Маснэ но Лудкечпи

Удмурт Дунне
By Удмурт Дунне Март 26, 2015 14:08
6-24-1

Анна Конькова (1916-1999)- манси писатель, фольклорист

Выжыкыл

Шур дурын сылӥз пичи корка. Отын улӥзы Петось песянай Маснэ нуныкаеныз. Нылаш шудылӥз Лудкечпиен. Ӵукналы быдэ, шунды музъемез югдытэ, лысвуэз куасьтэ гинэ, Лудкечпи вуэ ини Маснэлэн коркаез дӥне но кеське:
— Маснэ, султы ини, ойдо ярдуре, луолэсь чум пуктом!
Маснэ пичи на, кӧлэмез потэ, но Лудкечпиез кылэ гинэ, кыре бызьыса потэ. Песянаез вуӵыртэ:
— Кӧл вал кемагес но гуртын пук вал шыпытгес! Тон ке шудонъяд берпуметӥ дэремдэ кесид. Мынам синъёсы лябӟемын: выль дӥськут вурем гинэ ӧвӧл — вужзэ гинэ но кышъяны уг пӧрмытӥськы ни. Тырмоз шудыса улыны!
Малпаз песянай Маснэез визьманы. Мукет нуналэ сайкатэ нуныкайзэ:
— Маснэ, султы, шунды коркамылэсь вань сэрегъёссэ югдытэ ини. Туннэ дышетскод вуриськыны.
Пуктӥз нуныкайзэ, кутӥз пужыё ватланзэ (чыры-пыры возён короб), усьтӥз сое но поттӥз вень возён миндэр, сӥньыс но пӧртэм буёло басма юдэсъёс.
— Нуные, — шуэ Петось, — кылзы сак: венез уг яра ыме тырыны, гадь борды бырттыны но выж вылэ куяны. Венез лапак, пичи миндэре бышкалтыса, возёно. Азьло сӥньыслэсь вакчи пумзэ вандоно, йылсо кароно но вень пасе донгоно, сӥньыс пуме герд керттоно, соку гинэ вуриськыны луоз. Учкы, кызьы мон карисько.
Но нылаш оло кылэ песянайзэ, оло уг. Верамез огаз пеляз пыре, мукетаз потэ. Маснэ выль шудон малпаса пуке.
Петось, чорыганы кошкыкуз, нуныкаезлы вераз:
— Маснэ, тани тыныд нуйсахи (мансиослэн гужем дӥськутсы), кышъя сое. Мон кошки.
Кутӥз Маснэ ватлан, песянаезлэсь нуйсахизэ, корказе потыса, кышъяськыны пуксиз. Сӥньыссэ вандӥз, йылсатытэк вене бырттыны кутскиз. Вень кияз позыръяське, серекъя:
— Ой-ой, Маснэ, эн бичаты монэ! Ой-ой, хи-хи-ха-ха!
Вень озьы бергаз-бергаз но ныллэн чиньыяз бышкалскиз. Маснэ кизэ зуркак кыскиз, вень усиз, шур дуре питыраз, вуэ усиз но выйиз.
Бӧрдэ ини табере Маснэ, вень но жаль, чиньыез но висе.
Лудкечпи гебыр-гебыр вуиз, Маснэ котыртӥ тэтча:
— Малы, Маснэ, бӧр-дӥськод?
Маснэ викышъяса-викышъяса вераз, мар соин луиз. Лудкечпи вешаз эшсэ но шуиз:
— Синвуостэ ӵушылы. Али ик веньдэ шедьто.
Пужалляз дэремзэ гырпумозяз, штанзэ — пыдесозяз но шуре пыриз. Йырзэ ву вадьсы ик мыкыртӥз — нырыныз гыре, кожалод. Туж сак учке — номыр уг адӟиськы. Шур пыдсысь кќльыос гинэ ворекъяло, кизилиос сямен, я ӝуатско, я кысо.

