Нылкышно нунал

Удмурт Дунне
By Удмурт Дунне Апрель 1, 2014 17:15

Нылкышно  нунал

Нина куно возьма. Туннэ солэн вордӥськем нуналыз. Ӝытазе лыктыны кулэ апаез нылпиосыныз. Соосты но, ассэ но, аслэсьтыз пизэ но ческыт куноято шуыса, кышнопалаз туж кема бергаз. Кырсь посудаез гурезь ӝужда люкаськиз. Миськыны шуыса, вадьсаз мыкыртӥськиз, кранзэ позыртӥз гинэ, кытысь ке мисьтӥськон улысь пызйыны ӧдъяз ӵаж-ӵаж кезьыт ву. Нина нырысь-валысь кытысь-марзэ ӧз но вала. Кранзэ ну! позыръя ук. Нош ву уг дугды жальыртэмысь. Пыдъёссэ но коттӥз ни. Учке но, кран бордысь корт гумыез сыномыса сисьмем но пилиськем. Изолентаен лякыны уз луы-а шуыса учкыны выронъяз гумы кияз ик пырдћз. Ву эшшо золгес бызьыны ӧдъяз. Соку гинэ Ниналэн йыраз чилектӥз: стоякъёсысь вуэз кысоно. Отчы-татчы бызьылонъяз пукись вуэ гылӟыса усиз. Кияз мучолоен зар-зар бӧрдыны ӧдъяз. Ньыль аресъем пиез, дымбыр-йыг ваземез кылыса, дораз соку ик вуттӥськиз.

— Саша, эн ветлы татӥ — котмод! — пиез шоры, оло, нырысьсэ кеськиз егит анай.
Аслыз ачиз йыркурзэ но кӧтӝожзэ ӧз вормы ни, лэся. Тани-тани куноос лыктыны кулэ, шутэтскон нунал. Тол куазен но жаль-жаль зоре. Кинэ шедьтод таӵеен гумы тупатыны? Ачиз вужзэ позыртыны, интыяз мукетсэ юнматыны выре вал, но ӟигарыз вырӟытыны ик ӧз тырмы. Ма, коркаяз плоски сяна, мукет инструмент но уз сюры. Коркан воргорон ӧвӧл ке, ваньмыз тӥяське ни.

Мучолоен ведраен бызьылонъяз ӧсаз йыгаськись луиз. Улӥысь бускельёсыз тышкаськизы, вӧлдэтсэс коттэ шуыса. Ниналэн уката но синвуосыз ӧръяськизы. Оло выждэ ӵушалтод, оло бамъёстэ. Аварийной службае жингыртӥз, но отын шораз ыргетӥзы гинэ: милям ужмы ӧвӧл со, сантехникъёсты ӧте. Нош таоссэ шутэтскон нуналъёсы возьмаса калыд быроз. Табере воксё вутэк улоз шат?

Нина телефоназ бугыръяськоно кариськиз: 152 номер, но таос пӧлысь кинэ ке ӧтёд шат? Ӵыжы-выжыосыз кыдёкын, кышноос кужымтэмесь, тодмо воргоронъёсыз кышнояськемын. Кышнояськемзэ ӧть ай, кузпалыныз керетонэ пырод. Куд-огез сотэк но курдасагес шораз учкылэ, Нина огназ улэ ке, одно ик муртлэсьсэ капыртоз, кожало, лэся.

— Мар каргам нунал та? — бӧрдэ нылкышно.

Пиез ялан котыраз мерске: маялтыса но, чупаса но, мама, эн бќрды ни, шуэ. Кытысь ке кампет но вуттӥз ни: сиид ке, мылкыдыд, пе, капчиялоз. Конялзэ куртчиз но, Ниналэн ымыз уката курыт луиз. Пиез уго со куспын вазьыса вуттӥз: выль папамы луиз ке, туж шудо уломы ай. Нылкышно воксё но куасалскиз.

Син шораз шӧдтэк шорысь йӧтӥз ужысьтызы воргоронлэн номерез. Кышноеныз люкиськемын. Котьмалы кибашлы, но дырын-дырын туж азьтэм. Юылэ. Коллективын огназгес возиське. Ма, кышноос пӧлын трос уд зульы. Оло, сое юрттыны куроно? Сазь ке.

