Людмила Улицкаялэн котькуд книгаез — улонэзлэн оглюкетэз

Удмурт Дунне
By Удмурт Дунне Май 21, 2014 11:18

Людмила Улицкаялэн котькуд книгаез — улонэзлэн оглюкетэз

улицкая

Людмила Улицкая.

Инмарлы тау, иземе уг луы шуыса

Нырысетӥ книгазэ та кышномурт гожтӥз 50 аресэз бере. Туннэ со быдэс дуннелы тодмо писатель, романъёсыз берыктэмын 25 кылэ. 71 аресаз но калыкен пумиськылэ, библиотекаосы дунтэк  вуттэ уно авторъёслэсь книгаоссэс. Людмила Улицкаяен пумиськон ортчиз Ижын. Солэн малпанъёсыныз дэмласькомы тодматскыны.

 

  Литература

— Лыдӟисько сое, мар мыным тунсыко но ужъя кулэ луэ. Валес дорам кӧня ке стопка книгаос сыло. Ваньмон дыры кылдэ ке, лычсузьыса ик кутӥсько научно-популярной изданиосты. Туж кельшо Александр Марковлэн (палеонтолог, биология наукаосъя доктор) адямилэн эволюциезлы, генетикаезлы сӥзем книгаосыз. Мон дышетскемея генетик, наукаен кемалась уг ни выриськы ке но, мыным со тунсыко. Мар луэ али та удысын? Зэмос революция, шуысал мон, но малы ке со сярысь нокин уг тоды.

Поэзия — литературалэн тужгес вылӥ формаез. Прозаен ӵошатыса, со чебергес, напгес, мургес. Инмарлы тау, пересьмыса уйёсы иземе уг луы ни. Угось мыным со пайдаен гинэ берытске, лыдӟиськыны тросгес дыр шеде. Котьку ки улам кыллё И. Бродскийлэн, О. Мандельштамлэн но Б. Пастернаклэн кылбур бичетъёссы.

Туала литератураын маке чылкак выльзэ, та дырозь нокытын но гожъямтэзэ, кылдытыны туж секыт. Уго куке но, кытын ке но та выллем маке вал ини. Адямиос кӧня ке сюрс аръёс ӵоже книгаос гожъяло ини, нош темаос тросгес уг луо, мон шуысал, соос кӧня ке гинэ. Шонерзэ верано ке, вань умоез кемалась гожтэмын ини. Жаляса пусъёно, литературалэн зарни  даурез уз луы ни, угось вал ини А. Пушкин. Ю. Лермонтов, Ф. Тютчев но мукетъёсыз. Соос зэмос писательёс, нош ми, али гожъяськисьёс, востэм быгатонлыкъёсын усточиос гинэ. 20-тӥ даурез басьтоно ке, солэн шораз дуннеын туж модной вал фантастика. Тодӥсько ай, кызьы  ми вожмаськыса лыдӟылӥм Р. Бредбериез, Л. Шифманэз. Вуиз 21-тӥ даур, туннэ вераны луэ ни, та жанр вунӥз шуыса. Улон сокем зол азинскиз, ми фантастика но фантазия  вамен тэтчыса кошким кадь. Валамы, паймымонзэ кыдёкысь утчано ӧвӧл, сое адӟыны луэ микроскоп улысь. Улон воштӥське — воштӥське литература но. Табере асьмеос тодӥськом ини: улон ӟеч яке урод, тӧдьы яке сьӧд гинэ уг луы. Зэмлык но весяк уг вормы, со сётэмын ӧжыт гинэ. Югдуръёс, учыръёс но адямиос пӧртэм луо. Произведениос сямен ик. Но туала литература сярысь вераськыны вазь на, 21-тӥ даур али гинэ кутске ай, сое дунъялозы ини мукетъёсыз.

Туала писательёс сярысь эн юалэ. Мон уг яратӥськы та выллем юанъёсты: «Кызьы тӥ дунъяськоды В. Пелевинлэсь творчествозэ?» Виктор Пелевинэз калык юнме уг лыдӟы: синмаськымон автор, аспӧртэм малпанъёсын адями. Милям соин улон шоры учконъёсмы висъясько. Куд-ог произведениосыз мыным туж ярало, куд-огъёсызлэсь быдэс пушкы ик бугыртӥське, пумитъяське. Но коллегаосылы дунъет сётонлэсь возиськисько.

Мон туж яратӥсько веросъёсты: гожъяны но, лыдӟыны но. Но пумен валай, вань сыӵе темаос, кудъёссэ веросын гинэ уд ӝуты, уд вормы. Озьы кӧня ке роман гожтӥ. Пусйыны кулэ, огез но соос капчиен ӧз сётӥське. Али мон нош ик бадӟым книга азьын «сылӥсько». Выль роман борды кутскыкум, кышкасько: вутто-а мон сое пумозяз, малы ке шуоно, котькуд книгаез гожтыкум, кулон калэ вуисько. Со зэмзэ озьы, вирен сяласькон кадь, кужым но быре, но гожтытэк но уд быгатӥськы. «Даниэль Штайн, переводчик», «Зелёный шатёр» романъёс азьын но мон туж кема огинтыям лёгаськи, малпаськи, тырмоз-а ӟигары, уго улонэ йылпумъяськон пала мынэ ни. «Священный мусор» книгае, азьвылъёсыныз ӵошатыса, мукетгес, со шара малпаськон выллем. Та романэз гожъякум, мон ракен висисько вал. Лек пыктосэн йырин улон шоры учконэлэн оптикаез воштӥськиз. Та чер мыным туж умой опыт сётӥз. Тау Инмарлы, со берпуметӥез уже ӧз луы, собере но книгаосы потылӥзы на.

