но ас вылаз нуллыны. Вань на солэн тунсыко настройкаосыз — сямлэсь аспӧртэмлыксэ процентъёсын тупатъян, кылсярысь, зэмлыко луон — 90 процент, юморез валан — 75 процент. Ачиз Тарс та настройкаосыз сярысь вера: адямилэн одӥг сямыз но 100 процентэн уг луы. 12+

Вера ШТЫКОВА

Удмурт Дунне
By Удмурт Дунне Апрель 2, 2015 15:23