Нина Колялэсь номерзэ бичаз. Кепыраса му пыр вияське вал. Мурт воргоронэз ачиз ӧте — кыӵе возьыт! Соин ик куинь гудок мынэм бере телефонзэ куштӥз. Но воргорон ачиз жингыртӥз. Нина туннэ шугадӟонэз сярысь солы пулемётэн кадь тачыртыса вераз. Олокӧня пол шуиз: тэбинисько шуыса, вождэс эн вае. Коля нёръяны ӧдъяз: мон городын ӧвӧл, туннэ уг быгаты лыктыны.

Ниналы вордскем нуналыз кулэ ӧйлась ни. Кунооссэ лыктыны ӧз лэзьы. Вазь выдо но изё, малпаз. Бќрдыса катьтэммиз. Пизэ њыгыртћз, погылляськонъязы кыксы но умме усизы. Ӧйтод, кӧня кӧлысалзы на, вылды, но ӧсэ йыгаськись луиз. Нина усьтӥз но — Коля. Шӧмаськемез вань. Кияз бадӟым пуйы мандарин но сяська керттэт. Долкаменыз Нина номыр вазьыса ӧз вутты на, воргорон корка вамыштӥз ни, вордскеменыз ӟечкылаз, кылиськиз, саесъёссэ пужалляз но мисьтӥськон пала вамыштӥз. Возьматы, пе, кытӥыз мар, телефон пыр номыре ӧй вала.

Выль гумыез интыяз пуктыны выронъязы Сашик но сайказ. Тодмотэм воргоронэз адӟыса, соку ик анаез борды ӝиптӥськиз:

— Со мынам мамае, — шуиз.

Коля но ӧз куалекты:

— Мон мамадэ уг лушка. Чай юо но кошко.

Сашик шкафе йырыныз зымиз но ӵашаосты поттаны кутскиз. Чайниклэсь ӵоксэтсэ ӝутъяз.

— Вуэз вань ай, — шуиз со, кнопказэ зӥбиз.

Чайник ӵашетыны ӧдъяз.

— Таид улля ни, — вазиз Коля, ӝӧк сьӧры пуксьыса.

Нина ву лыктыны кутскемлы шумпотэмысьтыз, вань дасям сиёнзэ ӝӧк вылэ поттаз. Сю грамм веръятэк но, кудӟем мурт кадь лӧпшаз. Вераськисьтэм Коля но бӧтьыртыны кутскиз. Анаезлэсь капчи мылкыдо луэмзэ адӟыса, пиез но мурт воргоронэз уллямысь дугдэм гинэ ӧвӧл, солы машинаоссэ возьматъяны ӧдъяз. Коля капчи кариськиз, пияшез ки йылаз вылӥе но ӝутъяз, вал кариськыса, пельпум вылаз но ворттылытӥз. Ниналэн меӵак «кошкы ни» шуыны ымыз ӧз бералтӥськы ке но, «жади ни туннэ» шуылӥз ик. Но Коля тае кылымтэ улсы кариськиз, нылкышнолэсь вушйылэмзэ но адӟымтэяськиз.

Нина часэз шоры учкыку, дыр уйшорлэсь ортчемын ни вал. Пиез но мультфильм учкон сяменыз ик диван вылэ умме усем. Чупатэк но изьтӥ шуыса, сюлэмыз ик чепыльскиз. Шобыръян куспаз Саша вадьсы мыкыртӥськиз, вешаз. Эх, адӟысалыз ке тонэ атаед, кыӵе данъяськысалыз, малпаз со. Со куспын Коля коӵыш кадь вуиз но мышласянь Нинаез ӟыгыртӥз. Пӧсь киосыз дэрем пыртӥ но нылкышнолэсь кузэ сутӥзы кадь. Ниналэн шоканэз ик ӵоксаськиз. Куинь ар воргорон киосты шӧдылымтэ мугор пӧсектӥз. Ниналэн бамъёсыз ик пиш-пиш горд луизы.

— Мынам тынэсьтыд ческыттэ шӧдэме потэ, — кудӟем мурт кадь сипыртӥз Коля.

Нина таӵезэ ӧз возьма вал, тодмоезлы жингыртыкуз, ӧз ик малпа та сярысь. Коля шоры воргорон шоры кадь ӧз но учкылы вал. Нош мурт киос кый кадь котырто ни мугорзэ. Кытысь кужым шедьтӥз Нина — мозмытскон вылысь зӥрак берытскиз, ишкалскиз но лек куараен вазиз:

— Кошкы, Коля! Берт ни. Собере тыныд но, аслым но туж возьыт луоз. Асьмелы одӥг азьын ужано.