Тросэз юало, кыӵеез книгады тӥ сярысь гожтэмын яке кудӥз герой асьстэ вылысь суредамын. Котькуд книгаям вань маиз ке мынамез, ваньмыз соос мон пушкысь потэмын ук. Но тужгес но Люся Улицкаялы кельше, дыр, «Сквозная линия» книгаысь Женя нимо персонаж. Нялтас вераса, та книгаез быдэсак автобиографической шуыны луэ. Отын возьматэм учыръёс мынам, ӵыжы-выжыосылэн но эшъёсылэн улонысьтызы басьтэмын. Вераме потэ созэ но: мынам уг луы гожтэме, персонажъёсы уг ке кельшо. Соин ик котькуд герое мыным мусо, дуно потэ, мон соосты яратӥсько.

Али ужасько Наталья Горбаневская кылбурчи сярысь книгае бордын. Ми та паймымон кышномуртэн эшъяським 50 арлэсь кема. Секыт улонэз ортчыса но, Наталья Горбаневскаялэн лул-сюлэмыз ӧз измы. Ачиз сярысь со шуылӥз: мон туж ӟеч улӥ, психушкаын гинэ секытгес вал. Солы ик мон лэзи нырысетӥ веросъёсме. Эше шуиз: вот таиз тынад, нош кылбуръёс эн  ни гожъя. Мон солэсь кылзӥськи. Со бадӟым поэт вал. Мыным вань мар гожтыны та адями сярысь.

Творчество

— Инмарлэн адямилы сётэм тужгес бадӟым кузьымез — творчество. Со котькудмылы сётэмын. Одӥгез быдэс дуннелы тодмо писатель луэ, мукетыз нылпи садын ужа. Но вань сыӵе адямиос, кудъёсыз уг шӧдо, уг усьто, уг ужато со быгатонлыкъёссэс. Мон тодӥсько туж усто вуриськисьёсты,  соос  ас удысазы сыӵе мыло-кыдоесьгес но шудоесь, зэмос талантъёс. Творчество —  со кырӟан, эктон, кылбур гинэ ӧвӧл, куд-огез азбарез но сыӵе ӵуже, выросъёсаз, синъёсаз учкыса, валаськод:  солэн пушказ Инмарен сётэм тылсиез ӝуа. Сое кысоно гинэ ӧвӧл. Творчествоен эшъяськись адями эрико но кужмо луэ. Творчество уг яраты кивалтэмез. История возьматэ: литератураын бадӟым но зэмос произведениос кылдытъязы эрико гожъяськисьёс, кудъёсыз кивалтӥсьёслэн бурд улазы ӧй вал. Но та процессэн кивалтыны ӧдъяло ке, литература азинскемысь но калыкез югдытэмысь дугдэ.

Мон соглаш ӧвӧл В. Ленинлэн «Искусство принадлежит народу» шуэменыз но.  Таӵе веран сое быдтэ. Малы ке шуоно зэмос искусстволы нокин но кузё луыны уг быгаты. Искусство но творчество — лул-сюлэмез усьтон но пуш дуннеез шараян.

Кыл кутон

— Россилэн кык висёнэз: визьтэмъёс но сюресъёс. Малы али сое верасько? Ивор улэ маркировка (лыдӟыны, учкыны яра 0, 12 аресысен шуыса) пуктылон мыным туж шузи потэ. Адями пӧртэм сямен «кисьма». Куд-огез 6 аресаз ик тыро-пыдо малпаськыны, югдурез эскерыны, визьмо йылпумъянъёс лэсьтыны быгатэ ни, мукетыз 26 аресаз но улонлэсь бергамзэ уг вала. Соин ик мон та пусъёслэсь нокыӵе кулэлыксэс но пайдазэс уг адӟиськы.

Тазьы шуысал: вань урод передачаос, фильмъёс,  вань алама литература, кудзэ  адями учкыны-лыдӟыны кулэ ӧвӧл 6 аресын но, 76-ын но. Мае верамед потэ веран (свобода слова) вуттэ туж трос кырсьсэ-пожзэ улонэ, телевидение, книгаосы. Нокыӵе пусъёс адямиосты уз кутэ, котькудӥзлэн пушказ луыны кулэ аслаз «эгесэз» но «ӵужонэз» со жуг-жагез йыраз, сюлэмаз лэзёнтэм понна. Трос вераськиськом чылкыт ву, ӟеч сиён сярысь, ваньмыз ческыт, витамино мед луоз, тазалыкмылы изъян медаз кылдыты. Мугормы, кӧтмы сярысь сюлмаськиськом. Йырын, малпанъёсын но экология луыны кулэ ук. Озьыен, котькуд адями ачиз кыл кутыны кулэ, мае со лыдӟе-учке яке мае лэзе усьяны-адӟыны пиналызлы.

Галина Семёнова

 

 

Удмурт Дунне
By Удмурт Дунне Май 21, 2014 11:18