Кепырась писатель

Удмурт Дунне
By Удмурт Дунне Октябрь 21, 2014 13:19
ilf

Илья Ильф

Илья Ильф но солэн эшез

Октябрь толэзе 117 ар тырмысал «12 стульев», «Золотой телёнок» романъёслэн огезлы авторзылы, фельетонистлы, журналистлы но сатириклы Илья Ильфлы.

Илья Ильф вордскемын Одесса городын. Солэн псевдонимез пумысен трос вераськонъёс ветло. Анай-атаез солы Иехиел-Лейб Арьевич Файнзильберг ним сётӥллям. Озьыен, Илья Ильф — фамилиезлэсь, нимтулызлэсь но атай нимызлэсь аббревиатура луэ. Илья, писатель луоз шуыса, ӧз но малпа. Со дышетскиз технической школаын, ужаз пӧртэм интыосын — чертёжной бюроын, телефонной станциын но военной заводын.

1917-тӥ арын юмористической журналын ужа вал ини. Евгений Петров (Катаев) писателен соос тодматскизы 1923-тӥ арын. 4 ар ортчыса, «12 стульев» роман гожтыны кутскизы. «Шонерзэ вераса, — Илья Ильф сярысь тодэ ваёнъёсаз гожтэ Евгений Петров. — Ми Ильяен туж шер керетылӥмы. Ваче вуонъёсмы луо ке но вал, соос литература ласянь гинэ — оборотъёс яке эпитетъёс пумысен — потылӥзы». Соос ӵош ужаны кутскизы «Гудок» газетын, собере — «Правдаын» но «Литературная газетаын». Собере кыкназы ик выжизы «Крокодил» журналэ. «12 стульев» романэз гожтон сярысь огзы но ӧз малпаське вал. Со выллем роман гожтон пумысен кылпум поттылӥз Евгений Петровлэн агаез — тодмо нылпи писатель Валентин Катаев. Нош произведение кылдытон бордын Евгений Петровичен ӵош ужалом шуыса малпанзэ шараяз Илья Ильф.

1925-тӥ арысен Илья Ильф «Записная книжка» нуыны кутскиз. Со котьку но эшъёсызлы шуылоз вылэм: одно ик калыкысь лэчытэсь верамъёсты гожтыса кельтэ. Дыр ортчемъя ваньмыз вунэ. Мон валасько: гожтыны мылкыд котьку ик уг сузьы. Сыӵе дыръя астэ ачид кужмысь косоно — гожъя.

Произведениосаз но фельетонъёсаз «Записная книжкаысьтыз» гожъямъёссэ кутылӥз.

Илья Ильф писатель гинэ ӧй вал, со быгатыса но сюлэмзэ поныса туспуктылӥз. Но ужъёссэ калыке вӧлмытыны ӧз яратылы. Улонысь кошкемез бере Александра нылыз, атаезлэсь туспуктэмъёссэ огинэ люкаса, «Илья Ильф — фотограф» книга поттӥз.

Туберкулёзэн висьыса, Илья Арнольдович улонысь кошкиз 1937-тӥ арын. «Ильф тодӥз, со ӝоген улонысь кошкоз, — эшез сярысь одӥгаз тодэ ваёназ гожтэ Евгений Петров. — Соин ик берпуметӥ нуналъёсаз «Записной книжкаяз» туж ӝожесь гожъямъёсыз пумиськыло. Со туж кепырась вал, соин ик ачиз сярысь гожъямъёссэ калыке, шарае поттыны возьдаськылӥз, уката ик висёнэз сярысь».

«Записная книжка» печатласькиз И. Ильф улонысь кошкем бере.

Любовь Тихонова

Удмурт Дунне
By Удмурт Дунне Октябрь 21, 2014 13:19