Карысь гуртэ, гуртысь каре

Удмурт Дунне
By Удмурт Дунне 28 августа, 2014 13:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

экс«Арт-экспедиция» 5 гуртъёсты котыртӥз. Удмурт егитъёс фольклор бичазы, пӧртэм мастер-классъёс ортчытъязы но концерт пуктылӥзы.

Городэ гинэ вуыса, егитъёс калыксылэн культураезлэсь аспӧртэмлыксэ шӧдо. Озьы соос удмурт лулчеберетэз асьсэ яратоно ужазы азинтыны кутско. Таня Тихонова но Лиля Леонтьева калык гуръёсты но эктонъёсты утё, Аня Образцова но Богдан Анфиногенов туала кырӟанъёс кылдыто, Марина Сергеева но Алина Крестьянинова вотэсын удмурт кылын бамзэс нуо, Надя Наговицына но Костя Никитин театрен выро, Гриша Григорьев компьютеръёсы удмурт шрифтъёсты пуктылэ, Мария Игонина тыл бергатэ. Нош оглом та етӥз егитъёс одӥг командае пыро, кудӥз гуртын улӥсь егитъёсты кык нунал куспын тодматӥз городын пушйись удмурт культураен.
— Проектмы пуктэм ужпумзэ быдэстӥз — гуртысь егитъёслэсь сюлэмъёссэс ӝуатӥз но соослы удмурт культуралэсь узырлыксэ возьматӥз. Егитъёслэн блогъёссы кылдӥзы, гурт калык мастер-классъёсын выль тодон-валанъёс басьтӥз. Али милям ужмы азьланьтӥське на. Бичам материалэз вотэсэ поттоно но лэсьтэм ужмылы йылпумъянъёс лэсьтоно, — вера проектлэн кивалтӥсез Ольга Тронина.

Нош кызьы «Арт-экспедиция» ветлӥз гуртъёстӥ, гожъязы тодмо блогеръёс.

Алина Крестьянинова Кез ёросысь Александрово черкогурт сярысь
Ваньмыз тодо вал, Александровоын Ваня Белослудцев но Ксюша Ворончихина вордӥськемын шуыса. Гуртсы копак нюлэс пушкын, ӝужыт кызъёс урамазы но будо. Вань юртъерзы кенерен котыртэмын — соос озьы нюлэскысь пӧйшуръёслэсь утисько.
Мон куроен мастер-класс нуи. Дорам туж усто но тыршись нылкышноос вуизы. Нош нылпиослэн турынэн куиськемзы ӧз поты. Али пиналъёс — азьтэмесь, шӧдске. Влад Степанов милемыз Богдан Анфиногеновлэн «Мыным кельше» кырӟанэзлы клипе снимать кариз.
Озьы ик клубен кивалтӥсь Пётр Тихонов милемыз гын сапег лэсьтыны дышетӥз, нош шаерчи Александр Иванов возьматӥз, кызьы сусыпулэсь ибырвесь лэсьтоно.

Марина Сергеева Якшур-Бӧдья ёросысь Кекоран сярысь

Кекоранын мынам пересь ӵужае чугун сюрес лэсьтэмын. Куке адӟи, кудмындалы со сюрес ӝутэмын, мон туж жаляй татын война вылтӥ ужамъёсты. Возьматӥзы на землянкаосты, отын уло вал ужасьёс… Кӧ гурезязы тубам. Азьло татын вукоос сыло вылэм. Гуртсы огшоры: трос вуж пу коркаос. Нош школазы марке кадь чебер. Алигес усьтӥськем. Собере мынӥмы черксэс адӟыны. Туж чебер архитектураез. 1844 арын, пе, пуктэмын ини.
Татын «Ворекъян» фестиваль вал, ми ортчытӥм мастер-классъёс но концерт. Крезь лэсьтӥсь Вася Широбоков дораз ӧтиз, мастерскойзэ возьматӥз. Лад-лад лэсьтэмын. Изьыны нош выдӥм палаткаосы.
Мукет нуналаз 4 километр пыдын Сюровай гуртозь мынӥм. Гуртсылы, пе, тырме ини 400 ар. Отын ортчиз Выль. Милемлы возьматӥзы, кызьы вӧсяло ӝук, йыбыртто Инмарлы. Татын вань удмурт культурая «Табань» центр.


