Улон шапыкъёс

Удмурт Дунне
By Удмурт Дунне Октябрь 21, 2014 13:01
382382_112138062263644_2107701714_n

Суредаз Павел Микушев

Алексей Попов — коми писатель, «Би кинь» («Тылгизьы») нылпи журналлэн валтӥсь редакторез. Россиысь Писательёслэн огазеяськонзылэн ёзчиез. Гожтӥз прозаен даслэсь уно книга, 20 пьеса. Произведениосыз берыктэмын пор, удмурт, чуваш, фин, француз, венгер но мукет кылъёсы. Пьесаосызъя спектакльёс мыно Россиысь театръёсын. Кылсярысь, Удмурт театрын «Куке но пумиськом ай» спектакльзэ пуктӥзы.

Малпаськон
Анна Васильевналы туэ тырмиз тямыстон. Азьвыл кужмо вал, воргоронъёсын оградын тысен мешок ӝутъяз. Нош табере киыз-пыдыз дыр-р куалекъяло, кожалод, пельты шораз — тылобурдо мамык сямен тӧл сьӧры лобзоз.
Песянай пуке укно дурын, учке кузь пурысь кенер шоры но ортчемзэ тодаз вае. Ма кыле на пересь муртлы! Туннэ тани ма тодаз лыктӥз.
Пиез но нылыз пичи дыръязы огпол маке туж зол йырзэ кур каризы. Анна Васильевна вожомыса ик кесяськиз шоразы, шӧтэм кылъёс вераз. Кӧтвеськантэм кылъёс. Шулӟектэм пиналъёсыз шоры учкиз но йырси выжыозяз гордэктӥз. Вот албасты, пиналъёссэ ачиз уродэзлы дышетэ! Валаса ик уд быдты, нылпиос асьсэос шорад ыргетозы.
— Пиналъёс, алама кылъёсын вераськон нокинэ умое ӧз вутты на. Мынам со, шузилэн, кыл йылысьтым, ачим шӧдытэк, пезьдӥзы, — шуиз Анна Васильевна но нылыз но пиез адӟем медаз каре шуыса, песянаезлэсь кылэмзэ вераз.
Ораськиз огпол кышномурт — солэн но кык нылпиосыз вал. Нош уйин сайказ пыд куаралэсь — кин ке сеникысь васькиз кадь. Кышномурт туж умой тодэ: кӧлыны выдон азяз корка ӧсэз умой-умой куриказ. Но ӧс каллен гинэ усьтӥськиз — кинлэн ке кужмо киосыз корт курикез шонертӥзы.
Корка пыризы кык ӝужыт пиосмуртъёс. Кышномурт пеймытын адӟиз вужеръёссэс. Тани соос валес йыразе вуизы ини. Анай кылле, вырӟыны, куара поттыны дӥсьтытэк — кышка бордаз кӧлись пиналъёссэ сайкатыны. Тани кышномурт дӥсьтыса но дӥсьтытэк йырзэ ӝутӥз, шобретсэ ныр дорозяз ик кыскиз но ӧтьымтэ куноос шоры синъёссэ ӝуттӥз.
Огез воргорон шуэ:
— Ми тон дуре лыктӥм. Бадӟым сьӧлык лэсьтэмед — ораськемед — понна сьӧрамы нуом, дӥсяськы.
Анай валесаз ик пумиз.
Мукетыз пиосмурт мыр-мыр шораз учкиз но шуиз:
— Ярам, туннэ ум нуэ. Валаса выдэмед — пиналъёсыд вискы. Сотэк милесьтым мозмыны ӧй быгатысалыд.
Озьы шуыса, пиосмуртъёс ӵуштырак потӥзы.
Со дырысен кышномурт тышкаськемысь дугдӥз. Пиосмуртъёс но ӧз возьматскылэ ни.
Вераз тае Анна Васильевна пиналъёсызлы. Уйин сайказ пель дӥняз пыс-пыс шокамлэсь: бордаз выдӥллям пиналъёсыз. Пиез бурпалан кылле, нылыз — паллянпалан. Уг кӧло, ӝомалын синъёссы чиляло.
— Эн кошкема, анай, ми тонэ мурт дядяйёслы ум сётэ.
…Тодэ ваёнъёс Анна Васильевналэсь синвуоссэ поттӥзы. Пиналъёсызлэн олокыӵе вужеръёслэсь утемзы солы кулэ ӧвӧл. Пересьёслэн юртысьтызы басьтысалзы ке…