6-24-6
Кема утчаськиз Лудкечпи, куакъёс пӧлы пырыса, шӧдтэк шорысь трос веньёс шоры ӝимиз.
— О-о-о! — кеськиз Лудкечпи. — Трос веньёс! Одӥгзэ интые тӥни кӧнязэ шедьтӥ. Маснэ шумпотоз! — Огзэ венез кутэ вал но кышкаса кеськиз ук: — Ай-ее-е! Ой-ее! Аю-аю! Вӧсь, кыӵе вӧсь!
Маснэ дӥняз бызиз, вуизы на бубылиос — лобаса, эбекъёс — тэтчаса. Кедр йылысь васькиз Урдопи (бурундучок). Вуысь нырзэ поттӥз Вудорпи (выдрёнок). Абдраса учко, кызьы Лудкечпи маке быдӟа Ёрышлэн халатэз борды кутскем но сое вуысь кыске. Ваньмыз пӧйшуръёс Лудкечпилы юрттӥськизы Ёрышлэн лякиё-лякиё дӥсез бордысь мозмыны. Чорыглэн бамъёсыз йыркуръяськонъяз тӧдьыӟектытозь пульдӥллям, тани-тани пуштозы, Ёрыш, уян бурдъёссэ (плавник) выретыса, мертчем веньёссэ Лудкечлэн пыдысьтыз поттӥз но чаляк вуэ тэтчиз. Лудкечпи пубыоссэ пелля:
— Аю-аю!
— Кэ-кэ! — шуиз огез эбек. — Чальгес сюпсьы Ёрышлэсь ядзэ! Та чорыглэн венез мертчиськем бере лы висён кутске.
Лудкечпи чорыг ядэз сюпсиз, Маснэ яразэ шырбыжен (подорожник) биньылӥз. Нылашлы тау каремез бере Лудкечпи нош ик вень утчаны кутскиз. Ветлэ со шуретӥ, нош вадьсаз шаугетэ, йыркуръяське Тӧл:
— Мар тон шурын кариськод, люкетӥськод шутэтскыны?
Тӧл бурдъёссэ ӝутӥз, Лудкечпиез йыринуллань берыктӥз но ярдуре сапкиз. Лудкечпи пурысь гонзэ курткиз, ваменъяськыса нош ик вуэ пырыны медэ вал ини — со вакытэ тулкым пыдъёссэ коттӥз:
— Вшисс! Ме, басьты веньдэ. Акыльтӥд ини, луоез коламеныд — кӧлыны уд сётӥськы.
Адӟиз Лудкеч ярдурын кыллись венез, шумпотӥз:
— Маснэ, этэ-э-э! Тани тынад венед!
Маснэ венез кияз кутӥз но, песянаезлэсь индылэмзэ тодаз вайыса, соку ик бышкалтӥз сое вень возёназ. Собере вандӥз сӥньыслэсь вакчи пумзэ, чиньыеныз со вылтӥ ортчиз — векчиятӥз-йылсатӥз — сӥньыс вень пасе соку ик пыриз. Нылок шумпотӥз, вененыз вераське:
— Тон мынам эше, кузь быжо мусо тюливите (трясогузка)! Быжыдлэн пумаз герд лэсьтом но песянайлэсь нуйсахизэ вурӟом.
Маснэ вуре ӝог, Лудкечпи солы юрттэ: дӥськутлэсь сӧзулзэ возе. Нуйсахи дась луиз гинэ, вуысь адӟиськиз Ёрыш:
— Мар тӥ монэн кариды? Бускельёсы гинэ ӧвӧл, пиналъёсы но монэ ӧз тодмалэ. Тон милям бубымы ӧвӧл, шуо. Милямезлэн, пе, тыбырыз пеймыт, кӧтурдэсъёсыз виштыё-виштыё. Нош тон копак ӵуж — луо кадь. Уллязы монэ пиосы. Кызьы мон табере улом вордэм нылпиосытэк?
Бӧрдэ Ёрыш, синвуосыз усьыло шуре, ву пумен пеймытгес но тросгес луэ. Тани ӟоскыт луиз ини вулы, потӥз ӧрысьтыз, турын пӧлысь кибы утчась Зуез (зуёк) кышкатӥз. Сомында вуэз адӟыса, Зуй малпаз: тулыс берытскем! Кӧльы вылысь кӧльы вылэ лоба, шунам ву сярысь кырӟа:
Тял вить, тял вить!
Тял вить, тял вить!
Витя тял, витя тял!
Нош ву люкаське но люкаське, возез шобыртэ, тылобурдо каръёсты нуэ ини. Кышказы Маснэ но Лудкечпи, Ёрышез куризы:
— Ёрыш, эн бӧрды. Ми тыныд али ик вуромы чебер пужыосын выль халат.
Эшъёс доразы бызизы, чорыгамысь бертэм песянай возьматӥз, кызьы вуриськоно. Ӝоген нуйсахи дась луиз. Сое дӥсязы Ёрыш вылэ. Чорыг, ассэ ву вылысь адӟыса, пальпотӥз: туж яраз солы ёрыш пужыосын дӥськут. Маснэлы но Лудкечпилы тау шуиз но шур пыдсы гылӟиз. Ву соку ик югытаз, шур ӧраз пыриз.
Петось вень шоры учкиз но шуиз:
— Пичи, векчи, нош кужымез бадӟым.

Суредаз Константин Панков
Берыктӥз Ольга Вахитова

Удмурт Дунне
By Удмурт Дунне Март 26, 2015 14:08