Пиосмуртлэн синъёсыз ик ӝуатскизы.

— Крандэ юри ӧд тӥя вал шат?

Тазьы малпаны луэ шуыса кылэмез бере Ниналэн сюлэмаз ик куртчиськизы кадь. Мар вераны но ӧз шедьты ни.
Воргорон чалмыт дӥсяськиз но, ӧсэз йыг! ворсаса, ышиз. Нош Нина, чигем боды кадь, пиез вӧзы выдӥз.

Азьлолэсь но зол, тымиськыса улэм кадь, синвуосыз кисьтӥськизы. Шобрет сэрег ик котмиз соосты ӵушылыны выронъяз. Ялан сипыртэ:

— Ултӥяд ук тон, Коля, ултӥяд монэ. Ачид но шӧдылытэк ултӥяд. Мугоры пиосмурт шунытлэсь мӧзме ик. Оген секыт. Сайканы. Чай сультыртыны. Уже гызмыльтыны. Ужамъяськыны. Доре бертыны. Жингыртӥсь шыпытлэсь но бушлэсь мозмытскон вылысь телевизор я радио лэзьыны. Кӧтэз тырыны. Выдыны. Секыт кезьыт валесэз берпуметӥ шунытэн шунтыны. Умме усьыны. Уйин сайканы. Секыт. Секыт оген. Макем капчи яратоно адямиед понна улыны! Капчи со сярысь малпанэн сайканы. Мисьтӥськыны. Капчи уже бызьыны но ужысь бызьыса бертыны, куддыр отысь пегњыса кошкыны. Плита азьын сылыны. Ортчем нуналдэ тодад вайыны но выль иворъёсты гажанэдлы вераны. Капчи солэсь но мылкыдъёссэ кылзыны-чакланы, солэн шумпотонэзлы шумпотыны. Яратоно муртэд понна валес шунтыны. Капчи. Ӵошен ваньмыз капчи. Оген секыт. Секыт ачид но пиед понна гинэ улыны. Сашик азьын бӧрдэм но уг луы — куректэмез адӟыса, ачиз но синвуаське. Собере пинал — со тынад оглюкетэд, со тон. Оло, соин но астэ оген шӧдоно. Воргоронлэн яратонэз понна но улэм потэ. Яратон, оло, выльысь бурдъясал монэ, оло, картме но капчиен сюлэмысьтым лэзьысал, оло, мылкыдын ужаны но кутскысал. Секыт ик оген.

Но тон монэ ултӥяд, Коля. Кинэн ке кӧлэме потысал ке, пиме ӵыжы-выжыосы доры кельтысал, корка тросам сюсьтылъёс ӝуатысал, ненег крезьгур лэзьысал! Нылмурт сюлэм чылкытсэ, ненегзэ, чеберзэ возьма. Огдырлы ке но выжыкыл дуннее вуон понна гинэ но шуныт кусыпъёсты вите. Пиналы вӧзын ик пичи диванын кӧня ке минут понна ӟыгыръяськом шат? Кызьы собере тодэ ваёнъёсме ньылом? Аслэсьтым юрдо ук. Пиосмурт борды чик дышытэк, соин эшъяськытэк, одӥг уй понна гинэ вузаськом шат? Лултэм, номыре шӧдылӥсьтэм мунё ӧвӧл ук мон! Яке пиосмурт синмын мон «капчи сиён»? Нылпие вань бере, воргоронлы ӟудыса, котькин улэ выдо, кожало шат? Мон анай! Кулэ луиз ке, ачим быръё аслым кулэзэ но ярасьсэ. Эх, Коля! Али гинэ сыӵе-сыӵе тау кари ужедлы. Нош бордам йӧтскид но, аслэсьтым ачим ик юрдыны кутски. Ӟыгыртэмедлы мон дась ӧй вал. Осто, малы таӵе секыт кышномурт луыны?!

Берпуметӥ кылъёссэ веракуз, кеськемзэ но валатэк кылиз Нина. Сокем курыт луиз сюлэмаз. Бӧрдэмысьтыз пиез но сайказ. Анайзэ юн-юн ӟыгыртӥз но шуиз:

— Эн бӧрды, мама, синъёсыд кужекъялозы. Будӥ ке, кранэз ачим тупатъяло…

Елена Сараматова

Удмурт Дунне
By Удмурт Дунне Апрель 1, 2014 17:15