Гожтэт
Зинаида Васильевна улон шоры ас сяменыз учке. Нылкышно понна, оло, укыр лек но. Улытозяз хирургын ужамез чурытомытӥз, дыр, сое.
Токма зулёнлэсь возиськылӥз. Туж кулэ гинэ ке, кык-куинь кыл вералоз но чалмоз. Кин ке соя уг кариськы ке, со адямилы воксё уг вазьылы ни, озьы ӟеч эшъёссэ но пумен ыштӥз — азыны кутскем чиньыез вандыса куштэм кадь.
Картэныз но кема малпаськытэк, куректытэк люкиськиз кусыпсы пичи гинэ тэшкам бере ик. Мукетыз нылкышно кузпалзэ кӧяны-вӧяны вырысал, Зинаида Васильевна ӧз пыриськы — улляз но, ужез быриз. Огназ улыны ӝог дышиз. Туж умой — мае ке кытчы ке понӥськод ке, отысь ик басьтӥськод.
Тани туннэ но. Кулэ луиз институт вакытысьтыз вашкала тетрадез — кема утчаськытэк, шедьтӥз. Ӵужектэм бамъёсты лисъянъяз Зинаида Васильевналэн ки улаз шедиз вужмем конверт — малы ке усьтымтэ. Векчи гинэ — гожтэтэз укыр вакчи, вылды. Вылаз гожтэмын азьвыл картэзлэн киыныз: «Зиночкалы».
Зинаида Васильевна тодэ ваёнъёсаз бугыръяськиз: Дмитрий та гожтэтэз пӧраз ӵош улыны кутскон аразы. Со нуналэ, куке Зинаида Васильевна Димаеныз сэрен туж ӝожомиз. Сюлмыз ик путэ вал ини, соин ик Димаезлэсь валэктыны выремзэ но ӧз кылзы, кӧлыны выдон азязы сётэм гожтэтсэ но ӧз лыдӟы. Лекъяськонъяз бумагазэ тетрадь вискы донгиз но уно аръёслы со сярысь вунэтӥз, пӧрмиз.
Табере тани тетрадьзэ ӝӧк вылэ понӥз но конвертэз усьтӥз.
«Юсе мынам, дуно, мусо Зинӥе! — гожтэм картэз. — Туж курисько, эн йыркуръяськы — янгыш мон, вордӥськем нуналад кузьым басьтыны ӧй быгаты шуыса. Тод: мынам коньдонэ ӧй вал. Ӵукна базаре ветлӥ, малпай, ӟичы кулэсь изьыме вузало, но шораз учкись ик ӧйлась — гужем. Озьы тон, чебере мынам, кылид кузьымтэк. Но вождэ сокем ик эн потты, малы ке шуоно мон тонэ туж яратӥсько. Димаед».
Зинаида Васильевна гожтэтэз сачкетӥз ӝӧк пуме. Огдышем сяменыз пуксиз чай юыны. Но чаез малы ке ческыт ӧз поты, бӧрдонэз ым пумаз вуиз. Но Зинаида Васильевна ассэ юн кырмиз. Кышнопалась ури-бери потӥз, ӝӧк вылысь гожтэтэз басьтӥз но ур-вар векчи-векчи кесяз.
«Кинлы кулэ тынад кей корам изьыед?» — малпаз картэз сярысь. Чайзэ одӥг гучыкен юиз, ньылоназ дугдэм бӧрдонэз пушказ погыльскиз.

