Кык нунал — кык толэзь кадь

Удмурт Дунне
By Удмурт Дунне Март 26, 2015 08:23

прокрстинацияКотькудӥзлы тодмо, дыр, сыӵе мылкыд, куке кыӵе ке ужез, ӵуказе лэсьто ай шуыса, выльысь но выльысь кельтоно. Азьло мон малпасько вал, со огшоры азьтэмъяськон гинэ шуыса.

Ӧвӧл. Вань вылэм сыӵе висён — прокрастинация, психологиын та кыл возьматэ ужъёсты ялан ӵуказе нуналлы кельтонэз. Со висён, пе, нырысь ик студентъёс пӧлын паськыт вӧлмемын.

Асьмелэн валтӥсь героймы но — прокрастинациен висись студент. Со улэ общежитиын, кык адямилы чаклам комнатаын. Комнатаысь бускельзэ кемалась ӧвӧл дышетсконысь уллязы.

Студентлы, «Контактын» пукыкуз, самой со уллям эшезлэсь гожтэт вуэ: «Даров, тон курсовойдэ гожтӥд-а ни?» Пияш ӧз ик вала, мар сярысь гожтэ эшез. Ӧжыт улыса, ымнырыз кӧсэктӥз, сюлэмыз, гадьысьтыз потымон, йыгаськыны кутскиз.

— Ааа… кык нунал гинэ кылиз ни ук! — черектэ со комнатаез тыр, — али ик кутсконо!

Эшезлы номыр гожтытэк, усьтэ «вордзэ», гожтэ бамлэн шораз ик «Курсовая ра…», но гожтонзэ йылпумъятэк ик, вала: мар ке люкетэ татын солы. Экран шоры учкыса, пытса вань усьтэм приложениоссэ, шудонъёссэ но азьланьтэ гожъяськонзэ. Кык минут ортчыса, солы мӧзмыт луыны кутске, соин ик яратоно крезьгурзэ лэзе. Нош ӧжыт гожъяськемез бере комнатаез шоры учке:

— Да, алама мынам татын…

Кутске утялскыны: валессэ октэ, выжзэ ӵушылэ, книгаоссэ радъя но нош ик компьютерез азе пуксе.

Кӧня ке предложение гожтэмез бере книга усьтэ. Тыбырыз жадемысь, валес вылэ выдыса, гожъяськыны выре. Кӧня ке дыр ортчыса, кӧтыз сюманы кутске. Дыртыса бутерброд лэсьтыкуз, кетчуп кисьтыны шедьтэ. Нош ик комнатаез азьло кадь ик кырсь луэ. Студент нош ик утялтӥськыны кутске.

Озьы вырыса, быдэс уй ӵоже 4 бам гожтэ.

Мукет нуналаз со, лымшорозь изьыса, будильник таргетэмлэсь тэтчыса султэ но мисьтаськытэк ик курсовоез борды кутске. Но чыры-пыры ужъёс солы туннэ но люкето гожъяськонзэ быдэстыны.

Мукет ӵукна со вала быдэс уйзэ компьютер азьын ортчытэмзэ но гожтыса быдтэ берпуметӥ предложенизэ. Ӝогак дӥсяськыса, сиськытэк-маратэк университетэ дыртыса кошке.

Дышетӥсеныз пумиське. Соиз меӵак, паймемзэ ватытэк, юа студентмылэсь:

— Тӥ мар али татын кариськоды?

— Бон… вайи вал тани… курсовойме, — шуэ пияш куалектыса.

— Вазь ук ай, кык толэзь сётэмын на тӥледлы ужаны.

— Мон малпай вал…

— Вайиллямды бере, вае, учком.

Ӧсэтӥ потыкуз, выльысь но выльысь йыраз дышетӥсьлэсь кылъёссэ бергатэ. Аслыз вож потэмезлы чидатэк, вамышъя со дугдылонни пала. Кык (!) толэзь вал на ай солэн азьланяз, нош со кык нуналскын йылпумъяз ваньзэ…

Коли Михайлов

Туспуктэмез Денис Корниловлэн

Удмурт Дунне
By Удмурт Дунне Март 26, 2015 08:23