Дарина Лекомцева Эгра ёросысь Кабачигурт сярысь

Ми доры вуылӥз «Арт-экспедиция». Отын дышетӥзы сцена вылын шудыны, суредаськыны но мукет. Гожъяськон но блог лэсьтон ӵош вал — мыным удалтӥз. «Актёръёс» одӥг нунал ӵоже сыӵе чебер постановка пуктӥллям. «Чипчирган» ансамбльысь нылашъёс тодматӥзы калык кырӟанъёсын! Стрит-арт но тунсыко лэсьтӥллям: огшоры суредъёс гинэ ӧвӧл, удмурт писательёслэн но кылбурчиослэн туспуктэмъёссы! Пӧртэм суйпоскесъёс, монистаос лэсьтӥм на. «Пузкар» кино но учкимы, со бӧрсьы фаер-шоу вал. Ух!
Мон сыӵе шумпотӥсько али, удмурт кылэз тодӥсько шуыса! Азьло малпасько вал, соин пересьёс гинэ верасько, нош та нуналъёсы адӟи, кыӵе мынам анай кылы чебер.
Туннэ мон кутски нуыны удмурт кылын блог. Льӧль малпанам вань книга гожтон но удмурт фильмлы сценарий малпан. Кырӟасал но, дыр.

Мария Векшина Пичи Пурга ёросысь Улӥ Пӧсьтол сярысь
Мон ачим пурга ныл бере, Улӥ Пӧсьтолын асме гуртын кадь кожай. Милемыз Алина Черновалэн семьяез куноятӥз. Гурт туж чебер интыын пуке: лазегын, нош котыраз вырйылъёс но нюлэсъёс. Азьвыл котыраз трос ӟуч гуртъёс вылӥллям. Но колхозъёс бырон вакытэ ӟучъёс, уж утчаса, мукет интыосы кошкиллям.
Шумпотымон, гурт улэп: ульчаосын нылпиос шудо, тракторъёс ворттыло, адямиос ужало. Фольклор бичаса, ми Лиза апай доры пырам, со милемлы вӧсь писпу доры вӧсяськыны ветлэмъёссэ вераз. Гуртысь кышноос милемыз перепеч кутыны дышетӥзы, пиосты гур эстытӥзы. Асьмелэн мастер-классъёсамы трос покчиос лыктӥзы. Нылпиос ӟабыль гинэ удмурт кылын верасько.

Алнаш ёросысь Чем-Куюк сярысь
Чем-Куюкын Фёдор Драгомиров 1912-тӥ арын тӧл вуко лэсьтэм. Со вуко али Лудорвай музейын сылэ. Ошмес дорысь ми тубим Рублёвка шуоно ульчатӥ. Татын, пе, узыр адямиос уло.
Бырон калэ вуэм Ключёвка гуртэ вуылӥм. Отын али куашкам черклэн фундаментэз вылэ выль пу черк ӝутӥське.
Школаын нылпи ансамбль но вань. Соос ваньзы Таня Тихонова но Лилия Леонтьева доры эктыны мынӥзы. Концертэ, чиль удмурт дэремъёссэс но монистаоссэс дӥсяса, вуизы. Богдан Анфиногеновлэн кырӟамезъя шумпотыса тэтчазы. Концерт бырем бере удмурт кылъя дышетӥсь Елена Герасимовна Смирнова милемлы тау кылъёссэ вераз: «Шумпотӥсько, «Шундылэн» сиосыз ми дорозь но вуизы».

Мария Абрамова

Удмурт Дунне
By Удмурт Дунне 28 августа, 2014 13:10