Зульым саля
Гуртын улӥз Григорий Степанович — мукетъёслэсь пӧртэм воргорон. Инмар солы сётэм калык азьын чебер вераськыны быгатон. Ужез, бен, зулёнэн герӟаськемын: калык пӧлтӥ, тӥр, литовка, бычкы, вӧлыса ветлэ. Но кыллэн серметэз ӧвӧл! Быгатэмдэ уд ваты!
Григорий Степанович вань кенешъёсы одӥгтэм ветлылӥз. Сэрегын гинэ шымыртӥськыса уг пукы. Калык азе потыса, дыльдыез пазяськыса ик, кема вераське. Сыӵе оскымон, вольыт вера, гуртоос кылзэ кельтытэк кылзо, йырзэс мыкыръяло: озьы, пе, озьы, шонер.
Григорий Степанович малы ке ӵемгес курлалляз сельпоын ужасьёсты. Обидиллям, шодске, куке. Пайщикъёслэн собраниосазы Григорий Степанович трибуна сьӧрысь часъёсын ӧз васькалля. Нырысь пышкылӥз, калыкез сюдыны-дӥсяны манӥзы ӧвӧл шуыса. Собере, чиньыосаз тырыса ик, валэктылӥз, кӧня но мае ваёно магазинэ. Калык лычсузьыса ик чабе, визьмо шуыса ушъя.
Кызьы, пе, сельполэн предэз сое гинэ валамтэ ини, тини ук Григорий Степанович шонер вера, соя кариськоно. Азьло сельпоын вал пред, бух но одӥг гинэ вуз карись. Магазин ӝажыос товарез ӧз вормылэ. Табере ужасьёс улыно-вылыно юртэ уг тэро, ог-огзы вылын пуко, нош падизы уг шӧдӥськы.
Оло, али но Григорий Степанович кенешысь кенеше зульыса ветлысал ай, кинлэн ке тодаз ӧй ке лыктысал сое председателе ӵектыны. Учке, пе, кыче умой со тодэ, кызьы вуз кароно: ма кулэ, шедьтоз, кӧня кулэ, вузалоз. Бырйизы ведь.
Григорий Степанович предын толэзь ӵоже возиськиз. Тулысозь. Йӧ кошкем бере шур кузя баржаос ветлыны кутскизы: выллань — олокыӵе но арбериосын тырмемынэсь, секытэсь, уллань — бушесь, капчиесь. Огез гинэ баржа бекыръяськыса мырдэм ваське. Товарзэ кельтымтэ, иське. Дугдӥз Григорий Степановичлэн гуртэз вадьсы. Кема ик дыр ӧз ортчы, сельпое лунгыр-лангыр пыриз нылкышно: кытын, пе, председательды? Тӥни, ӝӧк сьӧрын пукисьёс Григорий Степанович шоры возьматӥзы.
— Гажано председатель, ми тӥлед быдэс баржа тыр вайимы ческыт курег силь, — тачыртэ нылкышно. — Гуртоослы яралоз: диетической, тазалыклы туж пайдаё. Оло, тӥледлы кӧнязэ ке кельтоно?
— Малы «кӧнязэ ке»! — бурсӥз Григорий Степанович. — Милям кӧняен ке гинэ кӧтмы уз тыры. Ваньзэ ӝоктэ.
— Ярам, иське, — шумпотӥз кышномурт но сумкаысьтыз накладнойёссэ ӝогак поттӥз — малпанзэ воштэмезлэсь азьвыл пред кизэ мед нюртоз.
Сельполэн бадӟым складаз радэн-радэн тыризы кузялэс ящикъёсты. Троссэ магазинэ нуизы. Но гуртоос ваменскизы: быдэн кык-куинь тылобурдо басьтӥзы но, курег сӥль сиыса, вуёмим, пе. Ми, пе, гужемлы парсь сӥль трос сылалтӥм вал.
Складын кыллись курегъёс нырысь шукыяськизы, собере котырысьтызы нырез чатыртымон зын потыны кутскиз. Кӧшам сӥлез гурт сьӧрысь нюке согоно луизы.
Григорий Степановичез председательысь куштӥзы. Сисьтэм сӥль понна коньдон куризы на. Али но тыриське на, дыр. Умой ай, пытсэт сьӧры ӧз пуктэ.
Та учыр бере Григорий Степанович визьмаськиз: кенешъёстӥ костаськемысь дугдӥз.
Берыктӥз Ольга Вахитова

Удмурт Дунне
By Удмурт Дунне Октябрь 21, 2014 13:01